موسيقى الشعر - دروس في علم العَروض

[سمعجى]

المشاركة الأصلية كتبت بواسطة محمود

أول كلامي سلام ..

خصيمك النبي يا سيدنا .. حتى لو جاوبت كله صح .. وللا حتى كله غلط .. نفسي أطلع التالت. إلا أكل دار ابو مندور. إللي يفوته يبقى ما داقش أكل في حياته واصل .. فاكر يا سيدنا طاجن السبيط اياه .. دا انا لسة باحلف بحياته لحد النهارده.

عَشْرُ كلماتٍ على وزن السبب الخفيف:

أَب ، أُب (كما تقولها عندما تدلق الشاي على الكي بورد) ، إب (على وش الدنيا) ، إج (فعل أمر بمعنى إشتعل أو ولَّع) ، أخ ، إذ ، أر (دكر) ، أُر (فعل الأمر منه) ، إر (فعل أمر تاني بس لما يكون مطلوب منك اعتراف بما فعلت أو بما لم تفعل) ، أُس.

عشر كلمات على إيقاع الوتد المجموع:

أبا ، أبو ، أبي ( كما في .. يجوع ضيف أبي نوح ..) ، أبي (والدي) ، أبى (رفض) ، أبَت (رفضَت) ، أبَوا (رفضوا) ، أبـِت (أقضي الليل) يَبت ، تبـِت ، نبـِت ، يُـبـِت (أي يجعله يبيت الليل) ... إلخ ، أبـِت (في الأمر أي أحسمه) ... إلخ.

عشر كلمات على إيقاع الفاصلة الصغرى:

أَأَبَى؟ أَأَبَت؟ أَأَبَوا؟ أَأَبا؟ أَأَبو؟ أَأَبـِي؟ أَأُبَي (ابن كعب)؟ أَأَبـِت (في الأمر: أي أأحسمه)؟ أَتـَبِت؟ أَنـَبـِت؟
على فكرة يا سيدنا .. أتـَبت في الأمر ممكن تصبح كلمتين مش كلمة واحدة ذلك أن السؤال يمكن أن يكون عما إذا كنت فضيلتك من يبت في الأمر أو عما إذا كانت ام خلف (مثلا يعني هي من تبت فيه .. شيل الطيور من المطرح مثلا)

تحياتي

محمود

و لمـَّا انتَ عارف كل حاجة يا دَكتوور ،،
إيه اللي جابَك كُتابنا أبو قـَعدة تفصص المفاصل !

ما شاء الله عليك ،، دكتور من يومك ،،

كل إجاباتك صحيحة
:good:

بس حِلوة ( أَب و إب و أُب دي ) صحيح يا ولاد ،،
لغتنا العربية يسرٌ لا عُسر ،،
لكن ( نملِكها كما كان القدماءُ يملكونها ) آهي دي مشكوك فيها ،، جايز ( نحوزها ) ،،( نزين بها مكاتبنا )

و لاّ فِعل الأمر اللي من حرفين ( إج ) ،،
دا حتى الفِرنجة سارقينه من لغتنا ، و بيقولوا ( Egg ) بمعنى ( بَيضة ) ،،
لكن احنا ما ينضحكشي علينا يا عَرَب ،،

آدينا استردِينا ال ( إج ) و عملناها ( إجَّة ) أى عِجّة

شفت تلاقـُح اللغة و اختلاط أنسابها بيعمل إيه يا دكتور ؟! بيعمِل عِجّة

طيب تِعرف تجيب فِعل أمر مِن حَرف واحد ،،
و لِك عليّا خرطتين مِش مِن دار ابو مندور !

و نعود للأبْـأبَة ،،

أبَا ، أبو ، أبي إلخ ،، كله صَح يا دكتور ،،

بس ما فسرتش ( تِبت ) ،، تقصد بيها الجبال ،
و لاَّ بني آدم بعينه ؟!

ثم إيه حكاية البيات معاك ( يَبت ، نبت ، يبت ) ،،
ما الواحد يبات في أى حِتة و السلام

و مع الفاصلة الصغري ، نـُأَبئِبُ من جديد ،،

أَأَبَى؟ أَأَبَت؟ أَأَبَوا؟ أَأَبا؟ أَأَبو؟ أَأَبـِي؟ أَأُبَي (ابن كعب)؟ أَأَبـِت (في الأمر: أي أأحسمه)؟ أَتـَبِت؟ أَنـَبـِت؟


فكرتني بالقـُبقاب ، و التي نقولها ( أُبآب ) ،، و يبدو أن أصل كلمة قبقاب ، هى :
( أُب ،، آب ) ، أُب : فعل أمر ،، آب : فِعلٌ ماض ، و مضارعه ( يَؤوب )، و المعنى ( عُد ،، عاد ) ،، على اعتبار أن القبقاب وسيلة مواصلات

عموماً ،، كل فواصلك الصغرى صحيحة
ربنا ما يجعَل بيننا فواصل

أما مَن يبت في الأمر ، فهى السِت ام خلف ، باعتبارها ( المَدعُوّة ) لشيل الطيور ( مثلاً )

و مبروك عليك خرطة المِش المُحَنـَّطة في بلاَّصِها ،،
منذ عصر ما قبل الأسرة المُبارَكية