كعب داير

**Tarek Elemary** · #1 05/08/2009, 11h19

أسوان و إدفو يا سمارة
الأقصر معابد و حضارة
كوم أمبو و أبو سمبل أجمل
من النجوم الدوارة
***
و نجع حمادى يا أبطال
سلام لكل بطل شغال
أفوت على الغردقة و أرجع
أقول لقنا الشوق بطال
***
سوهاج تصبح على طهطا
بحب مش شغل أونطه
من البلينا الهوى جارف
واصل لبحرى فى السنطه
***
لا باخبى حبى و لا بادارى
من تانى راجع يا بدارى
أبدر على أسيوط حبى
و اطفى اشواقى ونارى
***
يا منفلوط شوفى قوصية
ديروط شباب مية المية
من ملوى لحد أبو قرقاص
المنيا هنا مستنية
***
صفت اللبن يا سمالوطى
مغاغة وافقت بشروطى
الفشن مال ع الدبابية
يا سويفى مانتش بمبوطى
***
من اللاهون رحت الفيوم
سواقى دايرة يوم ورا يوم
م الواسطى على جرزا نعدى
دهشور تبان فى نهاية اليوم
***
الصف لف شمال و يمين
عنيه تبص على التبين
حُط الرحال نرتاح حبة
حلوان تعدى للبدرشين
***
القلعة لبست فى الخانكة
الوايلى شارك بالشبكة
فى السيدة و مصر عتيقة
حلِّت على الخلق البركة
***
أنا جيت يا عتبة فى معادى
ويايا أزهار الوادى
روض الفرج حَضَن الساحل
حلى الضفاير يا معادى
***
ورد الحدايق كان رايق
ماهو كلنا أخوة شقايق
مصر الجديدة خدت نزهة
يا شبرا أنا دايماً عاشق
***
و شوقى زاد بقى تل كبير
آهين يا ناس من هوى أبوكبير
و قلبى فى الزقازيق زقزق
و الشمس من ميت غمر تغير
***
من السويس قلت يا فايد
يا بور فؤاد حبك زايد
فى بورسعيد شفت تاريخى
لقيتنى للقنطرة عايد
***
من السويس للأدبية
الفنجرى غالية عليَّا
و الطور تشاور تلاقينى
ع الباب و مهرها فى إيديَّا
***
رفح تقولَّك يا زويِّد
أنا فى العريش باشا و سيِّد
يا طابا طلى على نويبع
قابلينى فى الشرم نعيِّد
***
قليوب يا ماشية على قناطر
باسوس و برقاش و الحاجر
بهتيم لبلبيس بتنادى
فى طوخ ملوك جبر الخاطر
***
من بركة السبع قويسنا
و شبين تصبح على إسنا
بسيون على الفجر تجينا
تلاقينا مع طنطا نعسنا
***
زاد الحنين و صرخ شبرا
منصورة يا محلة يا كبرى
دسوق تروق تنده فوه
و الشيخ فى كَفْرُه كتب أوبرا
***
نسيت دموعى مع العياط
من كفر سعد أروح دمياط
شربين فى جمصة بتتعايق
الجربى على راس بره بساط
***
شربين ترجعنى لنبروه
و منوف فى قلب شبين هاتتوه
تلا تروح كفر الزيات
عاشق يا ناس ع الهوى دِلِّوه
***
تيه البارود ياأم الأدهم
يا كوم حمادة النار أرحم
من شوق لحوش عيسى كاوينى
فى شبراخيت صاحى و باحلم
***
رشيد يا بانية المجد قصور
عصفور و شقشق يا دمنهور
إدفينا إدكو مع البيضا
فى الطابية واقفين جنب السور
***
شال السيوف ع المعمورة
سيدى بشر ظهرت فى الصورة
يامندرة خبى عيونك
دى اسكندرية شمندورة
***
سموحة سيدى جابر حاير
يا رشدى و النورس طاير
الشاطبى ع المرسى يمسى
قبارى يا أحلى عشاير
***
عامرية مكس على العجمى
كوبرى التاريخ حافظ إسمى
حمام يا ضبعة و علمينك
هنا التاريخ شاهد رسمى
***
مطروح بتحضن فى السلوم
يا سيوة نادى بصوت مكتوم
على الفرافرة و على سينا
بلح باريس يحلى مع الصوم
***
أهى دى نجومك يا بلادى
زهور و مبدورة فـ وادى
يحلى الغنى مع بلدينا
يحلى الندا لما تنادى

**علاء طه ياسين** · #2 05/08/2009, 12h25

أخي الكبير
طارق العمري

لفيت معاك مصر شارع شارع ..
وحارة حارة ..
وقرية قرية ..
ومدينة مدينة ..

