فؤاد حداد شاعر شعراء العاميه

[MOHAMED ALY]

و انتهت هذه الجولة من الصراع العربى الاسرائيلى باندحار للجيش الاسرائيل بعد ان مرمغ ابطال المقاومة اللبنانية انف الصهاينة فى التراب...... و لكن تابى كل قوى الشر فى العالم الا ان تحاول ان تجهض ما حققته المقاومة ... فتلتف عليها مرة بقرارات مجلس الامن ( القومى الامريكى ) .... و مرة اخرى بتصريحات و مواقف حكماء الانبطاح ..... و ان شاء الله لن تفلح هذه القوى فى الالتفاف على ما حققته المقاومة ..... و لكن اخشى ما نخشاه ان تفلح محاولات الوقيعة لشق الصف اللبنانى ........و منذ اكثر من ثلاثين عاما كتب شاعرنا الراحل / فؤاد حداد هذه الابيات الى اهلنا فى لبنان

الخل الوفى
________

يا ابو الخل
و ليه بتخل
بحق الخل
على الخلان

احنا اصحابك كنا كتير
كنا بنجرى و كنا نطير
ما كان فينا سر فى بير
ما فينا صغـــــير و كبير
كنا الواحد مثل الكل
و يا ابو الخل ...

يا مالك فى القلب كنوز
سمعنا غنــــــوة فيروز
و احكى لنا قصة تموز
ما بيــصح و ما بيجوز
بتشــــــوفنا تفلق و تفل
و يا ابو الخل ...

عين الحــــر تلاقى العين
يا حر و اخلاقــــــك زين
لا تسمع لغراب الــــبين
احنا واحد ما احنا اتنين
الفرقة بتقتل و تعـــــــــل
و يا ابو الخل ...

يا ضاحك تحت الطربوش
غيرك جدو ما نحبــــوش
اسم الله فى بيتك منقوش
و بساطه لضيفك مفروش
فيه الضى و فيه الــــــظل
و يا ابو الخل ...

كنا بنقعد فى البستان
و الجنة ريحة لبنان
غنى و احلم بالانسان
و البدر فى ليلة نيسان
و الايام الحلوة تهــــل
و يا ابو الخل ...

يا ابو الخل
و ليه بتخل
بحق الخل
على الخلان

[MOHAMED ALY]

فى سنة 1964 بدأ فؤاد حداد فى كتابة ديوانه الشهير ( المسحراتى ) ...تلك الشخصية الرمضانية التى توقظ الناس للسحور. و قد حولها الشاعر فؤاد حداد من نداء لايقاظ الناس الى دعوة لايقاظ الوطن و الضمائر و الهمم . و قد كتب فؤاد حداد تحت هذا العنوان 111 قصيدة جمعت فى ديوان واحد صدر سنة 1988

( 1 )
عمر بن الخطاب
****
اصحى يا نايم
وحد الدايم

و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم
مسحراتى
منقراتى
تحت القمر
قريت مسائل
و من الاوائل
جانى الخبر
و من المدينة
و الراشدينا
فيما غبر
اصل الحكاية
سمع شكاية
مد البصر
شاف الخليفة
اجسام ضعيفة
زى الصور
لو لسه حيه
عيونها حافية
من النظر
فى نار تغلب
و ايدين تقلب
ميه بحجر
قالت يا سلى
ولادى يا اللى
تعرف عمر
و مهما نشهق
لا بد نزهق
من السهر
يمكن يغيتهم
نعاس يميتهم
قبل السحر
سالت دموعه
و بين ضلوعه
قلبه انفطر
قال كل مسلم
جناحه مؤلم
اذا انكسر
شوف جسمه مايل
تحت الحمايل
مد و صبر
قال شلت ذنبى
يغفر لى ربى
لو يغتفر
قامت قيامه
من اليتامى
لما ظهر
ابو المواجع
كأنه راجع
من السفر
جاب المؤونة
بايدين حنونة
و قال يا مضر
انا على
تخدم ايديا
بدو و حضر
ع الارض دنه
ينفخ و دقنه
بين الشرر
الانسانية
كلمة غنية
دم و عبر
اسلافنا هم
شقوا مداها
فطرة و بداهة
و خير امة
نمشى بهداها
على الاثر
و المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب مطرح ما تحب
و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حتة من بلدى
حتى من كبدى
حتة من موال :
يهدينى طول المدى رؤيا الندى و الطيف
و قلبى ينزل على كل القبايل ضيف
يطلع مع الحى رحلات الشتا و الصيف
و بشرب الطهر من زمزم براحاته
طابت جراحاته يا ساكن منى و الخيف
اصحى يا نايم وحد الدايم
السعى للصوم خير من النوم
دى ليالى سمحة نجومها سبحة
اصحى يا نايم يا نايم اصحى
وحد الرزاق

