::: بسم الله الرحمن الرحيم :::
أحبابي الکرام في المنتدي الراقي سماعي في البداية أقدّم لکم قصيدة المجرشة التي حصلت عليها مکتوبة باليد فقرأتها بصعوبة و ها أقدّمها لکم . ( أعلم أن هذا المکان لا يناسب لهذا الموضوع، لکن أري مکانه خالياً ، فأرجو المعذرة و أتمني أن لا يحذفه طاقم الإشراف الکريم فتعبت عليه کثيراً )
المجرشة
للأستاذ ملّا عبود الکرخي
( و يقال أنّ هذا الشعر منسوب لشاعر آخر لا أذکر اسمه و إن شاء الله سأکتب اسمه لکم )
ذبّيت روحي علي الجرش و ادري الجرش ياذيها
ساعة و اکسر المجرشة و العن ابو راعيها
+++
ساعة و اکسر المجرشة و العن ابو السوّاها
اشچم سفينة البالبحر يمشي بعکسها اهواها
ايصير اظلّن يا خلگ متجابلة آنا وياها
کل ما يگيّرها النذل آني بحيلي ابريها
+++
ساعة و اکسر المجرشة بحرگة و اشدّ احزامي
و ارکض ورا الذبها الوکت و انشد علي جسّامي
يغرف ابچمچة لأم عطب و آني الگطب جدّامي
عشره يشارکها ابرحل وحده بمطي يخلّيها
+++
ساعة و اکسر المجرشة و العن ابو استادي لعن
و انصب چواين بالعرب و البس انا اثياب الحزن
دنياک عشرة اتلابست ويّا النذل دبس و دهن
و المثلي و امثالي غدت کاس الصبر تسگيها
+++
ساعة و اکسر المجرشة و اگصد ابو الحملة علي
و اطلب امرادي و انتحب بلچي همومي تنجلي
نار البگلبي اسعرت يا اهل المروّة و تصطلي
ما شفت واحد ينتخي امن اهل الرحم يطفيها
+++
ساعة و اکسر المجرشة و انحر علي طرّة عفچ
بالشط لاذب روحي قصد و اصير مرتع للسمچ
ناصب شرک دهري الي و جزوة و نتّالة و شبچ
من صرت هالابن الزنا لرويحتي معابيها
+++
ساعة و اکسر المجرشة و اسکن ابحيّ المگبرة
اگليبي اليحزن و استچن وحدي و لا عيني تره
او لا من اظلّ ابها القهر و معذّبة و اممرمرة
اگرب لي خطوة لو متت اکرص و انامن بيها
+++
ساعة و اکسر المجرشة و انحر علي افجوج الخله
روحي يهالوادم صفت من کثر همّي امخلخلة
بالفاينة حظّي غرز عندي الميشوم انخله
رابض علي راسي الجذع او بچبيدتي اسلّيها
+++
ساعة و اکسر المجرشة و العن ابو اليجرش بعد
حظّي يهالودّي نزل و الجايفة حظها صعد
سلّمت امري و اسکتت للّي وعدني ابهالوعد
نصبر علي الدنيا غصب للّحد و نباريها
+++
ساعة و اکسر المجرشة و انشد علي امّ البخت
دنياک من قال او بلي يا صاح للشين انتخت
للابتر الاجدع جحش حطّوا علي ظهره الرخت
و المعنگيّة ابهالزمن حطّوا اجلال اعليها
+++
ساعة و اکسر المجرشة و انسف علي راسي نسف
تربان و استادي البعر انتف شعر ذقنه نتف
ويّا المخرّم يا دهر اصبحت متعاضد حلف
تفحم دعاوي ابن المجد و لدعوته اتلبّيها
+++
ساعة و اکسر المجرشة و اضرب علي صدري بصخر
و ابچي و ابچّي المعدنة و اعتب علي فعل الدهر
بلچي اموت و لا اشوف اتچيدني بنت البعر
کلّ المنافع دهرنا لاهل الغدر يرويها
+++
ساعة و اکسر المجرشة و من حيلي ابداً ما اضم
ليلي و نهاري يا عرب الطم علي اخدودي لطم
الناس بالکيف و صفا و آني بهضيمة و السگم
لحّد يا ابو الشارة علي زوج البتول اگضيها
+++
