قصر الوهم العالي

**علاء طه ياسين** · #1 10/08/2009, 15h35

إوعي تصدق إني بأحبك
أو باتمني ارجع لك تاني
كان ياما كان وانتهي يا حبيبي
سيبك مني خلاص انساني

قلبي الشجر الطارح ضله
بقا مبيستحملشي مذلة
وانت مجرد كلمة ف غنوة
غصبن عني نطقها لساني

كنت باعيش في خيالي ليالي
ابني ف قصر الوهم العالي
وانت تدوس علي نقطة ضعفي
وانا فاكراك بتضحي عشاني

كنت مبتحبش غير نفسك
ضعفك كان عمال بينافسك
مش شايف غيرك في الدنيا
يعني بكل بساطة أناني

علاء طه ياسين

**Tarek Elemary** · #2 10/08/2009, 15h52

أخيراً يابن يس خرجت من شرنقة العاشق الولهان
أهو كده .... أعجبتنى جداً جداً
بس برضه بتاع بنات و بتتكلم بلسانهن يا خلبوص

**عفاف سليمان** · #3 10/08/2009, 16h08

كنت مبتحبش غير نفسك
ضعفك كان عمال بينافسك
مش شايف غيرك في الدنيا
يعني بكل بساطة أناني
اخى الاستاذ علاء ياسين
كلماتك رقيقه وفى نغم دائم مستمر موسيقى عذب
سلمت يداك وسلمت من كل شر
الصراحه كل مره احلى واحلى من اللى قبلها
الواحد مش عارف يقولك ايه
الله يوفقك
تحياتى لك وللجميع بكل الخير
واوقات طيبه وسعيده
اختكم عفاف

**علاء طه ياسين** · #4 10/08/2009, 16h10

يا طارق بك ..

ربنا يخليك ويبارك لنا ف عمرك ..
وطالما عجبتك ..
تبقي كويسة والحمد لله ..
و الحب ملهوش كبير يا عم طارق ..
وبعدين هاهرب منك فين يعني ..
وانت اخويا الكبير ..
لك مني هذه الزهرة
علاء

**علاء طه ياسين** · #5 10/08/2009, 16h18

أخت النهر المتدفق بالطيبة
الأستاذة عفاف

دائما تأتين باجمل الكلمات التى تجعلني فى كل مره
أشعر أنني شاعر كبير
وتجعلني أنتظر ردودك دائما
وعلي فكره
قصتك كانت السبب في الغنوة دي ..
لك الحب والتقدير
وهذه الوردة

علاء

**عفاف سليمان** · #6 10/08/2009, 16h30

اخى الكريم الاستاذ علاء
انت اللى كلك زوق واحساس متدفق
وقدرت تطلع من القصه هذه الصوره الجميله
التى لو كنت انا حاولت ان ارسمها فلن استطع
وهذه حال بعض الشابات التى يفوتهن قطر الزواج وياملن فى زوج او عريس مناسب حتى يستطيعون ان يكملوا حياتهم
قبل ان تفوتهم وتنتهى دون وجود ذكرى لهم من اولاد يترحمون عليهم او يدعوا لهم
تحياتى واعتذر عن الاطاله
اختك عفاف

**سعدالشرقاوى** · #7 10/08/2009, 18h59

شقيق الروح/علاء ياسين
تصدّق ان انا وكأنلا باشوف علاءولاوّل مرّه
فيها نغمه ماحصلتش منك قبل كده
اسمع دى
قلبي الشجر الطارح ضله
بقا مبيستحملشي مذلة
وانت مجرد كلمة ف غنوة
غصبن عني نطقها لساني

كنت باعيش في خيالي ليالي
ابني ف قصر الوهم العالي
وانت تدوس علي نقطة ضعفي
وانا فاكراك بتضحي عشاني
فيه جمال بعد كده ؟ يمكن لكن عند علاء ياسين

**علاء طه ياسين** · #8 10/08/2009, 19h18

حبيبي وصاحبي وتوأمي
ورفيق دربي
سعد الشرقاوي

طبعا فيه أجمل ..
الأجمل كلامك إنت يا ابو مدحت ..

أما يا سيدي ..النغمة الحلوة دي ..
مستحيل توصل لمستوي أعمالك الرائعة ..
....

ربنا ميحرمنيش منك ..
يا ابو مدحت
يا غالي
....

الوردة دي مني ليك

وكل سنة وانت والأسرة والأهل والأحباب بخير ..

علاء

**NAHID 76** · #9 11/08/2009, 09h59

بسم الله الرحمن الرحيم
الغنائى الرائع علاء ياسين
مبروك علينا الخروج الكبير اللى أشار له الأستاذ طارق
أما الثأر لكرامه المحب رائعه فى كلمات معبره جميله كعادتك
يا أبو أكبر مريدين ومعلقين لك فى بداياتك يا علاء
بس تستاهل وعن حق وجداره
تحياتى

**رائد عبد السلام** · #10 11/08/2009, 11h30

اقتباس:

المشاركة الأصلية كتبت بواسطة علاء طه ياسين

قلبي الشجر الطارح ضله
بقا مبيستحملشي مذلة
وانت مجرد كلمة ف غنوة
غصبن عني نطقها لساني

كنت باعيش في خيالي ليالي
ابني ف قصر الوهم العالي
وانت تدوس علي نقطة ضعفي
وانا فاكراك بتضحي عشاني

كنت مبتحبش غير نفسك
ضعفك كان عمال بينافسك
مش شايف غيرك في الدنيا
يعني بكل بساطة أناني

علاء طه ياسين

كان عمنا جاهين بيقول لعم أعمامنا فؤاد حداد :
أنا أشهر منك وأنت أشعر مني !
فيرد عليه عمنا حدّاد : وأنت أشطر مني علشان بتقص
الشعر بمقص محترف ..

افتكرت الحوارية الفلسفية دي
أثناء قراءتي لواحدة من أغانيك الجميلة

أنت شاعر .....وشاطر
الله ينور ياعلاء