تسلم أياديك ..
علاء

**ناصر دويدار** · #3 05/08/2009, 20h46

الأنسان الجميل والشاعر المحترم الأخ طارق العمرى
كلام قصيدتك جميل جداً لكن عشان نوصل بعضينا لحالة قصوة
من حالات الجمال
عندى شوية ملاحيظ أرجو أن تتقبلهم بحب وود وأحترام منى أولاً كعب داير مفهومها عند وعينا أنها للحرامية وأرباب السوابق هذه ملحوظة أولى
والقصيدة هى تغنى بجمال مصر فلا يجوز أن يكون التغنى بالجمال كعب داير دى حاجة
الحاجة التانية أن صلاح جاهين حدد هو عايز يغنى فى ايه لما قال أحسن ناس وفؤاد حداد لما قال تعالى نلضم أسامينا كان محدد بردوا ده حتى ريكو لما غنى السيدة كان محدد انا شايف طوب جميل كل طوبة لون زى ما تكون عمارة جميلة لكن الوانها غير متسقة يعنى انا بغنى لمصر كلها دخلت على القاهرة اتكلمت عن مناطق فى القاهرة رحت شمال طلعت يمين فى الأخر انا حسيت انك عايز ترص طوب عشان تبنى بيه عمارة خمسين دور طبعاً المزيكا رائعة وفى رباعيات جميلة وفى رباعيات تانية ملوية قفلتها لكن عمل فيه مجهود وانا بشكرك جداً وتقبل منى حبى وأحترامى وتقديرى
أخوك ...
ناصر دويدار

**Tarek Elemary** · #4 05/08/2009, 21h52

الصديق و الأخ الصعيدى البكر قبل أى تعديل ,,,,, بخيره يعنى علاء يس
تحياتى و تقديرى و الشكر الواجب بما يليق بك دوماً
المبدع الأهلاوى الرائع ناصر دويدار
أولا معك حق فى العنوان و كان ممكن أتلائم و أقولك إن الحرامى و السوابق يدور معه عسكرى يداً بيد و قدماً بقدم و ممكن ناخد دور العسكر مش الحرامية

و لكن الطيب أحسن و واحد صفر فى الشوط الأول
ثانياً الترتيب واضح يا صديقى و باين عليك ما لفيتش مصر (أخوك رحالة) خللى بالك كده تلاقى دى رحلة النيل من الجنوب للشمال و معه قطار الصعيد من أسوان حتى القاهرة و لكن عرج على الغردقة و عاد و دار شرقاً لمدن القناة و شرق الدلتا و سيناء و عاد ثم حتى طنطا فدمياط و كفر الشيخ و وسط الدلتا و عاد لكفر الزيات و أكمل حتى الحدود مع ليبيا فجنوباً لسيوة فالواحات (و إكتشف أن مصر كروية)

كده واحد واحد بعد الشوطين

حضَّر نفسك لركلات الترجيح يا معلم

**علاء قدرى** · #5 05/08/2009, 23h37

صديقى الشاعر الجميل طارق(الرحالة)
جميلة جدا الرحلة
واجمل منها كلماتك البديعة ؛ ووصف المدن التى اجهل منها على الاخص وجه قبلى الذى نرى شخصيته فى رجالة التى تملا كل مكان فى مصر تبحث بجد و اخلاص عن لقمة العيش ؛ فاعرف ظنا لا يقينا طباع اهل الصعيد من تعاملى معهم
رحلة جميلة ؛ ووصف اجمل ؛ ولست مع اخى وصديقى المبدع ناصر دويدار الذى احبه كنفسى سوى فى اختيار العنوان لانه يوحى بالوجه الاخر ؛ وكدة تعادل ؛ وفيه وقت اضافى ؛ وضربات جزاء ؛ وعلى فكرة الحكم حتلاقية واخد رشوة على راى عم سعد الشرقاوى ؛ وارى ان تقام المبارة فى ارض محايدة (سويسرا مثلا ) او يستضيف المبارة استاذنا الكبير ابو زهده فى كندا
مجهود جميل يا فنان والاختلاف فى الراى ظاهرة صحية ؛ وقد تكون ميزة اضافية فى منتدانا الحبيب سماعى الذى نال احترام الجميع؛ وصار مثلا تحلم به جميع المنتديات
منتظر صافرة البدا لابداع جديد

**unicorn** · #6 06/08/2009, 00h48

اخى و صديقى طارق ,
أنا ليا ملحوظة صغنطوطة زعلتنى منك أوى أوى , و يمكن يبقى فيها قعدة عرب و غدوة لحمة غرامة,
لييييييييييه ما ربطش الشطرة الرابعة من كل رباعية بباقى الرباعيات و وحدت قافيتها مع زميلاتها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كانت هاتفرق كتيييير معانا و معاك , و كنت هاتبقى مبسوط و احنا مبسوطين و زميلنا ناصر دويدار اللى معجبهوش عدم الارتباط كان هاينبسط اوى كمان ,
ليه ؟؟ ها ؟؟ عيب و لا مش عيب ؟؟
هاتعمل كدة تانى ؟؟؟
خلاص يا باشا سماح النوبة , و ما فيش غرامة
جميلة القصيدة يا عم طارق يا مملكة ,
أول ما ذكرتنى ذكرتنى برائعة فؤاد حداد الفل و الياسمين , الذى نتمنى أن نراك مثله و على دربه.
تحياتى يا صديقى الذى أحبه.

