بشــيــر عيــَّـاد مصـــري / عـــربــي حتي النخاع

[بشير عياد]

بليغ حمدي
****
الميلاد : 7 أكتوبر 1934 م
الرحيل : 13 سبتمبر 1993 م
******
" يا ليل العاشقين " طَوِّل شِوَيَّه
وقسِّمْ ع المقام أنغام شجّية
ودندن بالشجن غِنْوِة مَحَبَّةْ
ودُور بيها على كل الأحبَّة
وشاوِرْ ع الأمل راكبْ حُصَانُهْ
" أمل مصر " اللي جاي سابق زمانه
على جناح الخيال والعبقريّةْ
ياليل العاشقين طوِّل شوِّيَّة

***

بليغ حمدي ، وهُوَّ بليغ في فَنُّهْ
بيمشي ، الفن يمشي جنب مِنُّهْ
معاه مولود وفارش له طريقة
بوَرْدْ وشوك وسهران يحكي عَنُّهْ
بليغ والحبّ مَوَّال الليالي
وأقرب حلم زيّ النجم عالي
ولما الموهبة تملك صاحبها
يهون الصعب وتهون الأسيَّة
ياليل العاشقين طوِّل شوَّيَّةْ

بليغ " موعود " بجرحه وبعذابُهْ
وغُربة رُوحه بتضيّع شبابُهْ
ولو " تخونوه " ح يفضل أوفى ليكم
كتاب مفتوح لأحبابه وصِحَابُهْ
بيحضن عوده ويدندن شجونُهْ
ويكتم شكوته وتضحك عيونُهْ
ويفضل للنغم فارد شراعه
وأمواج الزمن قاسية وعَفِيَّة
ياليل العاشقين طوِّل شوَّيَّة

يا ثومه اتقدّمي وشاوري عليه
وثوري ، وارفضي في " حُبِّ أيه "
وقولي ع الملأ : موهوب حقيقي
و " سيرة الحب " لازم تحلا بيه
ولو كُنَّا " ظلمنا الحُبّ " مَرَّة
" خسارة " وبعدها ح تروح ف نظرة
ولو " فات المَعَاد " فيه " ألف ليلة "
ولو " أنساك " تخاصمني عِينيَّه
ياليل العاشقين طوِّل شوَّيَّه

****

ياليل العاشقين طوِّل وقول لُهْ
يا غنوة حُبّ قَدِّ " الحُبّ كُلُّهْ "
يا متغرّب وقلبك طفل يِحْبِي
في حُضن النيل وبينام تحت ضِلُّهْ
" حبيبتي يا مصر " مهما غَرَّبوني
ومهما جَرَّحوا بالشوق عيوني
أعيش " سَوَّاح " وإنتي جُوَّا قلبي
وتِبقي أَحَنّ من نفسي عَلَيَّا
ياليل العاشقين طوِّل شوَّيَّه

يا " إبنِ النيل " يا طُوفان المشاعر
يا بلبل عصرنا ، يا جميل ، يا شاعر
" أعزّ الناس " ، " بعيد عنَّك " ... أنادي
بلاش تبعد كده ، على أيه مسافر ؟ !
دي مصر بيعشقكْ طيرها ونخيلها
وأشجارها وأهرامها ونيلها
دي مصر بتعشقك وتعيش تحبّك
دي مصر الحبّ والأمّ الوَفيَّة
ياليل العاشيقين طوِّل شِوَّيَّه
****

* مُهداة إلى الأخ العزيز يوسف وليد ، وكلّ محبّي بليغ حمدي بالمنتدى