موسيقى القافلة

[غازي الضبع]

إيه يا عم سمعجي الجمال ده .. والإبداع ده
آه لو سمعك الصغير ولا بعرور
هايعمل معاك عقد لكل شرايطه ..
بس على فكرة الأغنية سهلة لإنها سيات
طيب أنا دلوقتي معايا 128
وريني بقى هاتغنيها إزاي

[سمعجى]

سهلة يا أستاذ غازى

الفيات الفيات الفيات
الفيات

أصلها على نفس الوزن

[محمود]

المشاركة الأصلية كتبت بواسطة سمعجى

بمناسبة ( السيات )
إهداء الى الأستاذ غازى
و متلحنة جاهزة على إيقاع ( العنب العنب العنب )

السيات السيات السيات
السيات

فراملها بتفـَوّت السيات
حوادثها بتمَوِّت السيات

لو ناوى تركبها السيات
روح ودّع احبابك السيات
و لو اتقفل بابها السيات
حسرة على شبابك السيات

السيات السيات السيات
السيات

يا محلا فـُسحتها السيات
للآخرة سِكـّتها السيات
خَرّت كمان زيتها السيات

السيات السيات السيات
السيات

يا مجمّعة الأحباب السيات
زقــّة ينوبكو ثواب السيات
شـُكمانها كله هباب السيات
آخرتها إيه يا عذاب السيات

أول كلامي سلام ..

لا مؤاخذة يا عم كمال بس دي عدت منك. هناك ما يسمى بالجو النفسي للنص. والعنب غير مناسب للجو النفسي الذي أحاط بمغامرة السيد غازي أكرمك الله وإياه. خاصة أن افتتاحية العنب من مقام الهبو وتحتاج لقعدة ونفس طوييييل. لذلك أقترح نسجها على متن قصيدة أخرى من بحر الحافر ومطلعها حاركب السيات .. آه .. واتسيِِت. (للأسف لا تسعفني القريحة من القصيدة الأصلية إلا بالشطر اليتيم الذي نسجت على منواله هاهنا.

كمل انت بقى

مع تحياتي

محمود

[سمعجى]

و مليون تحية ليك يا أستاذ حسن ، لردك على مداخلة
الأستاذ محمد تميمى بخصوص المقهى ، فقد تحدثت بالنيابة
عنـَّا ( ولا بلاش عنـَّا دى ) بالنيابة عنى ، و قلتَ ما كنت أود أن
أقوله ، أحلى سلام و تحية من دمنهور للإسماعيلية
و النقطة دى من سمعجى ( ورقة بمِيَّة ) لأبو على قلب الأسد و سمعنى سلام آمنت بالله

( لمن يهمه الأمر : سلام آمنت بالله المأخوذ عن الأخت لور داكاش
هو أشهر سلام فى الأفراح و الليالى الملاح المصرية )

[غازي الضبع]

هاه
كنا بنقول إيه يا جماعة ؟؟

[صلاح السويفي]

كنــا بنقوووول

وهــانقـــول


أهلا بالأستاذ غــازي

نوّرت مكــانك بالمنتدى


فأعضــاء المنتدى كأزهار البستــان

لكل نكهته ولونه ورائحته..بلاش طعمه

مع تحياتي أخي الفاضل

وأهلا وسهلا في منتداك طبعا

[غازي الضبع]

أهلا بيك يا أستاذ صلاح
المنتدى منوّر بأعضاءه وأهله وناسه
وبستان المنتدى دائما زاهي ومضيء
بأزهاره ووروده
وماءه الذي يروي هذه الأزهار
وشمسه التي تُبعث فيه الحياة
...
إيه الكلام الجامد اللي أنا باقوله ده
! ! !
فينك يا سمعجي ويا عصفور
تيجوا تشوفوني وأنا باقول وباقول
كلامنا في سماعي كلام من نور
وصُحبتنا حلوة ومن غير عزول
...
لا .. لا .. لا
دا فيه حاجة غريبة النهاردة
أنا سِكرت ولا إيه ؟؟

[سمعجى]

أشعِلوا القناديل
و أقيموا الولائم
و مُروا بالجواري ليرقصن في حضرته
و ليوزع الفـَلـَوذج و اللـَّوزِنج على السابلةِ في التكايا
إحتفاءا ً بعودة القائد المُظفـَّر
غازي

[الألآتى]

حمدلله على السلامة ..

عود حميد وعبد المجيد .. أخيراً ياغازى فكّيت الحديد ..

هاهاها .

[غازي الضبع]

المشاركة الأصلية كتبت بواسطة سمعجى

أشعِلوا القناديل

و أقيموا الولائم
و مُروا بالجواري ليرقصن في حضرته
و ليوزع الفـَلـَوذج و اللـَّوزِنج على السابلةِ في التكايا
إحتفاءا ً بعودة القائد المُظفـَّر
غازي

الله .. الله .. الله
عليك يا أديب يا كبير الأدباتية
والله زمان
والله زمان يا سمعجي يا جميل
أقولها للمرة المليون أن أسعد شيء حدث لي في سماعي هي معرفتك وصداقتك يا صاحبي