[MOHAMED ALY]

فى شهر رمضان سنة1388 هجريا ... الموافق نوفمبر سنة 1968 ميلاديا قام شاعرنا فؤاد حداد بتأليف ثلاثين قصيدة للمسحراتى .... كان من بينها هذه القصيدة .... و قد لحنها و غناها سيد مكاوى فى البرنامج الاذاعى الرمضانى الشهير : المسحراتى

الاستيماره
****

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم


مسحراتي منقراتي
ع الطبله ايدي
ريشه فى دوايتي
اسمع ياسيدي
اسمع حكايتي
مع استماره
راكبه الحماره
اول ماراحت
راحت لحسني
قالت ياحوستي
هو انت فاطر
قال كنت فاكر
مش حانسى تاني
خليك مكاني
الاستيماره
راكبه الحماره
راحت لفكري
قال تيجي باكر
وتروح لزكري
قال روح لشاكر
ولا لشكري
شكري في اجازه
راحت لبهجت
لا حط ماذا
ولا سألها
اشر نقلها
راحت لهاني
خليك مكاني
هاني الطاطوري
قال فيما يبدو
حتروح لعبده
لازم ضروري
ضروري لازم
راحت لحازم
منه لتيفه
شاغلاه لطيفه
منه لمكتب
راجل مؤدب
ببدله بني
قال لي اظني
في تاني اوده
عند الموظف
ابو بدله سودا
بدله رصاصي
قال لا مؤاخذه
مش اختصاصي
ياسيدي لاظوغلي
خلص لي شغلي
في تاني طرقه
على شمالي
لبدله زرقا
شرحت حالي
قال ثانيه واحده
والاستيماره
من يومها قاعده
راكبه الحماره
لو كنت راكب
ماكنتش اوصل
ولا أؤدي واجب
ولا احصل
واطلع بلاشي
احسن لي افضل
على مهلي ماشي


المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال

وكل شبر وحته من بلدي
حته من كبدي
حته من موال :

انا صايم الشهر طول الشهر ودا فاطـــــر
وانا ماشي في الشغل قلبي سخن ودا فاتر
ما يـتنـقـل شـبـر الا بـحــبـر ودفــــاتـــــر

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

فى رمضان 1385 الموافق ديسمبر 1964 كتب فؤاد حداد 31 قصيدة من قصائد المسحراتى .... كان من بينها هذه القصيدة

عرب مصاروه

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتني
نازل الليله دي
بمزاج فرايحي
قالت مراوحى
يا قلب إهدا
أنا قلت إيه دا
خليه هليهلي
مزاحى يجلى
إحجل يا حجلى
أنا مش طاووس
حاطير برجلى
يادوب أدوس
أرضى تبارك لي
عاوز أبوس
على ترابها
مناخ عربها
حتى سرابها
يشفي النفوس
هى اللى هي
الانسانية
أم الليالي
أم الشموس
سرقت خيالى
وطبلي صهلل
وقلبى شخلل
زى الفلوس
وزاد جناني
وفاض حنانى
وكسر سنانى
العرقسوس
لفى يا ساقيه
دور يا قدوس
إحنا بصراحه
عرب فلاحه
فينا السماحه
عرب مصاروه
في مصر أرحم
بلد وثروه
فينا اللى شحم
زى اللى جير
كبير صغير
شايلين فانوس
ومن صعيدى
لبورسعيدى
إيدك وإيدى
علي الغموس

المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي
حته من كبدي
حته من موال :

اصحى يانايم
وحد الدايم
السعي للصوم
خير من النوم
دي ليالي سمحه
نجومها سبحه
اصحى يانايم
يانايم اصحى
وحد الرزاق

[MOHAMED ALY]

فى 28 سبتمبر سنة 1970 رحل الرئيس جمال عبد الناصر قائد مصر و زعيم العروبة .... و مهما اتفقنا او اختلفنا معه و حوله فسيبقى اسم جمال عبد الناصر رمزا لمرحلة خالدة من مراحل النضال و الشموخ القومى بكل ما لها و ما عليها
و قد كتب شاعرنا فؤاد حداد هذه القصيدة فى الذكرى ( الاولى ) لرحيل جمال عبد الناصر :

جمال عبد الناصر

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى فى الطل راجع
و مطلع الشمس قبلتى
منقراتى يا طبلتى
و صوتى زيك من المواجع
شباك يا مطفى و شباك يا والع
دارت ليالى و لفت سنه
و جت فى ودنى اه يا ضنى
اكنى باسمع صوتى انا
و لسه باتعلم الكلام
و اجرب الحزن و المواجع
و الاقى كل الزمن يدور
و باطلب الحسنى فى الختام
كل اتجاه الليالى نور
احسنت يا صاحب المقام
يا هادى لولادى الابتسام
و هادى لعينيهم البريق
فاتح لهم روضة العلام
شوف زرع ايدك معنى و عدد
يفرش على اخر المدد
اخضر لاخضر توأم شقيق
وقفت فى مطرحى الطليق
انادى من ساعة الظلام
يا طول شعاع الفجر
فى قلب صلدق يمشى الطريق

المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حنه من موال :
فى طلتك فى الدقايق تسبق المواعيد
و الابتسامة اللى احلى من السلام بالايد
اؤمر لى بحقوقى و هدوم الولاد فى العيد
و المجانيه و مرايل بيضا و الاناشيد

اصحى يا نايم وحد الدايم
السعى للصوم خير من النوم
دى ليالى سبحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

ليل رمضان

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
بادور وادور
يا فرح قلبي
بيتنقل بي
من نور لنور
أشوف قبالى
على الطبالى
صحبة زهور
أقول يا زرعه
هاتى السحور
وانتى يا زلعه
سبع بحور
لقمه هنيه
تكفى ميه
فى سلطانيه
متسلطنه
قال الزبادى
وصلت أنا
ست الحبايب
يا محضنه
أنا اللى أصلى
روح الضنى
وأخضر بقشره
اسمر في قدره
أقول له إطرا
ويقول لىغمس
خلص المدمس
يا مين يحمس
لنا الوابور
قامت الرقيقة
أختى الشقيقه
قالت دقيقه
والشاى يدور
الله يخلى
البرتقانه
طلبت أحلى
قالت لى آنا
شوف الشعور

و المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي
حته من كبدي
حته من موال :


أنا اللي شفت الرياح تسكن قصب مسحور
شفت الجبال تتنقل والبحر يرمى بحور
ولا شفت ليل فى الليالي زى ليل رمضان
ولا فجر أطيب من الفجر اللى بعد السحور


اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

في اليوم الخامس عشر من رمضان سنة 658هـ وقعت موقعة عين جالوت، والتي انتصر فيها المسلمون بقيادة الأمير سيف الدين قطزعلى التتار وتم توحيد مصر وبلاد الشام.

