في حضنك باستخبي

**علاء طه ياسين** · #1 03/07/2009, 14h46

حبيت مبقولشي لأه
وقلبي ف كل دقة
بيزيد إحساس ورقة
وكل مشاعره ليكي
... ...
حبيتك شهرزاد
حدوتة ف ليل حصاد
غاوية تلف البلاد
تقول للناس عليكي
... ...
حبيتك نبع صافى
وضمة حضن دافى
وشمس تقول عوافي
علي طلة عنيكي
... ...
حبيتك حبة حبة
وف حضنك باستخبي
وأزهار المحبة
راشة العطر ف ايديكي
... ...
بابدأ يومي بحبك
واختم يومي بحبك
وباعيش بنبض قلبك
وباحسب عمري بيكي
...
..
.
علاء ياسين

**NAHID 76** · #2 03/07/2009, 15h12

بسم الله الرحمن الرحيم
الشاعر الغنائى علاء يا سين
اليوم كلماتك غايه فى السرعه والرشاقه والقفز
فأنا اراها أمام عينى تثب وتقفز هنا وهناك
سريعة الايقاع بالدرجه
أما تصورى لمن يغنيها هذه المره
مش حتصدق
عبد الحليم حافظ
وأعتقد انه غنى شيئ يشبه ذلك
أحضرونا ايها الساده الشعراء
تحياتى

**حمدي السمر** · #3 03/07/2009, 15h34

اقتباس:

المشاركة الأصلية كتبت بواسطة علاء طه ياسين

... ...
بابدأ يومي بحبك
واختم يومي بحبك
وباعيش بنبض قلبك
وباحسب عمري بيكي
...
..
.

علاء ياسين

وانا ببدا يومي هنا ...
بان اتذوق واتشرّب هذا الجمال ...
دمت لنا استاذي ... علاء يا سين

**علاء طه ياسين** · #4 03/07/2009, 15h40

حبيتك والسنين
ف عنيكي الدبلانين
خلت عيون ياسين
بيموتوا يا حلوة فيكي

حبيتك والحنين
ف شفايف عطشانين
نساني أنا مين
وحابب حبي ليكي

حبيتك نسمه هاله
وشمس جريئة طاله
وموجة بحر خلي
مراكبي تروح إليكي
...
..
.

مدام / ناهد
يارائعة الردود والوجود

عبد الحليم حافظ ..
احنا فين يا ناهد هانم ..
واللي كانوا بيكتبوا لعبد الحليم فين ..
انا يدوبك علي شط بحورهم ..

مدام ناهد
يا مدهشة الطلة

كلماتك الرقيقة بتأسرني بحلاوتها ..

مش عارف أقولك ايه ..

جميلٌ لا نستطيع رده ..
وأفضال علينا منك لا تعد ..
لك مني تحية يحملها قمر يسافر في براري الياسمين ..
ولك مني سلام يحمله عصفور يحلق فوق سنابل قمح خضراء ..
ودمتي بصحة وعافية ..
علاء

**علاء طه ياسين** · #5 03/07/2009, 15h45

الأستاذ الرقيق المشاعر
حمدي السمر

أشكر لك مشاعرك الرقيقة وتشجيعي ..
ولكن يا اخي أين كتاباتك أنت
نريد أن نري لك شيئا
ينتعش المنتدي بوجودك مع وجودنا
لك مني كل تمنيات طيبة

علاء

**سعدالشرقاوى** · #6 03/07/2009, 21h24

شقيقى/علاء ياسين
رائع
رائع
حبيتك شهرزاد
حدوتة ف ليل حصاد
غاوية تلف البلاد
تقول للناس عليكي
... ...
حبيتك نبع صافى
وضمة حضن دافى
وشمس تقول عوافي
علي طلة عنيكي

محتاجه مداخلات شعريه
بس والله الاخت عفاف عكننت عليه
لى معك عوده
تسلم الايادى يابو ياسين

**Tarek Elemary** · #7 04/07/2009, 09h34

ناهد هانم ست الكل
فعلا عبدالحليم غنى رائعة الأبنودى ((الهوى هوايا)) و هى على نفس الشاكلة و علاء بلديات الأبنودى ((صعايدة)) يعنى ... و التطور الطبيعى للحاجة الحلوة إن علاء بكلماته الجميلة و معانيه الحلوة و موسيقاه الرائعة يكون من أكثر كتاب الأغنية فى مصر شهرة و الله و بدون مجاملة.
لكن باقية يا علاء و مصيرك يوم تاخد حقك

**علاء طه ياسين** · #8 04/07/2009, 10h51

توأمي الرائع وحبيبي وأخي الذي لم تلده أمي
سعد الشرقاوي

مستني مداخلاتك الشعرية معايا
ومدام عفاف عكننت عليك ليه
دي ممتازة جدا
ولا يمكن العكننة إنها ناوية تسيب المنتدي
هترجع يا حاج سعد
صدقني هترجع
هنا بيتها زي ما هو بيتنا
هي بس زعلانة شويتين وهتروق إن شاء الله
وأنا باوجه لها رجاء بالعودة
ولنا عودة
علاء ياسين

**علاء طه ياسين** · #9 04/07/2009, 11h13

الوالد الحنون
مصطفي زقزوق

أحس بنفحات علوية يا سيدي الفاضل حين تتكلم أنت ..
وكلامك وسام علي صدري ..
أعتز به .. وأفخر ..
لا تحرمنا من إطلالتك الصافية العذبة ..
وشكرا لك ..

علاء ياسين

**علاء طه ياسين** · #10 04/07/2009, 11h25

الأخ الكبير
طارق العمري

أنت تعلم كم أحبك
وكم أعتز برأيك الذي لا يجامل
وأشكر لك ما تفضلت به من كلام جميل
في حقي
وبعدين بالبلدي كده
انا من غيركم ولا حاجة
ومن غير تشجيعكم
ولا أقدر أكتب كلمة واحدة
إنتم أهلي واخواتي
وعالمي اللي باحس فيه بالراحة والسعادة

والله يا طارق بك
كلكم هنا ناس أفاضل
أنا بجد سعيد جدا لأني معاكم
ويكفيني كلمة حلوة لو أجدت
وعتاب ونقد لو أخفقت

حبيتك م البداية
وهاحبك للنهاية
ومش هاقول كفاية
وهاموت مابين ايديكي

علاء ياسين