حكايات تحت التوتة (الراوى سعد الشرقاوى)

[سعدالشرقاوى]

إشتي يا دنيا...

إشتي يا دنيا وقلبك خالي

وانا مش ح اشغل أبدا بالي

خلليّ البرق يبان م الشرق

وصوت الرعد يعطـّل حالي

إشتي يا دنيا وقلبك خالي

,,,

إشتي يا دنيا وطفيّ النور

خلليّ المايّه ف بيتنا بحور

وانا من فقري بألِف وأدور

لمّا يمينى يتوه فى شمالي

إشتي يا دنيا وقلبك خالي

,,,

إشتى يا دنيا ما عادش طريق

وأنا متعاقد ويّا الضيق

إشتى وبيتنا ما فيهش دقيق

يعمل خابزة عيش لعيالى

إشتي يا دنيا وقلبك خالي

,,,,

اشتى يا دنيا طريقنا ترابي

وأنا مش قادر أوصل بابي

عايشة بلدنا ف عهد عرابي

قبل ما يبنوا السد العالى

إشتي يا دنيا وقلبك خالي

,,,,

اشتي يا دنيا ف أزمة غاز

والمستغني ان شا الله ما عاز

دا انا مش لاقي لمبة جاز

شاحت فرشي وراهن شالي

إشتي يا دنيا وقلبك خالي

,,,,,

إشتي يا دنيا وفكيّ الازمة

بليّ مواطن ما لهوش لازمة

واخد راتب ما يجيب جزمة

والمسئول ما سألش ف حالي

إشتي يا دنيا وقلبك خالي

,,,,

إشتي يا دنيا وهاتي سحابه

تهد عليهم وكر ديابه

ويحسّوا ان ف مصر غلابه

يا تقولي فال الله ولا فالى

إشتي يا دنيا وقلبك خالي

[سعدالشرقاوى]

حُب الدولة

بدأت شمس بؤنه تولـّع

وأنا مستكفي وعندى همومي

رافضة اللقمة يا ناس تتبلـّع

وما نيش طايق حتى هدومي

,,,,

يومها لقيتني بعافية شويّه

ومش مبسوط من جوْ البيت

قولت يا واد قوم ع الزراعيّة

وفك ركابك يم الغيط

,,,

والأنفار فى الارض بتشرب

مايّه بتغلي ف عضم القلة

والليّ بيعزق قطن بيهرب

م اللى يعبيّ ف تبن الغله

,,,

جنبي جيران بيضموّا ربايه

وخالهم عبده ف إيده محشـّه

جيت مشاور له بهدمه معايا

و انا مش طايق ضل العشة

,,,,

قلت يا عبده ما تاخد نفسك

وامسح وشك واغسل عينك

اشرب ريقك وارحم نفسك

وانا ح أدعيلك ربي يعينك

,,,,

ابنك بعزق عمّال يعزق

وانت صحنت الارض يا شيخ

ولا فكرت تريّح نفسك

قبل ما تكبر واللا تشيخ

,,,,

خلص العمر وعدّا بتعبك

وانت تقول آهي بكره تروق

لمّا بصمت الارض بكعبك

ختم بيرسم فيها شقوق

,,,,

نفسك يوم الدولة تشوفك

واللا تقول لك شكرا مرّه

دورك تنتج لليّ بياكل

وانت غداك بيـْبات فى الصّـُره

,,,,

والله يا عبده الارض ح تبكي

لمّا تموت وتسيبها تبور

أمّا الدولة ف عقد وفاتك

ناقص تكتب كلمة (غور)

,,,,

ألف خساره علينا يا عبده

والحكومات ربّولنا الكافية

والنوّاب سنوي بياخدونا

ع الصناديق عدمونا العافية

,,,,

بصْـّلي عبده وقال لي كفايه

دا انت القعده معاك بتغـُم

قاعد تندب فى الضلايه

قوم هات منجل وانزل ضـُم

,,,,

أنا مش ناقصك عندي مطالب

والفدان محتاج لتقاوي

وصاحب الملك إدّيته إيجاره

وراح من بدرى صرفله كيماوي

,,,,

أخد الدعم وسابلى الحيرة

وكل يومين أبصُم على شيك

ليه بتقلـّب يا ابنى السيرة

إبعد عنيّ الله يخليك

,,,,

حتى الجاز مدعوم على إسمه

وبيـْبيعهولي بسعر الفايده

هوّ علاجُه ف تأمين صحىّ

وأنا طول عمري مريض بالزايده

,,,,

تيجي حكومة وتمشي حكومة

وأنا مستنيّ الأرض تغنيّ

ألقى الزرعة تروح مهزومة

أرجع أقول العيب كان منيّ

,,,,

والبلهارسا بتاخد كومها

وتيجي تنام بالليل على فرشي

و فْ عنواني آهي عارفه مكاني

وراسمه خريطة بيتها ف وشيّ

,,,,

ورغم دا كله أنا عاشق أرضي

ماهي مظلومه وزيْ حالاتي

واللى ما يعرف قيمة بلدٌه

ينهب من ثروتها يوماتي

,,,,

إمشي يا عم إنجر وروّح

فكـّك منيّ وسيبني ف حالي

أصل أنا قاسم حبيّ عليهم

نـُصّه لأرضي ونصُه عيالي؟