خلاص مسافر ـ اغنيتى المفضله

**ريما** · #1 04/05/2008, 19h17

خلاص مسافر 00مسافر 00مسافر

صحيت فى يوم من الايام حسيت بانى يا عينى غريب

حسيت بغدر الاصحاب وباللى افتكرته حبيب

وانا 00انا 00انا اللى ياما غنيت على الليالى

فى الفرح موال وفى الجرح موال اصبح على دى الحال

غريب اصبح انا غريب غريب ولا حد جنبى قريب

قلت اسافر 000مسافر 00مسافر

وخايفه لما تسافر على البلد الغريب تنسى انك فايت فى بلدك حبيب

مستنى باشواق 000تعبان 00تعبان من الفراق

ومولعلك شمعه نورها مستنيك اهااااااااا وفى عيونه دمعه تمسحها بايديك

لما تجينى تانى 0000تااااااااانى 00اها تانى تانى تانى من بلد الغريب

يومين واسافر يمكن القى الصبر فى سكتى

يمكن القى الراحه فى غربتى 00يومين واسافر

كان نفسى اكون جنبك حبيبه 00حبيبه من بلدك تسهر على راحتك

تفرحلك لفرحك وتقسمك فى جرحك والهم تشيله عنك

لما تجينى تانى 00تانى 00تانى تانى تانى من بلد الغريب

يومين واسافر يمكن القى الصبر فى سكتى يمكن القى الراحه فى غربتى

خايفه تلاقى ورده تحلو فى عنيك تنسانى وتميل تقطفها بايديك

وتجرحك الاشواك وتتعذب هناك 00هناك 00هناك

اقطفها بايديا ومتجرحش ايديك 00سيب الجرح ليا وخلى الفرح ليك

بس ارجعلى تانى تانى 000تانى تانى تانى من بلد الغريب

اغنيه مسافر لشاديه الاغنيه دى باه مرتبطه بيا من الطفوله تقريبا

كان عاده البيوت المصريه زمان ان الراديو يتفتح مخصوص

الساعه خمسه المغرب علشان اغانى ام كلثوم وطبعا انا كطفله

مكنش بيستهوينى اغانى ام كلثوم فكانت متعتى بتبدا من بعد ام كلثوم وعبد الوهاب

وعبد الحليم لبدايه باه شاديه ونجاه وورده وكنت كل يوم تقريبا بنتظر الاغنيه دى

مخصوص واقعد اسمعها بشغف اوى يمكن الاول مكنتش بفهم الكلام

وبكتفى بشجن صوت شاديه فى الاغنيه ان حبيبها مسافر

لكن مع مرور الوقت فهمت الكلمات وحستها اوى

مع صوت شاديه ومع الموسيقى طبعا

وبعتبر الاغنيه دى من اعظم ما غنت شاديه يمكن لحبى للاغنيه معرفش

خلاص مسافر رابط من المنتدى

**ahmedelraghy** · #2 05/05/2008, 00h45

يااااااااااااااااااااااه يا ريما
اغنيتك صعبة اوى اوى
انا بعتبرها الحزن مجسد فى اغنية
بس اختيارك عشرة على عشرة بجد

**غازي الضبع** · #3 05/05/2008, 06h32

العزيزة ريمـــا
أُحييكي على اختيارك الرائع
وذوقك الجميل
الأغنية حقا جميلة
وانا في اشتياق لسماع تحليل موسيقي من الأساتذة الآلاتي وسيادة الرئيس
لكم تحياتي واحترامي

**ريما** · #4 05/05/2008, 07h11

استاذ احمد هو يمكن انا مش بعتبره الاغنيه حزينه

لاكن بعتبرها انها بتجسد قمه الحنيه والحب بين المراه والرجل

وبالذات اخر مقطع

خايفه تلاقى ورده تحلو فى عنيك تنسانى وتميل تقطفها بايديك

وتجرحك الاشواك وتتعذب هناك 00هناك 00هناك

اقطفها بايديا ومتجرحش ايديك 00سيب الجرح ليا وخلى الفرح ليك

بس ارجعلى تانى تانى 000تانى تانى تانى من بلد الغريب

اعتقد مفيش حب اكتر من كدا ومفيش كدا اصلا

استاذ غازى ميرسى على الاطراء يا فندم

واسمحلى احط كرسى جنب حضرتك وانتظر التحليل للاغنيه

**سامية** · #5 05/05/2008, 09h37

خـلاص مسافر
الله يسامحك يا ريما على الاغنية دي
بصراحة انا من عشاق سماعها

الاغنية فعلا حزينة جدا .. وكلامها قوي ومُعبر

أي أغنية فيها سفر ووداع وغٌربة بتأثر فيا جدا
منها الاغنية دي طبعا
يمكن لظروف غُربتي وبُعدي عن وطني وأهلي وحبايبي
وحنيني الدائم لهم
شكرا لذوقك واختيارك يا ريما
ومنتظرة معاكم استاذنا الالاتي
مع خالص تحياتي

