دولة الاحلام

[سعدالشرقاوى]

(دولة الاحلام)

تحت التوتة ف نسمة صيف
نمت وروحت ف حلم خطير
ويوميها كان نومى خفيف
قلت اللهم اجعله خير
,,,,,
لقيتنى ف دولة كانت زراعيّة
أرضها خضرة ونيلها براح
وكلّ الشعب بشال وطاقيّة
حتىّ رئيسها راجل فلاح
,,,,,
ومحافظات القطن ف ناحية
ومدريّات الرّز دوايـــــر
ومساكن على شط الميّه
لمواشى فوق منها عماير
,,,,,
وحكومه م الحزب البلدى
بتحسّن دخل الغلبان
ومكاتب لرعاية ولدى
ووزارة جبنه وألبان
,,,,,
على بابها وزارة تسويق
حواليها أفراح وغناوى
بتصدّر أقطان ودقيق
وتسلـّم فى سماد وتقاوى
,,,,,
ولا تنجز بأتاوة ورشوة
ولا تشعر فى الضلمه بخوف
ولا تدفع فى رسوم ولاقهوه
لو تمشى فى طريق مرصوف
,,,,,,
ومصانع انتاج أدويّة
مواردها نباتات زراعيّة
وطعامهم من غير مبيدات
ومافيهشى ألياف صناعية
,,,,,,
وصبايا بتمشى بحنيّه
وعيونهم سودة وعسليّة
فى عباية قطن محلاوى
مغزول فى مصانع حربيّة
,,,,,,,
والحنـّه على شط الترعة
زرعينها لبنات العيله
وطيورها ع الميّه بتيرعه
ونخيلها عامل ضلـّيله
,,,,,
والميرى بيشتل فى زراعة
والملكى بينقل فى بضاعة
ومناهج تعليم فلاحتهم
وصلاتهم دايما فى جماعة
,,,,,
وسواقى بتروّى شراقى
والوردة بتغرق فى عبيرها
وصبايا بتقطف عنبايه
وجناين حبلانه بخيرها
,,,,,
ومواطن عايش فرحان
مش عاطل ولا عنده هموم
والقاضى مابينهم انسان
وماحدّش بيبات مظلوم
,,,,,
وحبايب وبيحموا الغايب
والحاضر منهم بيسدّ
وطبايع بتصدّ ألعايب
نقلينها من سابع جدّ
,,,,,
والنايب شايل مطالبهم
يرفعها فى الجلسة يوماتى
وبيرجع حالل مشاكلهم
يعرضها فى السّهرة ليلاتى
,,,,,,
وأمورهم فى الشورى مابينهم
والثروة مقسومة عليهم
ولاحدّ بيدخل فى شئونهم
ولا قوّه بتتحكـّم فيهم
,,,,,
حضارتهم فى شواطئ نيلهم
وخيالها ملعلع فى الميّه
وعيون فى حدودهم سهرانه
وسلاحها زخاير تنميّه
,,,,,

و صوت الحق نطق صحّانى
بيكبّر لصلاة العصر
ولقيـتـنى باصرخ بكيانى
وبأنادى (ياحبيبتى يامصر)
,,,,,

[Tarek Elemary]

ولا كل من نظم الكلام بقى شاعر
و لا كل من نقَّط كتير بقى غاوى
و إنت اللى قلمك بينا حس و شاعر
و إنت اللى فينا فى الأدب شرقاوى

===*=*===
و الله روعة يا عم سعد ربنا يزيدك من نعمه و يهبك العمر
لتمتعنا بتلقائيتك التى لا تخلو من عمق الفكرة و نضوج التجربة
مدرسة أنت من العفوية المعجونة بالموهبة و الفطرة السليمة
و خفة الروح و حسن إختيار الموضوعات و طرق معالجتها
أسجل دوماً إعجابى و راحتى النفسية كلما قرأتك
و نشوتى اللامحدودة عندما أسمعك
لا حرمنا الله منك

[حمدى شبانة]

أنا لما بسمع أغنية تطربنى بقول الله ولما بشوف حاجة حلوة بقول الله - طب ياأستاذ سعد حتسألنى إيه صلة الكلام دا بالقصيدة أقولك : أنا بكون فى متعة حقيقية عندما أقرأ أشعارك أقول : الله الله الله بس ليه ياعم سعد صحيتنى معاك من حلمك الجميل ؟ ولك شكرى على حلمك - قصدى - قصيدتك الجميلة .

