رد: ياحلو صبح اهداء للأخ محمود سعد
الأخ العزيز مروان شلبى
الله الله عليك المرة دى احلى شغل انا شخصيا سمعته منك واعتقد ان العمل اللى يعجبنى اوى اكيد عمل رائع
واختلاف رأيى عن رأى اى عضو آخر انى عملت مع عبد الوهاب والسنباطى وبليغ وكلهم 20 سنة شربت فيها فنهم وطريقة تفكيرهم وطريقة حتى اخراجهم للعمل يعنى انت بالنسبة اليك اهم شىء تلاحظه فى اعمالهم ان مفيش آلة مش فى مكانها يعنى عندنا فى الفرقة الماسية كان عندنا احسن عازفين فى الدنيا على الآلات الفردية يعنى القانون والناى والاكورديون والاورج والجيتار والامكانيات كلها متاحة انستعين بأى آلة زى الساكس او الابوا او حتى الهارب لو اراد الملحن لكن لو تلاحظ ان الملحن العملاق كانت الآلات دى موجودة معانا لكن مش بيستعملها كلها يعنى العملية تذوق مش استعمال الموجود وخلاص لذلك تلاحظ شىء خطير اى صولو ناى مثلا الجملة اتخلقت عشان تتعزف على الناى حتى صولو التشيللو تلاقى برضه الجملة مخلوقة شيللو وده يمثل نصف الإبداع الآلة المناسبة فى المكان المناسب بعدين فيه حاجة خطيرة جدا عبد الوهاب مثلا عارف مين الموزعين اللى كانوا متواجدين تحت امره 24 ساعة ؟ اندريا رايدرد وبعده عبد الحليم نويرة وعلى اسماعيل ( على سبيل الفرض كان فيه اكتر ) وتخيل عمالقة الموزعين دول راجع كل الحان عبد الوهاب تلاقى اولا 90% من الحانه مش موزعة وده لأن الجملة اصلا جميلة زى العسل والتوزيع ممكن يضرها وال 10 % الموزعة تلاحظ ان فى كل اللحن جملة واحدة فقط موزعة ولو تدقق فيها تلاقيها معمولة مخصوص عشان تتوزع يعنى بتكون جملة فيها نوت طويلة يبان فيها التوزيع لأنك لو وزعت على جملة سريعة او نوتهت قصيرة التوزيع حايبقى مش حلاوة ولكن خناقة يعنى تحصل تداخلات تضيع طعم ونكهة الجملة الأصلية واخطر شىء الجمهور العربى مش متعود على سماع التوزيع بعكس الجمهور الأوربى اللى بيسمع التوزيع من المهد وفاهم ايه اللى بيتحط على الجملة لأن من شروط ان الجمهور يتذوق التوزيع انه يكون مش مستمع عادى مش حايفهم حاجة ولكن المستمع الدارس او المتفهم حايفهم انتى عملت ايه يعنى الجملة ماشى معاها ايه ويقول ده موزع عبقرى , نيجى لأخطر واهم فى الموضوع اغانى زمان لازم تتقدم زى ماهى بالظبط انت عارف احنا كنا بنعمل على الاغانى الطويلة خمسين بروفة مش عشان نطلعها ولكن عشان يتم عليها آخر تعديل ممكن يعنى مش قابلة للتعديل اكتر من كده وإلا كنا عدلناها , يعنى لو عايز تعمل توزيع لازم يكون محدود جدا يعنى فى جملة واحدة بس مش كل اللحن لأنه مسموع بدون توزيع , انا بيعجبنى الاورج بتاعك السترينجز فيه حلو يعنى متجانس مع كمنجتك واهم شىء التجانس ده عشان لو الصوت مش متجانس تضيع نكهة الكمنجة الجميلة يعنى احب انك لما تعزف كمنجة ترد عليك سترينجز مش آلات غريبة والإياع عندك يجنن حلو جدا , ولو ندرس العمل اللى انت مقدمه هنا اى حد يقول انه رائع لأنك ماخرجتش عن جو محمد قنديل اللى له عشاق بيحبوه , الكلام اللى بقوله ده مهم جدا يعنى الأغانى القديمة دى تراث والتراس ده زى منطقة اثرية عندك مثلا مبنية بالحجر القديم والسائح بييجى من آخر الدنيا عشان يتفرج عبها وهو مذهول تخيل لو ييجى واحد يطورها ويغطى الحجر بالسيراميك الحديث ؟ طبعا هو كده طمس قيمة الأثر واضاع قيمته وماحدش من السواح حايفكر يزوره لأن سحره وروعته راحت , والتراث مش موسيقى وآثار فقط ولكن فى الأكل مثلا يعنى انا جيت سوريا كتير مع كل الفنانين الكبار , وبالذات آخر حفلة غناها عبد الحليم كانت فى مهرجان دمشق الدولى , عندكم اكلات سورية تراثية يعنى مثلا من 1000 سنة ودى الاجانب من ضمن رحلتهم انهم يتذوقوها عشان مفيش زيها فى العالم , وتفردها انها فى شكلها الأصلى تخيل لو ييجى واحد وعايز يطورها وحط عليها الحاجات الحديثة زى الكاتشب والمايونيز والهوت صوص ؟ اكيد تبقى كارثة لأنه هنا مسح القيمة الأصلية للأكلة وخلاها شىء اكيد ردىء ان لم يكن عادى مالوش تميز ,وكمان عجبنى الكورال الجميل يابختك بيهم , انا آسف للإطالة ولكن انتى عندك امكانيات حلوة انا شخصياص مش موجودة عندى يعنى انا بعزف اللحن كله بمفردى ولو تلاحظ ان شغفى بالذات الألحان الصعبة ماعرفش طريقتى تعجبك ولا لأ , اتمنى ان تستفيد من كلامى واشكرك على هذا العمل الرائع وانتظر جديدك وانا كخبير اسألك سؤال يهمك جدا فكر فيه : ياترى ايه الشىء اللى عجبنى المرة دى فى شغلك وخلانى اكتب لك كل الكلام الكتير ده ؟
|
العرض الشجري