حيرت قلبى ( تحليل لحنى ومقامى )

[الألآتى]

بسم الله نبدأ فى تحليل أغنية ( حيرت قلبى معاك ) ..

الكلمات من نظم الأستاذ ( أحمد رامى ) .. والذى سنصادفه كثيراً مع أم كلثوم ..

واللحن للعبقرى ( رياض السنباطى ) وسنصادفه أيضاً كثيراً مع أم كلثوم وبخاصة فى القصائد ..

تعتبر ( حيرت قلبى ) من نوع الطقطوقة .. يعنى حاجة بسيطة ولذيذة وخفيفة على المعدة ..

لكن عمنا السنباطى .. ماخلاهاش بسيطة ولا خفيفة .. أعطانا وجبة دسمة من المقامات والتحويلات ومواطن الجمال ..

ياااه ياعم سنباطى .. نسمعك فى قصيدة ( رائع ) .. نسمعك فى طقطوقة ( جميل ) .. نسمعك فى وطنى أو دينى .. ( ياسلام سلم )

سالك فى كله .. ماعندوش مشكلة ..

إختار مقام ( الكرد ) ليصوغ منه لحنة الجميل ..

ولمن لايعرف الكرد ..

الكرد مقام رهيب .. جميل .. لذيذ .. يمشى على كل لون .. عاطفى .. حماسى .. شجى .. حزن برضه مايضرش ..

وده ليه .. لقربه من كثير من المقامات الشرقية والغربية .. ولطبيعته المرنة ..

وإتقال منه : إنت عمرى .. أحبك لعبد الحليم .. القلب معاك ثانية بثانية لشادية .. كتير كتير ..

يبدأ عمنا السنباطى لحنه بجملة قصيرة تؤديها جميع آلات الفرقة بدون إيقاع ( أدليب ) .. والسنباطى يعشق الأدليب ..

ثم يدخل الإيقاع ( الواحدة الكبيرة ) مع الموسيقى .. من مقام الكرد ..

وسنلاحظ هنا .. أنه لايوجد عزف منفرد لأى آلة .. لا عود ولا ناى ولا قانون .. ولا حتى دربوكا .. الكل بيعزف مع بعضه .. ونس ..

وتدخل الست .. أه على الست .. مين يقدر يتكلم على كوكب الشرق ..

الحنية .. والكبرياء فى نفس الوقت .. التمكن من أدواتها .. وصوتها العريض الذى يشعرك أنك أمام مطربة .. هى دى المطربة .. تديك الإحساس بالجملة .. سواء الكلامية أو اللحنية ..

إسمعوها وهى بتقول : ياقاسى بص فى عنيا .. شوفوا بتقول كلمة ( ياقاسى ) إزاى ..

وأم كلثوم .. ملكة الإعادات المتميزة والمتفردة .. كل إعادة .. وفيها درس من دروس الطرب والإلقاء ..

المهم .. نرجع لعم السنباطى .. يظل مع الكرد .. حتى جملة ( وأقول لك ع إللى سهرنى ) .. فنجد أنفسنا مع مقام الحجاز .. ويعود للكرد مرة أخرى عند ( وعزة نفسى مانعانى ) ..

الكوبليه الأول .. يبدأ مع مقام الحجاز .. وينتقل لمقام الراست عند ( دى نظرة شوق وحنية ) .. ويعود كمان مرة للكرد عند ( وبين شوقى وحرمانى ) ..

الكوبليه الثانى .. معانا الكرد .. لينتقل للنهاوند عند ( وأبات أفكر فى إللى جرالك ) ..

ونصادف هنا نقلة جديدة .. حجاز برضه .. ولكن من درجة أخرى .. بعيدة تماماً عن الحجاز بتاعنا .. درجة بتوجع وجع .. عند ( وأقول ماشافش الحيرة عليا لما بسلم ) ..

ويعود للكرد عند ( وأرجع أسامحك تانى ) .. يظهر إنه ربط العودة للسماح بعودة الكرد .. شغل معلمين ..

الكوبليه الثالث والأخير ...

من غير إيقاع ولا دوشة دماغ .. تدخل الموسيقى حرة .. لتؤدى جملة جميلة جداً من مقام الكرد . . ( برضه ) .. وتغنى الست .. و ( خاصمتك بينى وبين روحى )

لاحظوا الجملة الموسيقية التى تأتى بعد ( خاصمتك بينى وبين روحى ) .. هذه الجملة الموسيقية موجودة فى لحن ( عايز جواباتك ) لنجاح سلام .. نفس الرد .. وأيضاً فى لحن ( عرفت الهوى ) لأم كلثوم أيضاً .. ماهو نفس الملحن .. هو حر .. ماسرقش حد غريب ..

المهم إن السنباطى يعود بنا لمقام الراست مرة أخرى عند ( لحد قلبك مايوم يدلك ) .. ثم يعود للكرد عند ( أرضى أشكيلك من نار حبى ) .. ويقفل الأغنية
أرجو أن أكون وُفقت فى هذا التحليل المتواضع

[نور عسكر]

وتدخل الست .. أه على الست .. مين يقدر يتكلم على كوكب الشرق ..

الحنية .. والكبرياء فى نفس الوقت .. التمكن من أدواتها .. وصوتها العريض الذى يشعرك أنك أمام مطربة .. هى دى المطربة .. تديك الإحساس بالجملة .. سواء الكلامية أو اللحنية ..

إسمعوها وهى بتقول : ياقاسى بص فى عنيا .. شوفوا بتقول كلمة ( ياقاسى ) إزاى ..

وأم كلثوم .. ملكة الإعادات المتميزة والمتفردة .. كل إعادة .. وفيها درس من دروس الطرب والإلقاء ..

الله عليك ياأستاذنا الموسيقار والكلام الجميل ومعه كل المشاعر لكل كلمة في الأغنية وتحليلك الأجمل ..أنا وضعت الإغنية أمامي وأستمع وارجع مع كل جملة حللتها من مقام كرد ومروراً بالحجاز والعودة الى المقام الأول ، وأول الطرب لدى الست ام كلثوم والألحان الفذة ، ربي يبارك بيك وبصحتك .

[الألآتى]

أشكرك أخى نور .. أتمنى أن أكون شاركت بقدر ضئيل فى الإحتفالية