**خليـل زيـدان** · #7 06/08/2009, 01h05

حمــــداً لله على الســلامة

**ناصر دويدار** · #8 06/08/2009, 01h22

بص يا طاروقة
؛؛؛؛؛
أنا مش عايز مدرس جغرافيا
؛؛؛؛؛
انا كان قصدى أن ده كله مجهود
رهيب فى اللف والدوران
؛؛؛؛؛
انا لسه مصمم أن الأرابيسك
اللى أنت عامله ممكن كل رباعية
تبقى إحتفالية بالبلد اللى بتتكلم عنها
؛؛؛؛؛
وواضح جـــداً أنك لافف وعارف
لكن بصراحة أنا أكتر حاجة عجبانى
أنك فعلاً بتتكلم على مُدن وبلاد أنت فعلاً
أنك شفتها وعارفها
؛؛؛؛؛
على العموم دى ضربة جزاء
أنا شوطتها نكمل الخمسة ولا واحدة وواحدة
؛؛؛؛؛
تقبل تحياتى وإحترامى وتقديرى

**Tarek Elemary** · #9 06/08/2009, 07h18

اقتباس:

المشاركة الأصلية كتبت بواسطة unicorn

اخى و صديقى طارق ,

أنا ليا ملحوظة صغنطوطة زعلتنى منك أوى أوى , و يمكن يبقى فيها قعدة عرب و غدوة لحمة غرامة,
لييييييييييه ما ربطش الشطرة الرابعة من كل رباعية بباقى الرباعيات و وحدت قافيتها مع زميلاتها ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
كانت هاتفرق كتيييير معانا و معاك , و كنت هاتبقى مبسوط و احنا مبسوطين و زميلنا ناصر دويدار اللى معجبهوش عدم الارتباط كان هاينبسط اوى كمان ,
ليه ؟؟ ها ؟؟ عيب و لا مش عيب ؟؟
هاتعمل كدة تانى ؟؟؟
خلاص يا باشا سماح النوبة , و ما فيش غرامة
جميلة القصيدة يا عم طارق يا مملكة ,
أول ما ذكرتنى ذكرتنى برائعة فؤاد حداد الفل و الياسمين , الذى نتمنى أن نراك مثله و على دربه.
تحياتى يا صديقى الذى أحبه.

صديقى الرائع أبو مندور
يعلم الله أنك من جوائز الإشتراك بهذا المنتدى الزاخر بالدر الثمين
و لا أختلف معك نهائياً مع إستعدادى التام للغرامة ليس فقط تأديباً و تهذيباً لكن من باب العيش و الملح و التآلف ..... و إطعم الفم ..

عموماً نحاول نصيغها تانى بشكل تانى ورانا أيه .... على رأى داليدا

**Tarek Elemary** · #10 06/08/2009, 07h30

اقتباس:

المشاركة الأصلية كتبت بواسطة علاء قدرى

صديقى الشاعر الجميل طارق(الرحالة)
جميلة جدا الرحلة
واجمل منها كلماتك البديعة ؛ ووصف المدن التى اجهل منها على الاخص وجه قبلى الذى نرى شخصيته فى رجالة التى تملا كل مكان فى مصر تبحث بجد و اخلاص عن لقمة العيش ؛ فاعرف ظنا لا يقينا طباع اهل الصعيد من تعاملى معهم
رحلة جميلة ؛ ووصف اجمل ؛ ولست مع اخى وصديقى المبدع ناصر دويدار الذى احبه كنفسى سوى فى اختيار العنوان لانه يوحى بالوجه الاخر ؛ وكدة تعادل ؛ وفيه وقت اضافى ؛ وضربات جزاء ؛ وعلى فكرة الحكم حتلاقية واخد رشوة على راى عم سعد الشرقاوى ؛ وارى ان تقام المبارة فى ارض محايدة (سويسرا مثلا ) او يستضيف المبارة استاذنا الكبير ابو زهده فى كندا
مجهود جميل يا فنان والاختلاف فى الراى ظاهرة صحية ؛ وقد تكون ميزة اضافية فى منتدانا الحبيب سماعى الذى نال احترام الجميع؛ وصار مثلا تحلم به جميع المنتديات
منتظر صافرة البدا لابداع جديد

الصديق القريب للنفس و القلب علاء أبوكريم (مش حسن شحاته)
قد تعرفنى يا صديقى أنا على أتم الإستعداد للإختلاف فى الرأى مع سكان مصر جميعاً دون أن يتأثر ودهم داخلى قيد أنملة فى ذات الآن، فاحترام من يختلف معك مقدم على مجرد كسب جولة فى نقاش حول موضوع أو فكرة أو رأى يمضى لحاله و يبقى من تختلف معه أبقى و أحق بكسبه هو فلا مكاسب فردية فى حوار بنَّاء ساعة إذٍ تكون المكاسب جماعية و للطرفين على حدٍ سواء
أما المباراة الفاصلة فنحن على أتم إستعداد للعبها فى أى مكان ماعدا جنوب إفريقيا و أبو دويدار فاهم ليه