**عصفور طاير** · #6 05/05/2008, 14h24

يا سلام عليكي يا ريما وعلى اختياراتك

الأغنية واحدة من درر شادية ومحمد حمزة وبليغ حمدي.. وهي واحدة من أهم اغاني الفراق الساحقة الماحقة، ولها جو كابي كآبي شديد الظلامية.. وفي الحقيقة مش عارف كيف استنبطتي منها الحنية يا ريما، متغاضية عن ما فيها من حزن عميق؟!

وتلك الأغنية في رأيي أخت "قولوا لعين الشمس ما تحماشي" و"ناويين خلاص ع السفر".. وقريبة ونسيبة كل من "والله يا زمن" و"حنة يا حنة" و"آه يا أسمر اللون".. بل وأيضا "غاب القمر يابن عمي".. واجزم أن هذه الأغاني لو اجتمعت على سمع رجل واحد في ليلة واحدة لألقى بنفسه من النافذة..

يسلم ذوقك يا ريما.. وياريت توسعولي حتة جنبكو انتي وأخويا غازي في انتظار أستاذنا الآلاتي.

**الألآتى** · #7 05/05/2008, 19h10

بسم الله نبدأ فى تحليل أغنية ( خلاص مسافر )
كلمات : محمد حمزة
ألحان : بليغ حمدى
غناء : شادية
لمن يريد أن يتعرف على مقام الصبا عن قرب .. لمن يريد أن يعيش طبيعة المقام الحزينة .. فليسمع هذه الأغنية .
أبدع بليغ حمدى فى إختيار هذا المقام ليصوغ منه لحنه .. فالكلمات تعبر عن الأسى والحسرة واليأس ..
وليس هناك أحسن من الصبا ليعبر عنها ..
يتبارى الناى مع الأكورديون فى إظهار ملامح الصبا .. ومع إيقاع السنباطى .. هذا الإيقاع الشرقى الجميل .. تدخل الوتريات لتعزفنفس الجملة اللحنية ..

يبدأ الكورال بالغناء الحر .. غناء بدون إيقاع ..

يغنى الكورال من نفس المقام ( الصبا ) ..

ونتوقف هنا قليلاً مع الكورال ..

هذه المجموعة المعروفة ( محى الدين الخضرى ، عزت الشنطورى ، محمد نصار ، عبد الحليم فاروز .. ألخ )

إسمعوا معى .. كم التناغم والتوافق بين أفراد هذه المجموعة .. إسمعوا الإحساس باللحن .. كل واحد فيهم يشعر أن هذه الأغنية خاصة به ..

تدخل شادية لتغنى .. ونفاجأ بأنها تغنى من مقام البياتى .. وليس الصبا .. شغل ملحنين ..

ويعود الكورال للصبا مرة أخرى .. ( يومين وأسافر .. يمكن ألاقى الصبر فى سكتى ) ..

وتغنى شادية من البياتى أيضاً .. ولكن بجملة لحنية مختلفة ومرتفعة ..

لاحظوا معى .. كيف تغنى ( كان نفسى أكون جنبك حبيبة ) .. وبالتحديد ( كان نفسى أكون ) ..

إنها تغنى بطريقة الأربيج .. أى الإنتقالات الثلاثية .. قفزات لحنية أبدع فيها عمنا بليغ ..

وكورال أخر .. بجملة مختلفة ومن الصبا أيضاً ..

وتغنى شادية أيضاً من البياتى .. ولكن من الجواب ..

إسمعوها أيضاً وهى تغنى ( وتتعذب هناك هناك هناك ) .. تتسحب للصبا .. ثم تغنى ( أقطفها بإيديا وماتجرحش إيديك ) من البياتى ..

حوار جميل وبديع بين مقامى الصبا والبياتى فى تضافر رائع ...

أرجو أن أكون وُفقت فى هذا التحليل المتواضع ..

**غازي الضبع** · #8 05/05/2008, 19h31

يا سلام عليك يا عم محمد يا كبير الآلاتية
الله ينور يا مايسترو

**Egy_LoveR** · #9 09/05/2008, 11h22

أغنية بتأثر فيا جدا.....شكرا للأخت ريما.....
احساس شادية وصوتها واداءها هنا لا يوصف...وبرضه في آه يا أسمراني...الاتنين عذاب وفراق بس هنا شجن عميق وكتير

صبا وبياتي؟ عظمة ! شكرا على التحليل يا أستاذنا

شكرا جزيلا