موسيقى الشعر - دروس في علم العَروض

[unicorn]

المشاركة الأصلية كتبت بواسطة سمعجى

يا دي النور يا دي النور ،،
و الله و شرَّفت يا بو مندور ،،
بيتك و مطرحَك ،،
و اقعُد في الحِتـّة اللي تريَّحَك ،،
وَ نِعم الشباب ،،
و زينة الأحباب
ثورَجي مِن يومَك ،،
و محبِّتـَك سابقة لومَك

شوف بقى يا سِيد الكـُلّ ،،
إحنا عاملين تنظيم صُغيّر على قـَد الحال ،،
إسمه تنظيم القراميط الأحرار ،،
و القائد بتاعنا حضرة جناب الدَّكتور محمود ،،

و هدفنا المنشود هو القيام بثورة سَمكية ،،
و باعتبارك من إسكندرية عروس البحر الأبيض ،،

فالمطلوب من جنابك ،، تجنيد كافة أنواع السمك اللي بيلـَعبَط
في بحركم أبو موجة ساتان ،،


و انا متشكر قوي قوي عَ التليفون اللي شدتهولي مِ البندر ،،
و عشان خاطِر وِشك السِّمِح دِه ،،
آني حارجع أقعد في الكفر وِسط أهلي و ناسي ،،
و ربنا يقدرني على نسيان السيمون فيميه

و بالمناسبة السعيدة دي ،،
خـُد شوية الجناس التام دُول :

لو عايز تعرف أبو مَن ؟! دُور
و امشي ف سِكة مالهاش سور
و امـَّا تلاقي ف وِشك نــــــور
تعرف إنه ،، أبو منـــــــــدور
و تبلـَّغنا عشان مَـــن ،،، دُور

يا ميت مليون مرحب , يا الف راية بيضا
و النبى دخلتك علينا الليلة دى يا سيدنا تستاهل أكلة زفر من رباية دار العكايشة .
تنظيم القراميط الأحرار و لا حتى السمك الشبار , أنا معاكو يا كبير , و قول لقائد التنظيم الدَكْتور محمود ( ربنا يروحه لعياله الليلة دى بالسلامة , و يكفيه شر المستخبى ) ان سمك المالح اللى فى نواحينا كله هايكون فى طُوعه و تحت أمره .
من النجمة هاسرح و ابلغهم برجعتك اللى تشرِِح النِفْس و بأوامر سى الدَكتور محمود .
إنما يرضيك يا سيدنا اقول للواد خلف العرِّيف شيل فراخ امك من الكتّاب اللى اتقلب عشه و ريحته بقت -عدم المؤاخذة- كنيف عشان نقعدوا فيه , يقوم الواد الباجِس أبو عين واسعة يقوللى ما تروحوا تقعدوا على قهوة رجب ؟؟؟,
بأة احنا على آخر الزمن نروح نقعد على قهوة رجب نلعب كوتشينة و نتفرج عالحاجات البطَّالة؟؟؟
يرضيك كدة يا سيدنا ؟؟
و آخرة المتمّة أظبُطه جايب كام واد من الهلافيت اصحابه و قاعدين فى الكتَّاب بيشربوا تاتورة و بيطسّوا فى قرع البوظة,
و ياما كلمته عشان يرتِجِع و يحط فى عينه حصواية ملح و هو لا خِشَى و لا حيا.
لحد ما نبدأ الدروس بكرة بإذن الله مد ايدك و خد منى , دول على ما قسم فطيرتين مشلتت - بدقيق قمح و غلاوتك عندى- و برطمان مش من بلاص فى دارنا , من عُمْر اسم النبى حارسه يوسف ابنك , و لحستين عسل ابيض ,
مش مقامك يا سيدنا من بعد أكل الكبارات و اولاد الذوات , بس اهى الجودة من الموجودة و البركة فى القليلة.
بينى و بينك بأة و كلام فى ودنك سايق عليك سيدى الطرّيش , لا تشوفلك حل فى الواد إمام ابن ابويا مسعود ,
اللى اتربط يا ولداه فى غيابك من ليلة جوازة الشوم من البت فتحية بنت ابو لطفى البقال ,
الواد يا عينى ماشى فى البلد مِنكِسِر و عينه فى الأرض ,

و من خيبته و قلة حيلته , قال راح يولع دستة شمع فى مقام سيدى المكفى , و انا قلتله الهى يفضحك زى ما فضحه ,
يقوللى اهو من غلبى هاعمل ايه ؟؟

منه لله بأة اللى خد أتره و عمل فيه العملادى
أمانة عليك لا تحرقله العمل و تفكله الربط ,
يا ابو الكرامات انت يا بركة يا ابو سر باتع.

حمدالله على السلامة يا حبيبي يا سمعجى الأدب النضيف ,
وحشتنا و وحشتنا مناغشاتك الشربات
و روحك المتمرّدة التى لا تهدأ
و الف شكر يا استاذنا على "جناسك" اللى عمره ما يطلع ناقص
الهى ما ينقَّصلك جناس
و لا يكسرلك بيت
و لا يغلّبك فى قافية , قادر يا كريم
شكرا أخى و صديقى و أستاذى كمال عبد الرحمن