و قد ظل العالم الاسلامى يتصدى للحملات الصليبية الشرسة على مدى قرنين من الزمان، والتي بدأت من سنة 490هـ/ 1096م وظلت تتدفق على شواطئ الشام ومصر في محاولة للسيطرة على رأس الحربةفي بلاد المسلمين ومن ثم القضاء على الإسلام والمسلمين.
و ما إن انتهت تلك الحملات حتى ظهر على الساحة الإسلامية خطر عظيم لا يقل ضراوة عن خطر الحروب الصليبية إنه خطر المغول والتتار الذين لم يهددوا العالم الإسلامي فحسب بل هددواالعالم باسره
والمغول كانوا شعبًا بدائيًا عاش في هضبة منغوليا بجوار الدولةالخوارزمية الإسلامية والتي كانت على علاقة طيّبة بالمغول ولكن سرعان ما ساءت العلاقة بينهم لمقتل بعض تجار المغول. فخرج "جنكيز خان" ملكهم بجيوشه لمحاربةالمسلمين، فما دخل قرية إسلامية إلا وأحرقها، وقتل سكانها الأبرياء.
واستمرالمغول في زحفهم المدمر حتى دخلوا بغداد عاصمة الخلافة العباسية، واستطاع "هولاكو" -حفيد جنكيز خان- إسقاط الخلافة العباسية، وقتْل الخليفة العباسي سنة 1258م، وتدميربغداد عاصمة الخلافة .
و واصل هولاكو تقدمه فاستولى على حلب ودمشق ولم يبق أمامهالا مصر حصن الإسلام المنيع وكنانة الله في أرضه فأرسل هولاكو رسالة تهديد لحاكم مصر آنذاك السلطان "سيف الدين قطز" ويطلب منه الاستسلام فأبى السلطان قطز وأخذ يعد جيوشه ويستعرضها في شوارع القاهرة ليرفع به من معنويات المسلمين.
و ارسل قطز قوة استطلاعية بقيادة بيبرس الذى استطاع ان يهزم احدى الفرق المغولية. ووصل الجيش المصري المسلم بقيادة قطز إلى عين جالوت في شهر رمضان من سنة 658هـ وهناك دارت تلك المعركة الفاصلة بين الفئة المؤمنة وأهل البغي والفساد من المغول . وحقق المسلمون نصرًا ساحقًا على جيش المغول وأسروا قائدهم، وأمر "قطز"بقتله .

وانتهت بانتهاء معركة عين جالوت أسطورة الجيش المغولي الذي لا يقهر و استطاع المسلمون إنقاذ العالم كله من همجية المغول وخطرهموالذين أخذوا يفرون إلى ديارهم وهم يجرون أذيال الخيبة والهزيمة في عين جالوت. وكانت هذه المعركة البداية لدولة المماليك في مصر والشام.

و قد كتب فؤاد حداد هذه القصيدة عن موقعة عين جالوت

عين جالوت

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى
منقراتى
الدنيا تصحى على دبيبى
فى ايدى طبلة رمضان حبيبى
نغمها شامى و نغمها ليبى
نغمها مصرى عسلى و حبيبى
نغمها واحد يا دنيا طيبى
نغمها سارب بين البيوت
و نغمها ضارب فى عين جالوت
و صلاح محارب زاح الطاغوت
و بيبرس غالب جيش الصليبى
و نغمها طالب نغم شقيق
دق الرحايه على الدقيق
من الجهاد و العرق نصيبى
و نغمها مسعد ونغمها زين
و نغمها موعد للعودتين
ضمينى ارض و شوفينى عين
يا قدس ياما حتفرحى بى
المشى طاب لى
و الدق علىطبلى
ناس كانوا قبلى
قالوا فى الامثال :
الرجل تدب
مطرح ما تحب

و انا صنعتى مسحراتى فى البلد جوال
حبيت ودبيت كما العاشق ليالى طوال
و كل شبر و حته من بلدى
حته من كبدى
حته من موال :

الفاتحين من جهات الشمس للمغرب
العاملين بالهدى كانوا سيوف تكتب
و لا يعيد مجدهم فى كافة الامصار
غير ايد توحد و تعلى راية الثوار
و ايد تجاهد و ايد تزرع و ايد تبنى
و ايد تزيد الطريحه الاوله و تتنى
صلب وحديد لما تعرق من عطشها نار

