رد: الاغنيه الدينيه ( صوره وايه ) من الحان تلميذ لكم.
الأخ العزيز كمال عواد
انا هنا نفسى اتكلم كتير , والقراء اللى اتعودوا على اسلوبى فى الكتابة , اتعودوا على اسلوبى الغريب شوية بس بيوصل ف الاخر لنتائج جميلة ,
الأول احكى قصة قصيرة اوى مرة اسد شاف راجل وكان عايز ياكله وانتظره ييجى عده لما الراجل جه عند الأسد قال له السلام عليكم الأسد اتكسف ياكله وقال له قول مأثور : لولا سلامك سبق كلامك لأكلت لحمك قبل عظامك .
انا بحكى القصة دى ليه ؟ انا الأول قريت ردك الجميل جدا على معزوفاتى على الكمان 4 مرات , انا عادتى باخد بالى مش كلام الإستحسان او المجاملة لأنى بسمعه كتير , لكن باخد بالى من الكلام التانى حسيت اولا بأسلوبك الجميل الجذاب فى الكتابة وحسيت بمدى حبك لفن الزمن الجميل وده بعكس معظم شباب جيلك , ومدى تشبعك بفن هذا الزمن وشدتنى كلمة انك عصامى موسيقياً , بمعنى انك علمت نفسك ماوقفتش تنتظر سنين لحد ما تلاقى حد يعلمك المهم كلامك دخل دماغى يعنى حسيت انى قدام شخصية تستاهل التقدير والتركيز معها , وتشوقت فعلا انى اسمع اللحن ودخلت هنا وسمعت اللحن وانا عادة لا اجامل زى ماقلت فى حاجتين الفن والطبيخ , اول مابدا اللحن من تانى حرف حسيت عارف لما توصل اسكندرية واول مرة تشم ريحة البحر ؟ حسيت بعبير جميل جاى من زمن الفن الجميل , يعنى البداية مافيهاش الآلات الكهربية اكتر والوش بتاع اليومين دول , ولما سمعت الكورال وهو بيقول الله الله مش عارف ليه جانى احساس ان محمد الكحلاوى حايغنى اغنية جديدة ماسمعتهاش يعنى حسيت بنكهة زى نكهة زمن محمد الكحلاوى , ولفت نظرى بعد كده وانا بسمع الغناء الجميل وابسيط واللزم الجميلة جدا والبسيطة , وكلمة البسيطة دى كلمة خطيرة جدا ارجوك تحطها فى الإعتبار فى الحانك القادمة , لو تلاحظ كل لزم ملحنين زمان العمالقة كانت كده بسيطة وجميلة جدا وبسيطة يعنى مفهومة بسرعة يعنى انت مع المطرب بتمشى بودنك واحاسيسك والازمة اللى بترد عليه جزء خطير ف اللحن يعادل اداء المطرب تماماً مش حاجة كده ترد عليه وخلاص , اقولها تانى لما تسمع المطرب وياخد مشاعرك الازمة اللى بترد عليه لازم تكون بسيطة مفهومة يعنى المستمع يحسها بودنه بسرعة مش محتاجة يسمعها 200 مرة عشان يفهمها وده اسمه السهل الممتنع يعنى السهل الجميل ولكن ماحدش يقدر يعمله غير الموهوب اوى . ولو تلاحظ اليومين اللزم بقت عكس كده بقت تافهة مالهاش معنى لكن صعبة ومكلكعة ( هم فاكرين الفزلكة دى شطارة ) ومن رداءة الازمة انى انا عادل صموئيل شخصيا بسمعها كذا مرة عشان احاول استوعب البيه اللى عاملها عايز يقول ايه , مع ان رياض السنباطى كانت اى لازمة انت بتحس بغنا ام كلثوم فى اصعب اغنية وبتحس باللزمة بسرعة من اول مرة , وللعلم المستمع لما يسمع كوبليه ومش يتابع اللزم استمتاعه بالكوبليه بيسقط لأن الكوبليه عامل زى ماتكون طالع سلم بيتكم كل درجة بتدوس عليها تالية للدرجة السابقة اما لو لازمة مالحقتش تستوعبها بتكون زى درجة مكسورة او مش موجودة شوف يحصل ايه بالذات وانت نازل مش واخد بالك .
