حوارات فنيه غنائيه

[M O H A M E D]

يا سلام يا أستاذ إيهاب
موضوعك جميل جداً
لكن الكلام فيه يطول بدءاً من تعريفنا للفن انتهاءاً بدوره و تأثيره

والفن لا بد أن يكون ممتع و مفيد
يعنى لو انا شفت فيلم أو قريت كتاب أو سمعت أغنية و لم أندهش أو أستمتع يبقى ده مش فن .. ده يخص الجزء الأول ( المتعة )
ثانياً الإفادة !
هو يعنى ايه فن مفيد ؟
هل هو الفن اللى بيناقش قضية ؟
و لا الفن اللى بيوجه الناس لسلوك معين يراه صانعوا العمل الفنى أنه السلوك الصحيح ؟
ربما يكون ده أو ده لكن بشروط
في رأيى .. الفن تجارب .. قد تخطئ و قد تصيب
و لست أحترم أى عمل فنى لمجرد أنه يناقش قضية .. المهم كيف يناقشها و هل هذه القضية أثرت على جاذبية العمل أم لا ؟
و هديك مثل بفنان محترم هو محمد صبحي
تجربته المسرحية الناجحة جداً مع المؤلف لينين الرملي ( وجهة نظر )
و تجربته التليفزيونية ( عايش فى الغيبوبة )
كلاهما يناقش قضية .. و لكن الفرق شاسع بين الكوميديا الذكية فى وجهة نظر و ازاى كانت كل كلمة بتؤدى دورها و العمل به رمزية خلت الموضوع أعمق .. و فى نفس الوقت تشاهد و أنت مستمتع
و على العكس فى عايش فى الغيبوبة .. الرمز كان أوضح من الشخصيات .. و كان فيه كم من المباشرة اللى لا يمكن احتمالها .. و حتى الكوميديا لم يكن لها وجود !
لذلك يمكن أن نجد مسلسلات كنير تشبه عايش فى الغيبوبة .. و لكن ان تجد مسرحيات زى وجهة نظر قليل جداً
ممكن نلاقى عمل جيد لكن أن يصل لقمة الإبداع شئ نادر الحدوث
لذلك فالعملية ليست سهلة
و دلوقتى فى كّتاب كتير بيحاولوا يداروا ضعفهم الفنى بحشر أى قضية فى سياق العمل الفنى
و الغريب إنى بلاقى نقاد تتغنى بهذه الأعمال و يكتبوا فيها ما لذ و طاب من عبارات المديح !
فى رأيى أن أسمى أهداف الفن هو الفن ذاته
إن العمل الفنى يتعمل صح مهما كان موضوعه أو نوعه
و هو ده اللى ممكن يصلح المجتمع
و تأثير الفن بيظهر على المدى البعيد و خاصةً بالأعمال العميقة الغير مباشرة
انت ضربت مثل بفيلم جعلونى مجرما و ازاى هو كان سبب فى تغيير القانون و أحب أضيف كمان فيلم كلمة شرف لفريد شوقى برضه
لكن الفيلم حتى لو ما كان غيـّر القانون .. فهو فى حد ذاته جميل و ما زال يدهشنا حتى الآن
طب تعالى نفتكر إعلانات زمان بتاع الصحة .. و ادى ضهرك للترعة و الحاجات دى ..ما هى أدت رسالتها لكنها مش أعمال فينة و غير صالحة للعرض الآن
نيجى بقى للطرب !
الموسيقى الحكم عليها بمبدأ ممتع و مفيد بالشكل المباشر صعب شوية
لإن المتعة هى اللى غالبة أكتر .. و تذوق كل واحد للأغنية بيختلف
و الفايدة غالباً بتكون فى استثارة الخيال أو الدخول فى حالة معينة .. فرح أو شجن ..
و لذلك هى أنسب طريقة للتعبير عن ألامنا و أفراحنا .. انكساراتنا و انتصاراتنا
يعنى إحنا عرفنا عن حرب أكتوبر من الأغانى ..
و قد ايه بتأثر لما اسمع وردة و هى بتغنى ( و انا على الربابة بغنى ) و سعاد حسنى ( دولا مين )
يعنى عشت حالة الانتصار من خلال الأغانى رغم إنى ما كنتش لسه اتولدت
و الفن بيأرخ للمجتمع و خاصةً لو كانوا الفنانين صادقين
يعنى لما تسمع أغانى عبد الحليم الوطنية قبل النكسة تعرف قد ايه الجيل ده كانت أحلامه كبيرة
و لذلك النكسة كانت كبيرة .. و اكتأب صلاح جاهين .. و غنى عبد الحيلم ( عدى النهار )
يعنى الفن و المجتمع بيتبادلوا التأثير

لكن يا سلام لما الصبح اسمع يا حلو صبـّح لقنديل أو الورد جميل لأم كلثوم
و يا سلام على مقطوعة موسيقية لمحمد عبد الوهاب أو بتهوفن أو موتسارت أو راجح داود أو لوحة جميلة أو صورة فوتوغرافية أو كاريكاتير أو قصيدة شعر و مش مهم هنستفيد منها إيه .. المهم إنها تسعدنا
لإن هى دى أهم رسالة للفن .. بس يقدروا عليها !

وشكراً