قصائد قصيرة

**ناصر دويدار** · #1 14/07/2009, 11h24

(ولــــــــــــــــــــد)

ما بتباتشى ف قلبه
حاجة وحشة لحد
ولو جات الليالى عليه
بيزرع سقف روحه ورد
ويصحى الصبح وكأنه
بيملك وحده كل الأرض

(ولــــــد تـــــانى)

ما تعاتبونيش ع اللى ما قدرتش أصونه
ماهو كلكم بتخونوا

(ولــــد تــــــالت)

من كتر قلبه ما أتعبى كلام
وشه أتحول لعلامة أستفهام

(ولـــــد رابــــع)

أنا أكبر قصيدة شعر فى بلادى
يسبقنى تروماى تسبقنى عربية كارو
يسبقنى طبال
عـــــــــــــــــــــــــادى
أنا أكبر قصــيــــدة شعر فى بلادى

(بلكونـــــــــــــة)

زارع ف بلكونة عيونى ورد
عشان ما أشوفش هجوم طيور البرد
عشان ما أشوفش الليل للنهار بيشد
عشان ما أشوفش الدنيا بتذل حـــد
زارع ف بلكونة عيونى ورد
مع أنى جرح كبير ماشى على الأرض

(نعنــــــــــــــاع)

ف القلب لسه مــســـاع
يدخله عود نعناع
أخضر يطرى القلب
ويقسمه أرباع
وكل ربع يشيل
شوية م الأوجــــــــاع

(حــــــــــــصـان)

لما الزمن بيدور
على حصان مغرور
تلقاه خرج م السبق
وعلقوه ف حنطور

(حــــــــــــــمـار)

حرك ودانك
يمينك شمالك
وأرفص ونهق
ماهو ده زمانـــــك

(حـــــــزيـــــــــن)

حزين جـــداً
حزين خــالص
حزين فعلاً
سبب تافه لأحزانى
وقفت أشب يم البحر
أشوف ضلى
ولما رجعت ما لاقيتنيش
لاقتنى بس واحد تانى
كان قاعد وبيعيط
على واحد وقف مرة يشوف ضله
ماجاش تـــــــــــــانــى

(كــــــــــــــــدب)

مع أنها كدابة
وعارف أنها كدابة
ومتأكد أنها كدابة
لكن ساعات وأنا المايسترو الكبير
عازف جميع الآلات
بحب أسمع صوت الربابة

**Tarek Elemary** · #2 14/07/2009, 16h39

أهلا بك أيها المبدع

جميلة هى كلماتك و لازعة هى أطراف سوطك و صارخ جدا صرير القلم
كسبناك هاهنا و سعادتى بك تكتمل بدوام العطاء

**سمعجى** · #3 14/07/2009, 16h46

يا بن اللذينـَة !!

إزيّك يا عم ناصر " يا شاعِر الوَجَع و الناس "
طبعاً ما نتاش عارِفني " هاسيبَك لفهلوتك "

محسوبك " حبيبك القديم " ،، شريكك في حواري الشِعر ، و رفيقك في درب كفاح الكلمة

و لا تتصور فرحتي عندما طالعتُ اسمك

بعد إذنك " باعتباري معايا شوية صلاحيات هنا " ، فقد نقلتُ قصيدتك إلى مكانِها الصحيح ،، كما قمتُ بتعديل تنسيق الصفحة ، و تكبير الخط

هِنا بقى يا عم ناصر ،، شعراء عاميّة على كيف كيفك ،،
عمنا الكبير أوي " سيد ابو زهدة " ،، شاعِر على درجة " صاحب مدرسة " ،، و شاعِر " جـُوَّاني " يلتقط ما لا نراه و لكن نـُحِسّه " رائد عبد السلام " ،،و أخونا الرائع " طارق العمري " ،، و الشاعر صاحب النكهة الأصيلة " سعد الشرقاوي " ، و الرقيق الحسّاس" محمد السلاموني " ،،