ساعة و اکسر المجرشة و العن ابو الراعي الشلب
و آني اتمّ اممرمرة يا رويحتي شنهو الذنب
اشچم گطاية البالفلا من جوعها ترعي العشب
و دجاجة العميا الدهر تمّن لگط ينطيها
+++
ساعة و اکسر المجرشة و انحر علي اشيوخ الچفل
و اشچي علي امّي جزم چي بلّشتني ابهالرجل
شايب عدم ادرد عبد اسود تفس ارگش عجل
دوّار عنّين الهرم عينه الذگن غاشيها
+++
ساعة و اکسر المجرشة و انحر علي اسلاف اسلبة
من درد شيبان الهرم بلحيته تختل عگربة
من وجهه يتفصّل مدس و الخشم چنّه منصبة
النوح النبي بسفينته سکّان لازم بيها
+++
ساعة و اکسر المجرشة و اشغر انا السابع سمه
و ادعي علي الچان السبب امّي و ابويَ بالعمه
ام گشرة و ام بوز الچلب چي يرضي ربّي امنعّمة
گعّدها باعلي مرتبة و چوخ وزري يچسيها
( أعتقد أن الصحيح هو "جوخ" و ليس "چوخ" ؛ و الجوخ قماش ثمين جداً . دليل علي کلامي هو أننا في الأهواز و في جنوب العراق حيث نبدل الجيم بالياء ، نسمي هذا القماس بالـ " يوخ " و جاء في عتابة قديمة :
هلي ما غدّوا الغدّ بغداهم
و لا مطرودهم منهم غداهم
هلي باليوخ وگّادة غداهم
غدوا ريت الانذال الهم فدا )
+++
ساعة و اکسر المجرشة و زيگي اشگّه للچعب
و انخي بعمامي اللي مضوا وايل و قحطان و کعب
عند ابو گليگل اصبحت بنت العشيرة و العرب
بالعکس بنت الکاولي شيخ اخذت ايداريها
+++
ساعة و اکسر المجرشة و العن ابو راعي الجرش
گعدت يا دادة امّ البخت خلخالها يدوي و يدش
و آني استادي لو زعل يمعش شعر راسي معش
هم هاي دنيا و تنگضي و احساب اکو تاليها
+++
ساعة و اکسر المجرشة بسنوني و امشي پيادة
الباب الحوايج حافية و اشچي له حالي گصادة
و انذر نذر کل ثروتي للگيّم و للسادة
بلچي يفک سجني عجل و لدعوتي ايلبّيها
+++
ساعة و اکسر المجرشة و اسکن مع اسلاف البدو
اسرح و لا اجرش شلب و يشوفني بعينه العدو
يا اهل المجارش و الشلب گوموا علي حظّي انشدوا
ويّاي ايگلّولي الخلگ بسيانة طامس بيها
+++
ساعة و اکسر المجرشة و اضرب علي امتوني ضرب
و العن بو المگير و زفت و المجرشة و يدّة و گطب
استادي اعلي راسي النذل کل ساعة لنّه منتصب
و يگول هذي عبدتي امن السوگ انا شاريها
+++
ساعة و اکسر المجرشة و اشتم اهل کل هالوشر
بقران اجرش ساهرة امن المغرب لوجه الفجر
بالبدلة تسحل و الحبر و التيللي بنت الزفر
شرحة مگرفعة امرعبلة و ملبوسها امحلّيها
+++
ساعة و اکسر المجرشة و اشعل ابو استادي شعل
يزمخ عليّ ابن السچن لو لا شويّة ردت ازل
اتوخّرت بنت العلا و اتجدّمت بنت النذل
طابوگ نايم يا ليلي گام الشگنّگ بيها
+++
ساعة و اکسر المجرشة و لا اشوف بنت البرذعة
همّي يهالوادم کلف فيل و سبع ما يجرعه
بنت الاسافل بربعت طاحت ابخير و معمعة
و بنت الاماجد دهرها بالملعنة ايکاويها
+++
ساعة و اکسر المجرشة و اشتم عمامي و کل هلي
و الساکن ابگاع الخرم و انحر علي اهل الشوملي
طول العمر احصد و الم مکسور وسفة منجلي
ينخش ابذرعاني السفه ابخبز الدخن اگضيها
+++
ساعة و اکسر المجرشة کلّه علي اعناد الرجل
