البهلـــوان - قصيدة من العامية المصرية - شعر/ وليـــد البــلالـــى

[وليد البلالى]

البهلـــوان
----------

معرفش ليه دايماً بفكر ف الدموع
لما بشوف البهلوان .. لابس وشوشه
دايماً بشوف الحزن ساكن بين رتوشه
نفسى ف يوم أدخل ما بين الوش ..
للوش اللى جوه
وأعرف إيه هوه!
معرفش ليه دايماً بفكر ..
إن أصل الضحكة خنجر ف الضلوع
أو إن أصل الضحكة .. جوع
جوع للحياه من غير نقوش
دايماً بلاقى الحزن ألوان ف الرتوش
فوق الوشوش
و الأصل وش البهلوان

************

نرجع زمان
و نشوف حكاية البهلوان
يمكن نلاقى الحكمة ف الضحكة
و نعرف سرها
كان ياما كان

************

كان ياما كان ...
لما العيون كانت بتنزف م الهوان
كان يملى وشه بضحكته و يقول:
"قبر اللسان هوه الخرس
أوعك تخاف يوم م الكلام
خاف م الخرس"
كان صوت جرس
فارس بيهتف فوق فرس
و لا عمره خاف كرباج حرس .. و لا صولجان
كان بهلوان

************

كان بهلوان ..
يمشى يشخبط ع الحيطان
يرسم تاريخ الضحكة ..
أو أصل الزمان
يرسم وشوش للبهلوان
يرسم وشوش للبهلوان تصرخ تقول:

"موت م الكلام
أوعك تموت يوم م السكوت"
يرسم بيوت
يفُض غزل العنكبوت
"أكرم تموت ..
و أنت رافع كلمتك .. مع ضحكتك
فوق التابوت"
و الأصل ضحكة بهلوان

************

و نقول كمان ..
و الأرض سودة مشققة
كان سيل مطر
و إحنا بنبنى المدرسة .. كان الحجر
و الضحكة نور فوق ف السما
تمحى العمى
تبدر حبوب الحق ف قلوب البشر
تطرح وشوش للبهلوان
الضحكة تطرح بهلوان
و البهلوان .. يضحك كمان
يرسم جنين الضحكة ف جبين الزمان
يرسم كمان ..
يضحك كمان ..
و الأصل ضحكة بهلوان

************

و ف وسط طرطوره المرقع بالليالى
و بالسنين .. و البالونات
و بكل أحلام البنات
دار الزمان .. دار الزمان

************

دار الزمان و ف يوم كبرت
و سألت: "فين البهلوان؟"

ف الدنيا قالوا البهلوان
داير يشخبط ع الحيطان
يرسم تاريخ الضحكة فوق كل البيبان
و ف يوم ..
ف يوم لمحت البهلوان و جريت عليه
و لمحت دمعة ملألأة ف جبين عنيه
و سألته: "ليه؟"
كفِّن دموعه ف ضحكته
و لوِّن عنيه
و بكل أنواع النقوش
فوق الوشوش
جريت إيديه
و ضحك قوى ..
و الحزن رنة ف ضحكته تصرخ تقول:

"ما هو أصل حزن القلب .. ضحكة
و برضه جرح العمر .. ضحكة
الهم .. ضحكة
الدم .. ضحكة
و التراب المُر .. ضحكة
و الضحكة حزن ما ينتهيش
الضحكة طير فوق ف السما
بجناح و ريش
يرقص و هوه بيندبح ..
علشان يعيش ... و يموت بيضحك"

************

و فهمت سر البهلوان
و فهمت سر البهلوان ..
و فهمت برضه إزاى أعيش
جوه الزمان الوغد
و الليل الجبان

************

و لبست بدلة بهلوان
و مشيت أشخبط ع الحيطان
فوق البيبان
أكتب تاريخ كل اللى كان

************

و البهلوان ..
لملم عمره .. ف همه .. ف غمه ..
حطه ف خُرجُه
صبُّه ف دمه
شكِّل منه وش لبكره
وش بيضحك نفس الضحكة
وش بيضحك رغم الحزن
وش ..
بيضحك ..
نفس ..
الضحكة ..
وش ..
بيضحك ..
رغم الحزن
..........
..........
..........

رغم الحزن

الحمـــد للـــه

-----------------