الجمل الموسيقية

[عادل صموئيل]

احبائى

انا طبعا لما بتكلم فى اى موضوع ممكن افكار تيجى وافكار تيجى وانا مسترسل فى الكتابة
وافكار تيجى بعد ما اقفل يعنى بعد مالاحظت ان فيه اعاء تحب تعرف كل شىء وده بيسعدنى طبعا

فيه ضوابط تانية بتتحكم فى التلحين ... وهى الزمن .. بمعنى عبد الوهاب والسنباطى مثلا لما بيلحن اغنية لم كلثوم بياخد الكلمات وماحدش يكلمه تانى لمدة مش اقل من سنة يعنى اولا مش بياخد كلمات تانية وثانيا لو انت اعطيته كلمات حاذر انك تقول له تخلص امتى حايمى لك الكلام ويقول لك انا مش فاضى .. يعنى لازم تنتظر لحد ما هو بنفسه يكلمك فى التليفون ويقول لك تعالى اسمع المذهب او الكوبليه الكذا بعد ما يكون استقر على شىء
من مشاكل الزمن دى .. لو عايزين نعمل فيلم مثلا لمحمد فوزى ( وكان ممكن يعمل 4 افلام فى السنة ) فى ست اغانى يعنى 24 اغنية فى السنة ... الفيلم الغنائى بيتعمل ازاى ؟ اول حاجة القصة ... ثم القصة بيعطوها لمؤلف الكلمات اللى بيقراها والمخرج بيقول له عايزين فى الفيلم 6 اغانى وممكن يحدد له المواقف بحيث ان المؤلف بيكتب الكلمات متوافقة مع الموقف او المشهد ( واحيانا بيبقى التوافق ده مقرف وعبيط واحيانا بيبقى هادف ) انتم عارفين الهادف اقول لكم العبيط
يعنى المطرب بيشتغل مطرب فى كباريه يعنى الجمهور جاى يرقص وياكل ويشرب يعنى يفرفش المكرب حبيبته تركته عشان فقير واتجوزت واحد غنى يطلع المطرب على المسرح فى الكباريه ومعاه رقاصة ويطلع يبكى على حبيبته ده على الطبيعة لو طلع ينكد على الناس اللى جاية ترقص وتسكر حاينضرب يعنى
المهم بعد ام الكلمات تتألف ييجى دور الملحن المخرج بيطلب منه ان يخلص ال 6 الحان فى اسرع وقت عشان تتسجل الاول قبل التصوير عشان المخرج يسمعهم ويحدد يخرجهم ويصورهم ازاى
الملحن بياخد الكلمات والمخرج والمنتج ماعنهمش صبر يعنى لو مر يومين التيفونات تشتغل عملت ايه خلصت كام واحدة وهكذا هنا التليحن بيبقى مش الاهم بيبقى تصنيع يعنى الملحن بيحط اماه الكلام وبيمسك العود ويحاول يغنى الكلام
وطبعابيتهرب من الموسيقى الكتير يعنى يعمل جملة واحدة تتكرر فى كل كوبليه او انو يعمل لحن ال 4 كوبليهات زى بعض عان الاغنية تخلص بسرعة وعادة الاغانى دى بتبقى اقل قيمة فنية من الاغانى اللى الملحن بياخد وقته ويمشى وراء الهامه ويلحن ويختار ويغير
بس سبحان الله لما المطرب بيكون قدير اوى زى محمد فوزى او عبد العزيز محمود بيمعل من اللحن اللى اقل قيمة فنية حاجة رائعة لأنه بيغنيه حلو ... بمعنى ممكن لحن متوسط ويغنيه مطرب قدير اوى يطلع حلو وممكن لحن رائع ويغنيه مطرب متوسط يطلع قليل اوى يدمره يعنى
مع اطيب تحياتى