و اطوي الفيافي ماشية ابرجلي شبه طيّ السجل
همّي يهالوادم ثگل ما ينحره حيد الزمل
محور ابگلبي يا عرب و الچبدتي چاويها
+++
ساعة و اکسر المجرشة و البس اهدوم المودة
و الشگرا عگبت لي ورا و صار السبگ للسوده
لا شاة عندي بهالسنة و لا خايفة امن الکودة
و لا عندي للسخرة حمارة و لا احد يکريها
+++
ساعة و اکسر المجرشة و البس الشفغة براسي
و اسکارپيلي الاکچلي و اشگّگک يا مداسي
و البس مثل وحدة افرنجيّة و اذبّ الباسي
ذيچ التکشّف راسها و الطالعات ايديها
+++
ساعة و اکسر المجرشة بحرگة و اعيط ابعيطة
و من راسي انزع فوطتي و البس انا البرنيطة
دنياک خربطها الوکت صارت يول خربيطة
الگرعا صفت و امّ الشعر خلّاقک امساويها
+++
ساعة و اکسر المجرشة و انشد علي امّ البخت
دنياک الي امّ الگمل و الشرحا و الگرعا صفت
هالمال ابو زريبة انعجي بالذيب تفرس اصبحت
و البومة تطرد بالصگر و الزاغ و افخاتيها
+++
ساعة و اکسر المجرشة و انهج علي المنّاوي
ايدي انبرت من هالعمل و الجسم منّي خاوي
هالمال ابو ضريج الدجاجة اليوم تطرد واوي
و المال ابو سوار الچلب بطن النمر يفريها
+++
ساعة و اکسر المجرشة و البس الباس التنتنة
چي فوگ درد الله ، النذل استادي ضربني ابميجنة
بالهيما عطشان الاسد و الهوش معتاش ابهنا
هالمال ابو هدلان للدجلة شرب صافيها
+++
ساعة و اکسر المجرشة و العن ابو کل من جرش
بالشلب اجرش للفجر و اقبض افلوس من دبش
ماخذ الون مال البلابوش ابو الطگعات الجحش
و المعنگيّة بالپليس اتعرگلت رجليها
+++
ساعة و اکسر المجرشة و اصعد علي الطور الجبل
سينا و اناجي مثل ما ناجاه موسي و انذهل
و اشچي له همّي و سوء حظّي جرحي خزّن و الامل
باللي جرحها الچبدتي لا بدّ ان ايداويها
+++
ساعة و اکسر المجرشة و اخطب خطب رثّانة
بلکي استادي يتّعظ و يکف عنّي السانه
تموت الافاعي من سموم العگربة و ذبّانة
ازغيرة حقيرة فجأة هامة اسد تدميها
+++
ساعة و اکسر المجرشة و العن ابو استادي او هله
ايراعي الکيفة الماطلة و النادرة تطرح گلة
الثنيل ابو رطبة الشينة ابهالزمان امدلّلة
و آني الجميلة النادرة بيضة ابحلگي اشويها
+++
ساعة و اکسر المجرشة و انحر علي النمسا و مجر
و اهناک انکر تبّع و قحطان و الطائي و مضر
ترضي يالمسيّر سفينة نوح يا ربّ البشر
عبيّان ابوها اکحيلة و احصان الجرد يشبيها
+++
ساعة و اکسر المجرشة و باستادي لاسوّي العجب
الذنب راس اصبح اسف و الراس اصبح بالذنب
نصبر علي الحصرم غصب لا بد و ان ناکل عنب
ما يصير دوم امغيّمة هم ربّک ايصحّيها
+++
ساعة و اکسر المجرشة و اهتک حياي و الستر
و اصخم استادي ابشحم و الفحم بصخام الجدر
حافظ درس دهري بلئامة و ملعنة و کذب و غدر
الّا العفّة و العفو اعمي الگلب ناسيها
+++
ساعة و اکسر المجرشة و امشي علي اشيوخ النجف
نمر الاشرسي کاسد و نافگ الخرنوب و حشف
لا تعتقد آني علي الدنيا و ان ابدي الاسف
لکن علي حادي الابل غير الّذي حاديها
+++
ساعة و اکسر المجرشة و اکسر انا الرگّيّة
