إبداعات الشاعر طارق العمرى ، بدون تعليقات

[Tarek Elemary]

الحَالَتَيْن سِيَّان
=======
صَبَح الصَبَاح زعلان
أبْكَم مافَيهْشِ أدان
و بَلَدْنا مِتْبَعْتَرة
حَبَّة فِ كل مِيدَان

يا هَلْتَرَى مَهْرَها
مُمْكِن يِكُون قَهْرَها؟
وَلَّا يكون سِرّْها
مَغْلوُبة عَلى أمْرَها
مِنْ قِلِّة الجِدْعَان؟

زِيِنْة الصَبَايَا بَهِّيّْة
بِيْجَوِّزُهَا لْهَفِيّْة
أحْسَن ما تِبْقَى بَغِّيّة
وِ المُعْضِلَة هَيَّة هِيَّة
فى الحَالَتَيْن سِيَّان!!

[Tarek Elemary]

ما عاد مقبولاً بأن تترددى

[Tarek Elemary]

أنتِ النســــاء

[Tarek Elemary]

لو قُلت للشجر اللى حاسُّه ناحيِتِك
يمكن يطير
و إن قُلته للبدر ف سماه
يمكن يغير
حتى النسيم لو يوم سمعنى باوصِفِك
هايقوللى أيه؟ ... مالهاش نظير؟
و إن قُلتُه للشمس اللى خيطها
بلون دهب زى الحرير
هاتقول كتير
و أنا أقولَّها لو تسمعيها بالكلام
هاتقولى عاوزة شكسبير
و إن كل اللى إنكتب فى وصفها
مهما كِتِر تقصير

[Tarek Elemary]

صديقى اللى سافر
==================
كلام نفسى أقوله لصاحبى اللى سافر
و سابنى لوحدى .. أجاهد و أعافر
ما بين رزق أهلى و قوت العيال
و حد يناكفنى فى أم الجدال
مابين إنى مؤمن و بين إنى كافر

سامحنى يا صاحبى بتبكى عيونك
و عمَّال بتشكى يادوب إن كونك
مفارق حبايبك و ريحة الحوارى
و توصف آلامك و لا مرة دارى
بأن اللى عايش فى وطنه مسافر
و بيعانى مر العذاب الأليم
كأنه ف جهنم و شيطان رجيم
و عايش بيحفر بسن الضوافر

لأن اللى حاكمه بجهله اللى سافر
و لا هوه فاهم ولا هوه قادر
و لا هوه حامد و لا هوه شاكر
و لا هوه سامح و لا هوه غافر
و لا هوه سامع أنين الغلابة
و لا هوه يعرف يحوش الديابة
و بانت ف وشه بلاء البشاير

يا صاحبى سامحنى و إحمد و إشكر
لأن اللى فيها ما لوهش إنه يشخر
بينده حسين اللى ناب عن جنابه
و هوه يفرقع يادوب من جِنابه
و بين كل لحظة و قمم الشوارع
ما بين فعل ماضى و فعله المضارع
بيندم و يشكى و يصرخ يا ساتر
 

يا صاحبى اللى فايت حبايبك هِنا
هاترجع تلاقى اللى كان عندِنا
فارقنا و غايب و أصبح تاريخ
و كل اللى باقى شبه أو مسيخ
بيحكى ألمنا صور ع الجدار
و تسمع أنينه ما بين كل دار
و يجبر بناتنا تِفُك الضفاير
عشان عملة صعبة ف جيب الشِقيق
و فقر الغلابة أكيد شيء خنيق
و برضه الندالة ف شقيقنا اللى زاير
هاننكر لآمته و نقعد نكابر
دا مهما يكون صبر قلبى اللى صابر
ما يقواش يقاوم حياة المقابر
سامحنى يا صاحبى
يا سعده اللى سافر
يا ريت حظى يضرب و أعرف أهاجر

[Tarek Elemary]

و بتمر السنين
و إنتى اللي ساكنه الروح
وِ تِسحِرنى إبتسامتِك
مهما كان حالى
و يحلالى الكلام
فى أي شيئ عنِّك
و لو مِنِّك يادوب كلمة
تداوى جروح
سحرتينى
و أشوف منك
كلام بالعين
و حرف أخرس
على شِفَّة كواها حنين
و إيدِك لمَّا تِلمِسنى بتِحبِسنى
ما بين حاجتين
يا أطير بيكى
و أهرب من عيون الناس
يا أكتِم شوقى
و أتدَّارى من اللايمين
و يكفينى إن قلبك
حس بمشاعرى
و لو حتى باشوفِك
تِهرَبى و تِجرى
و أنا لو حتى طال صبرى
أنا معاكى لآخر آخر المشوار
أكيد بعد الليالى نهار
و لُقياكى أدان فَجرى

[Tarek Elemary]

وحشتينى
.
.
.
.
هاهُنــــــا

[Tarek Elemary]

أمى
.
.
.
.
ها هُنـــــــــــــا

[Tarek Elemary]

ريحة البُن بتجنِّنى رغم إني
ما ليش فى الكيف و موش حريف
كما الرجَّالة من سِنى
لكن باشعر بأنها حالة
بتخلينى باتنَشَّق على قْوَالَة
كلام عكس اللي بتظُنِّى
و أعمل أيه بقى ف إنى
ريحة البُن ف المكتب ..... تجَنِّنِي

[Tarek Elemary]

فى الدنيا دى .... نادر تنول
و صدقونى القصة موش قصة عقول
و لا حظ ولا كُتر الحُمول
الدنيا دى ... ممكن تقول
لعبة و لمَّا بتِتْلِعِب .... مالهاش أصول
و مافيش قواعد أو حكم
و كتير و حوالينا و أَكَمْ
يخسر جسور ... و ينول خجول
الدنيا دى ... مالهاش حلول
يا تفوتها كاره للحياة
يا تعيشها غول
و مع الأسف ... نادر تنول