و لمن لا يعرِف ،، فناصِر دويدار صاحب اسمٍ كبير في كتابة العامية ،، و صاحب تجربة حقيقية في الكتابة ،، و موضوعه في الحياة " هو الشِعر " ،، و مكانه المُفضـّل ، هو الوقوف على يسار " الدنيــا " مثل أى شاعر جاد ، يحمل هموم الناس ، و يعبّر عنهم .. له صوته الخاص ، و شخصيته الواضحة في الكِتابة

نـَشـَأ في " دمنهور " أبـّاً عن جد ،، و يعيش في القاهرة منذ
عشرين عاماً ، و أعدَّ الكثير من البرامج الإذاعيّة ، و يعمل في إذاعة صوت العرب ، و الشباب و الرياضة

أرحب به بيننا ،، و أتركه ليتذكرني " عَلى مَهلـُه "
" أنا مسَمِّي نفسي ـ سَمَعجي ـ هنا يا عم ناصر ،، عشان الدَّيَّانة
و الجَماعة بتوع تنفيذ الأحكام "

**ناصر دويدار** · #4 14/07/2009, 16h57

يا حبيب قلبى يا كيمو
أنا جيتلك عشان نكمل اللى أحنا بدأناه 0
وأنا الشئ الوحيد اللى خلانى أدخل على الموقع ده
إن علاء قدرى قالى إن كمال بيمارس أبداعه من جديد
وطبعاً لـــســـه مشوووووووار الحياة شايل لنا وقفات
ومشوارنا خطوة وعمرها ما حتنقضى
حــــــــــــــبيبـــــــــى يا ..... كيمووووو

**علاء قدرى** · #5 14/07/2009, 17h28

اخى و صديقى العزيز ناصر دويدار
شكرا لك لقبولك الدعوة للانضمام الى منتدانا العزيز (سماعى) ؛ لا تدرك مدى سعادتى لقبولك تلك الدعوه على اثر مقابلتنا بالامس ؛ فالمنتدى هنا كالمصباح ؛ يجذب اليه كل فراشات الادب ؛ فكان لابد سيدى وان تكون بيننا شاعرا قديرا ؛ و مثقفا مستنيرا ؛ وناقدا بصيرا ؛ لما لا وانت ثلاثون عاما من الشعر الاصيل؛ والابداع الجميل
على فكرة سمعجى هنا حبيبك ؛ و صديقك الاستاذ كمال عبد الرحمن؛
اهلا بك يا شاعرا من الطراز التقيل؛ واهلا بشلال ابداعك

**د أنس البن** · #6 14/07/2009, 18h03

نعم .. أيوه .. أكيد
كسبنا شاعر جديد
أول كلامه كأنه
عرفنى وهوه بعيد
يا للا يا ناصر يا شاعر
إعزف وغنى وعيد

**حمدي السمر** · #7 14/07/2009, 18h10

انا بعتبر نفسي من المحظوظين جدا
بي وجودي مع عمالقة الكلمة ...
التحية للشعار الكبير ناصر ... ولك مبدعين سماعي

**ناصر دويدار** · #8 14/07/2009, 18h19

شكراً يا دكتور أنــــس
حاسس معاك بالونس
الشعر حب وحرية
وعيون وصوت الجرس
وأنـــــا معاك راح أكون
حـــــــــــرس

**ناصر دويدار** · #9 14/07/2009, 18h24

أشكرك يا جميل
أنت شاعـــــــــــر بجد ومستنى منك أشعارك يا حمدى

**عمر زهران** · #10 14/07/2009, 23h47

انت المهم والاهم وانت الحقيقة والوهم
شعرك قضية دنيتى وانا بعذابك متهم
الله عليك وعلى الابداع يا أ.ناصر يا جاهين
دى وردة منى وكان بودى ابعتلك حديقة بأكملها على الكلام الجميل ده ومنتظرين منك الأبداع القادم
عمر زهران