و حبها اطشره بالفلک عن قصد سوء و نيّة
مثل الّذي يداري الماي و شايله بصينيّة
و البنت ابو گريوة دهرنا اصبح ايداريها
+++
ساعة و اکسر المجرشة و الحيته اهلّسها هلس
استادي هالشين الطبع من وجهه يتفصّل مدس
لو يحکموني بالصلب لو يمطروني بالحبس
ما اجوز انا من دعوتي لو لشّتي اغنيها
+++
ساعة و اکسر المجرشة و انحر علي اسلاف اعنزة
و اجمع نساوين البدو و انصب علي حظّي عزه
بنت الّذي برگص اشواذي امکرّمة و امعزّزة
و بنت الاماجد دهرها لا بدّ ان ايکاويها
+++
ساعة و اکسر المجرشة و اخلص من الشدّة و جفه
و العن ابو استادي النغل هالغيرة سز و بدوفه
آني شغلتي الدهر عطّلها و غداها معکرفة
و شغلة البومة اهنم لها و طيّ السجل يطويها
+++
ساعة و اکسر المجرشة و اتبع ملاليح السفن
هاليگطعون الابحر و اسکن انا باقصي المدن
تضرب اللاونطة و دزگن بنت ابن مشوي الاذن
و تفرّک العبدة و عبد گبل الفجر رجليها
+++
ساعة و اکسر المجرشة يا ناس لا تلوموني
البطّيخ ابو کحلا کد سامرلي و افريدوني
و الشجر نافگ هالوکت ريتچ رمد بعيوني
شوفي الدهر امسي حراميها الها حاميها
+++
ساعة و اکسر المجرشة و اخلص من الضيم او قهر
و اضرب البيدا ابليلتي و العن ابو فعل الدهر
عيني تشوف اشعيط و معيط اصبح و حمزة الطبر
و احنيش و افتيش و جرو مترين صاروا بيها
+++
ساعة و اکسر المجرشة و العن ابو هالعيشة
گلبي يهالودّي انکسر امن القهر کسر الشيشة
امن العذبة ذابحني استادي الادب سز ابريشه
سگّمني الملعون الاهل لرويحتي ياذيها
+++
ساعة و اکسر المجرشة و انحر علي الهنديّة
السيف اعمي ابهالمصر و التجرح البرديّة
بنت الحمولة اممرمرة و مترفّهة العاديّة
يحگ لي ادگّن و انتحب و عوينتي اعميها
+++
ساعة و اکسر المجرشة و العن ابو استادي الهبش
لحيته شبه مر چشمچي و شواربه ذيول الکدش
منّ احچي ويّاه ابرفق يکشخ عليّ و ينتفش
باوزعه هالابن الجحش لرويحتي سابيها
+++
ساعة و اکسر المجرشة و انحر علي عنّانة
و ارجع علي هيت و حديثة و اهلي راوة او عانة
ام راس المفلفل حجل و الفتخة و الگردانة
لبست و انا اگشور الشلب لگذيلتي طاميها
+++
ساعة و اکسر المجرشة و انحر علي البو محمّد
ابحيّ العمارة اهناک اصخّم گصّتي و اترمّد
و اشچي علي استادي الابن مشوي الجهامة الادرد
ايعاکس کل وکت شغلتي و کل وکت للخاملة ايماشيها
+++
ساعة و اکسر المجرشة و اگطع من الدنيا الامل
للجرش ما ارجع بعد الّا بابرة يخش جمل
کل يوم ناصب لي عزا استادي النغل مال الثول
عقلي انذهل جسمي نحل روحي السگم لافيها
+++
ساعة و اکسر المجرشة و اصعد ابرجلي للفلک
و اوصل الي سابع سما و بيدي الزمه للملک
من يوم امص جمعي الدهر لاحگ علي عمري و کلک
يعتبر عليّ کل وکت للملعنة يجريها
+++
ساعة و اکسر المجرشة و اشعل ابو اللاموني
و اعتب علي اهلي و عمامي المن زغر عافوني
اهل المجارش يا عرب مرد اللبن مردوني
دهري ما يصفي او لا صفي نفسي ابسگم سابيها
+++
ساعة و اکسر المجرشة و انحر علي اهل الصيرة
و انشد علي اشيوخ العرب اهل الشيم و الغيرة
