العذاب فى الأغنية الشرقية

[حسن كشك]

استاذى الفاضل
دكتور ثروت غنيم
عمنا كلنا واستاذنا
لو سمحتلى اشارك فى الموضوع الجميل الذى قمت حضرتك بأفتتاحه
وهو العذاب فى الحب
كلمات ... ولحن ... وآداء
طبعا بداية لابد من وجود حاله حب حقيقية ... لاحد اطراف القصة الحبيب والمحب ... او الحبيبان
وهناك فرق طبعا .... ففى حاله الحبيب والمحب ... او المحب والمحبوب .... فغالبا حكاية حب من طرف واحد ... وياويل المحب فيها ..... كلها عذاب فى عذاب فى عذاب ...... ولننسى حكاية ان اللى بيحب بيتمنى يشوف حبيبه فى سعاده مع غيره ..... دى كذبه كبيره اوى وما بتحصلش وان حصلت يبقى على رأى المثل الدارج ( قصر ديل يا ازعر ) لان ليس هناك حل تانى الا التمثيل المشرف والهذيمة العاطفية ... ومن العذاب .... تأتى الكلمات التى توجع القلب اما الحبيبان ..... فأن عذابهما يكون من الخارج .... الدنيا والناس والظروف الذين لا يريدون اعطائهم الفرصة لان يكونا معا على الدوام وايضا تأتى الكلمات التى توجع القلب لكن بشكل مختلف .... او الحب المشمول بالغيره الغشيمه التى تأتى من شعور بالنقص لدى طرف من طرفى الحكاية ....
ببساطة يا اخوانا
العذاب فى الغرام ..... له سبب واحد ووحيد ومفيش غيره وهو ( الحرمان )
تقولولى ازاى .... اقول لكم ازاى
تعالوا نشوف كل حاله على حده ممن ذكرتوهم حضراتكم ....
ياطول عذابى ....واشتياقى مابين بعادك والتلاقى .... حرمان من التواجد مع الحبيب دائما
انا والعذاب وهواك عيشين لبعضينا ... اخرتها ايه وياك ياللى انت ناسينا ....حرمان من ان يكون فى بال الحبيب
مين عذبك بتخلصه منى .... وذنبى ايه بتعذب فيا .... اهو ده حب من طرف واحد وحرمان من حب الاخر
انا لن اعود اليك مهما استرحمت دقات قلبى
انت الذى بدأ الملالة والصدود وخان حبى
دى بقى اللى مصيبه .... يعنى المحب وجد الحبيب ..مل منه .... ورفضه .... بل خانه .... يعنى حرمه من كل حقوقه العاطفية .... فقرر ان يبعد بشكل ما من الكرامه .... لان الحدوته مش نافعه خالص
اضنيتنى بالهجر ..... ما اظلمك .... فأرحم عسى الرحمن ان يرحمك ....
محروم ياعينى من جوار الحبيب
لا مش انا اللى ابكى ولا انا اللى اشكى لو ضاع عليا هواك
صرخة بكرامه .... لكن مزيفه .....ولو هذا العاشق صحيح مش همه ....طيب بيلوم حبيبه ليه ....فى الكلام التالى من كام سنه لما دار الهوى بيننا فاكر احنا قلنا ايه
مش دى راحة قلبى ولا ده امل حبى اللى اتفقنا عليه
حرمان فى حرمان من ضياع الهوى وضياع راحة القلب وضياع الامل
كفاية كده احسن الكلمات بتاعة الاغانى اللى توجع القلب بتخلينى اسرح فى معانيها وهتنسينى الموضوع الاصلى
يعنى ببساطة يا اخوان
ان سبب العذاب فى الحب ... هو الحرمان بكافة اشكاله مش اكتر .... فى الاغانى
وانتهى باغنية ام كلثوم( ياظالمنى )
ياظالمنى .... ياهاجرنى .... وقلبى من لقاك محروم
محروم من لقاء الحبيب وابحثوا انتم فى كافة اغانى العذاب ..وستجدوها كما قلت
الحرمان والحرمان فقط
واظن فيه اغنية لمحرم فؤاد اسمها ( محروم )
لكن فيه اغانى جاءت عكسية ..... يعنى ايه
المحبوب هو نفسه اللى شعر بوخذ الضمير ... وعذاب المحب فقرر يريحه من عذابه .... لانه مش قادر يديه الحب والحنان والعطف والتقدير والدفء ( ماهو الحب كل دول واكتر ) فقرر ينهى عذاب المحب بمصارحته بحقيقة شعوره
وكمثال : وخليك معانا ( يافؤاد ياعبد المجيد ) فى اغنية فايزه اعتراف ( او اعتراض )
لازم اقولك .... لازم ادلك.... مش لازم اخدعك
حرام عليا ... اظلمك واشرب حنانك واحرمك
خدتوا بالكم من ( احرمك )
واغنية شادية
ماتهونش عليا .... فين اروح من ذنبك
لاهاتفرح بيا .... ولا هاسعد قلبك
ابعد وانسانى ... ما ارضاش بهوانك
لا انت علشانى ... ولا انا علشانك
ليه تحرم( تظلم ) قلبك فين اروح من ذنبك

بس الحالات دى نادره اوى فى الحب وعذابه
واجمالا ... لما يشعر المحب بقسوة الحرمان وناره ( ربنا مايوريكم ) يطلع همه فى الكلمات التى تحمل كل اللوم لحبيبه ولنفسه ... وتأتينا ملحونه مغناه .... فتنطبق من كثرة حالاتها وتنوعها مع بعض حالات بعضنا .... فتوجعنا ونعشقها ... لانها تتكلم بلسان حالنا ... لكن مع اجادة التعبير