(جوز المراتين)
أنا باسأل وجوابك فين؟
ماتقول لى ياجوز المراتين
مش قادر تصرف على واحده
والزّاى هاتكفىّ الاتنين؟
,,,,
ما رضيتش بقدرك ونصيبك
ومساوى عدوّك بحبيبك
وماعدش ف بيتك ولا جيبك
م الفكــّه يكمّل جنيهين
ماتقول لى ياجوز المراتين
,,,,,
بتزوّد عدد المواريث
متعايق وعامل لى عريس
ويوماتى محاكم وبوليس
وعيالك عايشين بالدين
ماتقول لى ياجوز المراتين
,,,,,,
كات واحده وكان ماشى الحال
وحياتك كات عال العال
مش واخد على راحة البال
وشتلت الهم ف قيراطين
ماتقول لى ياجوز المراتين
,,,,,
لو عايش بحياتك راضى
ماتلفـّش وتدور ع الفاضى
ايه أجمل شئ فى الدنيا دى
غير حب بيجمع قلبـين
ماتقول لى ياجوز المراتين
,,,,,,
كان وشـّك فاتح ومنوّر
وجمالك سبحان من صوّر
فى زراعة أرضك بتبوّر
عامل زىّ غراب البين
ماتردّ ياجوز المراتين
,,,,,,
كات شيله وتقيله عليك
والمولى كان بيقوّيك
لمـّا النعمه جرت فى ايديك
سيبت الهم وشيلت اتنين
ماتقوللى ياجوز المراتين
,,,,,,,
وعيالك مافرحتش بيهم
وبتـنسى دايما اساميهم
كان يكفى اتنين وتربيهم
مش عشره ويطلعوا جاهلين
ماتردّ ياجوز المراتين
,,,,,,
جوز المرتين
العرض الشجري