يرضي الهي بالرفاه العبدة ام خنفيرة
تخدمها حرّة و کل وکت کاس الصبر نسگيها
+++
ساعة و اکسر المجرشة و اخرّبه من کورة
للغزل قصدا همّتي عند النذل منکورة
حظّ المسعدة يا خلگ مثل الذهب من کورة
طالع ، و حظّ الخايبة کل منعنة يراويها
+++
ساعة و اکسر المجرشة و العن ابو الگيّرها
و احرگ ابو کل من ابمنشاره و فاسه انجرها
بعناد هالظالم استادي رويحتي مرمرها
للکفر يا اهل الرحم ابن الزنا ايقرّيها
+++
ساعة و اکسر المجرشة و العن ابو اليگطع مهر
طفلة علي شايب هرم يفطن علي حفر البحر
وصلة سختيانة الوجه و اللحية تشبه للأبر
الله ما يقبل هالبشع لرويحتي سابيها
+++
ساعة و اکسر المجرشة و انحر علي الکرّادي
و الشطرة و القلعة سکر و اخل انا من استادي
بالفواته عذّب مهجتي الظالم و فت افادي
عذّبني بالسبّ و شتم لمرارتي چاويها
+++
ساعة و اکسر المجرشة و انحر علي زاغنيّة
و هبهب و الهويدر و شفتة و بهرز و برگنيّة
لو اذب روحي اببير عميا و الخلص من الدنيّة
تهت و سبت ذبت او متت يا ربّي ما تگضيها
+++
ساعة و اکسر المجرشة و ارکب انا الطيّارة
للفيصليّة و ابو اصخير او عگر و الجعّارة
و ارجع علي اسلاف السعيد ابعفچ و الدغّارة
و اعبيد و العزّة و شمّر و اعتري انخيها
+++
ساعة و اکسر المجرشة و انحر علي بعگوبة
و لا يلعب ابعگلي استادي مثل لعب الطوبة
احلف يمين ابعلي الشرجي التوبة من هالنوبة
ان چان الزم مجرشة بيدي و اجرش بيها
+++
ساعة و اکسر المجرشة و اسکن بأرض الحيرة
اوفق و لا طول العمر ابقي بقهر و الحيرة
حظّي لزگ بيّ مثل ما بالبياض الگيرة
تلزگ و صرنا غصب لام وجه الردي نماشيها
+++
ساعة و اکسر المجرشة و انحر علي السامرّه
کسدت الحلوة ابهالزمن صارت الوکت للمرّة
الفحّام يرضي خالقي شايل ابإيده الدرّة
عالداعية هذا المثل صح يا عمامي بيها
+++
ساعة و اکسر المجرشة و انحر علي الفلّوجة
العدلة النحيفة کاسدة صار الوکت للعوجه
ام وجعة المعقّچ الغبرة طاغية او مطعوجة
بالدگل تذرع شامخة و احسن رجل حاويها
+++
ساعة و اکسر المجرشة و اسکن ابحيّ الحلّة
معدن الشعر و العلم و الحلم و ازيح العلّة
استادي المضعوف البخت ظالم و ادني زلّة
يلخمني لخمة علي حليگي و شفّتي يدميها
+++
ساعة و اکسر المجرشة و انحر علي صنعا اليمن
اطوي الفيافي ماشية يا خلّتي و اترک وطن
جوخ اللوي کاسد و محّد يشتريه امّا الچبن
نافگ و اسفلها غدي ابهذا الزمن عاليها
+++
ساعة و اکسر المجرشة و العن ابو رجلي الهرم
لحيته شبه حزمة کبر و کلنگ آهين الخشم
شفته شبه شفّة بغل امهدولة احدب و الجسم
بالي و عرعرّة برگبته امن الکبر لاويها
+++
ساعة و اکسر المجرشة اتکسّر و امشي بليلة
البغداد للشاعر الکرخي اعتني و احچي له
عنّ التعب و السهر و الجوع او عطش اشچي له
يکتبها بالکرخ الجريدة او للملک يحچيها
++++++++++++++++++++++++++++++++++
أتمني أن تنال إعجابکم و إن رأيتم فيها خطأ لأکون شاکراً لکم إذا أخبرتموني به
أشعار الملا عبود الکرخي
العرض الشجري