[سعدالشرقاوى]

المشاركة الأصلية كتبت بواسطة Tarek Elemary

ولا كل من نظم الكلام بقى شاعر

و لا كل من نقَّط كتير بقى غاوى
و إنت اللى قلمك بينا حس و شاعر
و إنت اللى فينا فى الأدب شرقاوى

===*=*===
و الله روعة يا عم سعد ربنا يزيدك من نعمه و يهبك العمر
لتمتعنا بتلقائيتك التى لا تخلو من عمق الفكرة و نضوج التجربة
مدرسة أنت من العفوية المعجونة بالموهبة و الفطرة السليمة
و خفة الروح و حسن إختيار الموضوعات و طرق معالجتها
أسجل دوماً إعجابى و راحتى النفسية كلما قرأتك
و نشوتى اللامحدودة عندما أسمعك

لا حرمنا الله منك

حبيبى ومعلمى وتاج راسى
الاستاذ/طارق العمرى
ياعم انا فى عرضك
داكان مجرد منام
وانا حاليا كويّس وعال الحمدلله
عدّا على خير
اللهم اجعله خير
وطالما عدّت سليمه وماحدّش اتعوّر
واصلا مافيش تقرير طبى
نخلىّبالنا من اللى جاى
وربنا يخليك ليا
ومايحرمنيش من انسك

[على عبداللاه]

إرجع تانى تحت التوته .. وعيد الوصل
إحلم .. أحلامك مظبوطه .. هى الأصل
أصل بلدنا
دوله كبيره وفيها الخير
فيها الحب يكفى الطير
قول يا كبير
قول فى الحلم هى بلدنا
فيها الحب ما هواش غلطه
فيها قعادنا وخيرنا وزادنا
فيها الحلم ما هواش ورطه
بس الخوف يقولولك إدن فوق المدنه
وإن جزيرتك دية مالطه ..

والله نفسى يجمعنى بمعاليك لقاء ... إدينى إنت بس عنوان التوته
وأنا فوريررررررره أكون عندك
تحياتى وخالص ودى وإحترامى

[سعدالشرقاوى]

المشاركة الأصلية كتبت بواسطة حمدى شبانة

أنا لما بسمع أغنية تطربنى بقول الله ولما بشوف حاجة حلوة بقول الله - طب ياأستاذ سعد حتسألنى إيه صلة الكلام دا بالقصيدة أقولك : أنا بكون فى متعة حقيقية عندما أقرأ أشعارك أقول : الله الله الله بس ليه ياعم سعد صحيتنى معاك من حلمك الجميل ؟ ولك شكرى على حلمك - قصدى - قصيدتك الجميلة .

اخى الغالى
الاستاذ/حمدى شبانه
انت اللى راجل عسل
وكل الحكاية اننا جميعا مقصّرين فى الاحلام شويّه
ولو كل واحد حاول يحلم نص ساعة بس ماكانش دا الحال
والظاهر اننا بطلنا اصلا نناموا
عشان كده المنامات شحّت فى السوق

ربنا يجبر خاطرك يابو حميد
ويمتعنا باشعارك الجميلة

[سعدالشرقاوى]

المشاركة الأصلية كتبت بواسطة على عبداللاه

إرجع تانى تحت التوته .. وعيد الوصل
إحلم .. أحلامك مظبوطه .. هى الأصل
أصل بلدنا
دوله كبيره وفيها الخير
فيها الحب يكفى الطير
قول يا كبير
قول فى الحلم هى بلدنا
فيها الحب ما هواش غلطه
فيها قعادنا وخيرنا وزادنا
فيها الحلم ما هواش ورطه
بس الخوف يقولولك إدن فوق المدنه
وإن جزيرتك دية مالطه ..

والله نفسى يجمعنى بمعاليك لقاء ... إدينى إنت بس عنوان التوته
وأنا فوريررررررره أكون عندك
تحياتى وخالص ودى وإحترامى

حبيبى الاستاذ/على
يمكن أطول السّما لوجيت على بابى
وأفرح وأقول للولاد دا أعز احبابى
لكنىّ خايف ياخدنا الوقت نتغدّوا
والقعدة تحلى وتبقى العشوة لحسابى
,,,,,,
دانا نفسى آكل معاك لو نصّ بسكوته
والسهرة تحلى واقول لك ألف حدّوته
بس اوعى تنسى انّ محسوبك راجل فلاح
عايش حياته فى حضن الارض والتوته