فى وسط اللحن اديتنى جو عبدالحليم ومعنى الكلمة دى لما انا شخصياً اقولها ( لتعايشى والتصاقى الشديد بعبد الحليم 7 سنوات ) ان عبد احليم لو كنت سمعته اللحن ده كان ممكن يغنيه , فيه شىء جميل لفت نظرى المطرب جميل جدا وصوته حلو وحساس , يعنى عامل برضه زى مطربى زمن الفن الجميل مش زى بتوع دلوقتى , يعنى صوته الطبيعى مكتمل المكونات ومساحته حلوة يعنى مافلتش منه نغمات زى ما دلوقتى مسموح تفلت نغمات بنسبة 60% وعادى , وكون ان نغمة تفلت من المطرب دى معناها نغمة تطلع خاسة او زايدة دى انا بشبهها لو اكلت طبق كشرى ولقيت فيه زلط ( مالقتش معنى غير كده دلوقتى اصلى برتجل تشبيهاتى مش حافظها مقدماً ) اللى بيغنوا اليومين دول ادائهم عامل زى طبق كشرى فيه زلط كتييييييييييييييييييير , طبعا لفت نظرى المقامات الجميلة اللى انت استعملتها واللى ماحدش بيستعملها خالص , لسبب خطير اقول لك عليه مش احنا بقينا اصحاب ؟
المقامات اللى زى السيكاه ماحدش بقى يستعملها لأنه مقامات بتكشف الجمل الخايبة والملحن الخايب يعنى زمان كانوا بيستعملوها ليه ؟ لأن كل عملاق كان بيطلع منها جمل تهبل لكن دلوقتى الجمل بتطلع اى حاجة والتوزيع ( واقصد الزحمة والدوشة ) بيغطى على الكلام ده يعنى لو شلت التوزيع وسمعت الحملة اصلها ايه حا تلاقيها شكل القط لو وقع فى الترعة وطلع , هنا طبعا لفت نظرى الموزع الجميل يعنى التوزيع الخفيف الجميل اضاف للحن , يعنى الراجل ما اتلفش اللحن بالزحمة والعك زى ما بيعملوا كتير دلوقتى , لأن خلى بالك اهمشىء فى قيمة اللحن اللى تعمله ان المستمع ممكن يدندنه , يعنى يكون فيه الخط اللحنى واضح , ولو اللحن زحمة وحاجات طالعة ونازلة على الفاضى موسيقى عفاريتى يعنى الامستمع الغادى مش حايستوعبه وينساه بسرعة يعنى مايعلقش معاه, واقول لك ايامنا كان المستمع العادى اللى بيسمع بس ومش بيعزف كان بيحفظ اغنية ام كلثوم الجديدة ف اسبوع مع كب حجمها لأن اللحن اولا جميل وثانيا سهل يعنى بيدخل عند المستمع بسهولة , وكلمة بمليون جنيه اقولها لك بصفتك ملحن عجبنى شغلك : ايه السبب الحان زمان بتعيش للأبد والحان دلوقتى بتموت بعد اسبوع ؟ ان الحان دلوقتى الكلكعة الكتير اللى فيها بتخلى المستمع ما يقدرش يحفظها بتطير منه بمجرد تنتهى , لكن لو سمعت انت عمرى مثلا اول مرة كل ماتسمع تلزق حتة تلاقيك حافظها بعد اسبوع , ولما تحفظها تبتدى تكتشف الدرر والجواهر اللى فيها , والله انا لما بسمع الاغانى دى بعد 40 سنة بسمعها لسه بكتشف فيها حاجات خطيرة لأول مرة , وانت حظك حلو يعنى حتى الفيديو المخرج لطيف يعنى ماعملش افراط فى الكادرات زى ما بيعملوا فى الكليبات يعنى يعملوا تغيير فى الصورة 700 كادر فى الثانية مش عارف ليه كده الواحد اولا ما بيلحقش يتفهم الصورة وكمان بتاخده من التركيز فى السمع
آسف للإطالة بس استحملنى انا آخر واحد ممكن تتفهم منه الكلام ده , انا عجبنى اسلوبك فى الكلام , يعنى عبد الوهاب كان راجل مهذب جدا ومهندم جدا يعنى اشيكراجل شفته فى العالم , واشيك فنان فى كلامه , وده للعلم بيدخل فى الحانه يعنى الصفة الشخصية دى بتبقى سائدة عنده فى اى حاجة بيعملها يعنى تحس الحانه شيك اوى ليه دى طبيعته الشخصية , وقبل ما اسمع لحنك من كلامك حسيت ان الانسان اللى ببببببببيتكلم كده اكيد لحنه حايكون مهذب وراقى كده .
كمان لحنك فكرنى بحاجة بس ماتضحكوش بالفراخ البلدى بتاعة زمان يعنى دلوقتى لما تشوف فراخ بلدى عند بتاع الفراخ دى مضروبة يعنى بلدى شكلا لكن مضمونا مش بلدى خالص ليه ؟ لأنها بتاكل مواد كيماوية وسموم عشان تتخن يسرعة , الفراخ البلدى على اصلها كان ايام امى وجدتى بتربيها فى البيت يعنى كانت بتاكل بقايا الاكل اللى احنا بناكله , يعنى اكل صحى نظيف خالى من اى مواد كيماوية او مشبوهة لذلك كان طعمها حاجة مش ممكن تلاقيها دلوقتى , على فكرة ممكن واحد لمض يقول طب ايه اللى جاب سيرة الفراخ فى موضوعنا , على فكرة عندى الرد المفحم السريع , انت قلت انك تشبعت بموسيقى الزمن الجميل اكيد لما تلحن حايطلع منك حاجة حلوة زى الشىء اللى انت تشبعت بيه زى اللى يشرب طول عمره من ماء النيل اكيد حايبقى مصرى اوى , يعنى زى الفراخ البلدى الاصيلة من الشىء اللى بتاكله بيدخل فى تكوينها وتحسه فى طعمها , اما ملحنين الايام دى بيتشبعوا بموسيقى بعض يعنى بيتركوا فن زمان وبيتعلموا من بعض عشان كده الحانهم زى الفراخ اللى بتاكل كيماويات دلوقتى اتمنى يكون الكلام الكتير اللى قلته وصل الى هدفه مع خالص تحياتى على فكرة نسيت اقول العود كان جميل اوى فى اللحن
|