جوز المرتين

[عفاف سليمان]

المشاركة الأصلية كتبت بواسطة الباشاقمرزمان

كدة صبحت من المتهمين

والسبب ف أزمة التموين
وبنعمة ربنا م الكافريـــن
عشان اجوزت اتنيـــــــن
طـب ايه اللى رمانـــــــي
على المر إلا الأمريـــــن
فين الست اللى شغلـــــت
لي القلــــــــب والعيــــــن
بعد الفرح والجواز يدوب
الهنا والفرح كان شهرين
وراحت الفرحة ويا النشوة
وبدأ حساب الملكيــــــــــن
انت بتتعايق يا خويا لمين
ورحت فين وجيت منيــن
وفلوسك يا روح قلبــــــي
بتوديها فين ولميــــــــــــن
قلت يا واد دي الغيـــــــرة
بس زايدة عندها حبتيـــــن
وبعــــــد أول خلفتهـــــــــا
قلـــــت حتهــــدى وتليــــن
اتاري كنت عبيط والنكــــد
بدل الصـــــاع زاد صاعين
ارجع م الشغـــــــل أقول هو
الأكل يا حلـــــــــــــوة فيـــن
أصلي صحيت ياخويا الضحى
م النوم تعبانة ومصدعة حبتين
رحـــــت انام لي ساعتيـــــن
بعدها قلت لي بيضتيـــــــــن
حمدت ربنا وبسملــــــــــــت
وكلت وغسلــــت الايديــــــن
كتمت قهري وغيظي وقلتلها
سلامتك يا نور العيــــــــــــن
ورحت ع الشغل من تانـــــي
أصل باشتغل ورديتيـــــــــــن
ارجع الاقيها نايمـــــــــــــــة
وحاطة راسها على مخدتيـن
والشعر زاد نكشه نكشتيــــن
والهدمة على جدتهــــــــــــا
ما اتغيرت من يوميــــــــــن
وفى الآخر يا ام مدحــــــت

مش عايزاني أجوز اتنيـــن

اه شماعة الكسل والاولاد
فى قطم الدهر والغسيل
ومواعين واكل لمين ولا مين
وانت ترجع تلاقيها تعبانه
شغل البيت عليها كتير
طيب ليه متقولهاش
بكملتين حلوين
ريحى نفسك يا ام العيال
وبدال ما تجيب لها دره
هات لها شغاله تساعد
فى البيت
وهى تفضى لك
وبدال ما ترجع تلاقى
هدمتها عليها بقالها يومين
تلاقيها لابسه اجمل واحلى الفساتين
ولا انتم كده يا راجاله
دايما للحل الامثل متهربين
وطمعكم وعيونكم الزايغين
تقولوا مفيهاش حاجه لما
يبقوا اتنين
طيب
اتنين
اشربوا بقه
وتستاهلوا قلع العين
وشعرك من راسك يقع من التفكير
تجيبها منين ولا منين
والمهيه مش مكفيه للعيال التعبانين
روح شوف هتلاقيهم فى الشوارع متسولين
وهدمتهم مقطعه وحالهم يصعب ع الكافرين
يبقى انهى حل احسن
تراعيها وتجيب لها شغاله
ولا تبقى ابو العيال وجوز لاتنين
هههههههههه
ارق تحياتى
ويارب يارب
ما حدا يتزوج على زوجته
ام العيال
ارق تحياتى
اختكم عفاف

[ليلى ابو مدين]

الشاعرة القديرة الست أم مدحت
الله عليكِ يا ست أم مدحت وعلى أشعارك الجميلة المعبرة
والله عندك حق في سؤالك المشروع جداًً؟!!
أنا باسأل وجوابك فين؟
ماتقول لى ياجوز المراتين
مش قادر تصرف على واحده
والزّاى هاتكفىّ الاتنين؟

أعتقد أنه لن يجد جواباً لانه بذلك سيعترف بخطأه وخطيئته
في حق نفسه وحق زوجته الاولى وأولاده .
كلمات جميله ومباشره تعبر بصدق عن حال من لم يرضى
بنصيبه فيقع فيما هو أنكى وأشد
سلمت لنا يا ست أم مدحت وسلمت يدك وسلم قلمك
دمتم بخير مع خالص تحياتي
ليلى ابو مدين

[سلوى خزبك]

محاورة شعرية جميلة وعالية جدا
بس عايزين ثالث يشوف حل وسط
بين الشاعرة اللذيذة ام مدحت بمنطقها
وبين الاستاذ مصطفى اللى رده لايمكن تجاهله
من هو الشاعر العبقرى اللى هيقدر يشوف لنا حل وسط يرضى الجميع
ويمتع محبى الشعر الهادف
تحياتى وتقديرى للشاعرين

المشاركة الأصلية كتبت بواسطة سلوى خزبك

محاورة شعرية جميلة وعالية جدا
بس عايزين ثالث يشوف حل وسط
بين الشاعرة اللذيذة ام مدحت بمنطقها
وبين الاستاذ مصطفى اللى رده لايمكن تجاهله
من هو الشاعر العبقرى اللى هيقدر يشوف لنا حل وسط يرضى الجميع
ويمتع محبى الشعر الهادف
تحياتى وتقديرى للشاعرين

أهلا بيكي يا أستاذة سلوى
فعلا محتاجين حد يفك الاشتباك لأن كلام أم احمد حلو ومظبوط من زاوية معينة وانا حبيت أقول ان هناك زوايا أخرى يعني الرجل أحياناً بيضطر للزواج الثاني إضطرار بس كالعادة الأستاذة عفاف بتشوف الدنيا بعنيها هي مع ان فيه ستات ممكن يطفشوا العفريت مش جوزها بس ...
ده مجرد وجهة نظر .... وأم أحمد فتحت موضوع ممكن نتناوله من زوايا كثيرة وكأنه موضوع نقاش بس الحوار يكون بالشعر هذه المرة.
شكرا للست أم أحمد على هذا الطرح الرائع وشكراً للأخت عفاف على وجهة النظر المحترمة وشكراً لك أستاذة سلوى على المداخلة الرائعة.
تحياتي لشخوصكم الكريمة