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

و هذه قصيدة اخرى للمسحراتى فؤاد حداد .... يتكلم فيها عن الشاعر ..فؤاد حداد

صاحب مزيه وأستاذيه


اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
يا سيداتى
وسادتى
بعد التماسى
أنا التماسى
يدوم حماسى
وعادتي
أنا قلب أخضر
بفروع تجرجر
من الشجرجر
مودتى
من غير أذيه
صاحب مزيه
وأستاذيه
في مادتى
وأنا فى انسجامى
ما أنساش لجامى
تحكم كلامى
إرادتى
وباقول يا قافيه
المعنى أفيد
و لا حرف أزيد
عن حاجتى
وانا اللى مؤمن
بالله ومؤمن
بالانسانية
وبالتى
كأنى من يوم
ولادتي
المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي
حته من كبدي
حته من موال :

أنا كنت فلاح وكان محراتى آه ورا آه
وكنت عامل ما حدش قدره ورآه
وكنت شاعر تئن اقلامى يا ورقاه
دلوقتى صوتى فرايحى فى العزيق والحرت
طبلت أنا وسحرت
قبلت أنا وبحرت
وصبحت أنا مسحراتي سمع الدنيا
ودب مطرح ماحب وكلمته العليا
من فجر يوليه اللى شافه وطيبه ورقاه


اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

و كتب شاعرنا المسحراتى فؤاد حداد هذه القصيدة عن الافلام الامريكية ....و كل ما هو امريكى ...

بضاعة الامريكان

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى
منقراتى
مره فى حياتى
دخلت سيما
شفت اللى آتى
كان ياما كان
حمار حصان
بجوزين حوافر
و جوز ودان
عليه مسافر
شجيع جبان
يشب فوقه
و يحدف بطوقه
و يقل ذوقه
عيان بيان
و حبيبته شقرا
فى ايديها زهره
فى عينيها زغره
و دموع كمان
طب سيبنا من دى
سيبها فى امان
ادى فى الامام
احمر و هندى
داهن دهان
دا هندى هان
ابو عين قويه
بالبندقيه
هات يا نشان
يقتل له ميه
و يمضغ لبان
و بعد غيبته
يرجع بخيبته
يحضن حبيبته
شوف الحنان
و دا علم ولا
دا حلم والا
دا فيلم و الا
دا شئ جنان
سهرتنا ضاعت
على بضاعة
الامريكان
كان ليه ندور
فى غير مكان
احنا اللى نور
فينا الأدان
لازم نطور
حواديت زمان
فن الميدان
شعر العروبه
بحر العذوبه
و العنفوان
زى العيدان
نبتت ولادى
فى كل ناحيه
باهتف لتحيا
فنون بلادى

و المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

[MOHAMED ALY]

اوصيك يا إبني

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
تصدق ابنى
مصوراتي
عجب عجبني
مطرح ما شخبط
وراه مشعبط
رسم لى شجره
فى الحيط بتخبط
ورسم لى قمره
من غير براجل
وؤرسم لى راجل
بيبيع بليله
ورسم عرايس
لا مستحيله
الرمش ناقص
لكن كحيله
ورسم لى ورده
أوراقها فارده
أنا عينى بارده
صحيح جميله
ورسم لي بطه
ما تجيش ببلطه
من غير مغالطه
سحور قبيله
تسلم لى إيده
ما هيش بخيله
الله يزيده
قوه وحيله
الفن سرقك
يا ابنى ورقك
تسقيه بعرقك
يصبح خميله
وارسم لى قله
غطاها فله
أنا أب شاعر
مشيت أشاور
على البشاير


المشي طاب لي والدق على طبلي
ناس كانوا قبلي قالوا في الامثال
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي
حته من كبدي
حته من موال :

أوصيك يا إبني وأتعلم وأقرا معاك
يا إبني أول ما تحفظ الفاتحه
أول كلامك ألف فتحه وب فتحه
أذكر أباك ألف فتحه وب فتحه
الطاقه فاتحه وأبواب السما سامعاك

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق