قصيدة [ الحيطة ] !!

[M O H A M E D]

الحيطة

مــــــن كتــــــر ما بحــب الحيطة
بمشـــــــي أنــــا جنـــــب الحيطة
في الضـــــل مـــــاشي أنـا مـاشي
لا هاممنــي زحمــــــة و لا زيـطة

من صـــغري و انـا احـــب الحيطة
و احـــــب انـــام جنــــــب الحيطة
نـــايم و شـــــــــــايف فــي منامي
أحــــــــلامي ســــاذجــة و عبيطة

و الصبــــــح أمســــك طبـاشيرتي
أرســـــــم و اشخبـــــط ع الحيطة
وردة و علـــــم و قلـــــم و كتــاب
و ولــد بيلعــــــــب بــالكــــــــورة

لعِّيــــــب أنـا و بحيــــب اجــــوان
و لا مــــــرة بيخيـِّــب شـــــــوطة
فـــــرحان و شــــــــايف حــــواليَّا
النــــــــــاس سعيــدة و مبســوطة

الدنيـــــــــا كـــــــانت بالألــــــوان
و طـُــــــرُقها ســالكة و مظبــوطة
شـــــــــاطر و رايـــــــح مدرستـي
و فـ حـــــالي و لا بعمــــــل ظيطة

م المـــدرســــــة ع الجـــامعة أوام
و نتيجتــي مكتوبــــة ع الحيـــطة
فـــرحــت انــا و خــــدت شهـادتي
علـَّـقتها بـإيـــــــدي ع الحيــــــطة

النــــــــــــاس بتصرخ ليه كده ليه
و صــــــوتها عالـــــي ليه من إيه
بيقــــولـــوا فيـــــن حقوقنــــا فين
و أسئـــــــلة تــــــــانية بسيـــــطة

و الــــــــرد كـــــــان بأحلى طناش
عصــــــــــاية و قنبلــــة و رشاش
خـــــرطـــوم و بيـرشرش رشراش
غـــــرَّقنـي و انـــا جنـــــب الحيطة

تفــــــوت شهـــــــور و تعـدِّي ايام
و عينـــــــي بتفتـَّــح يــــا ســــلام
حـــاجــات كتيـــــــــر طلعت أوهام
و كـــــل حــــاجــــة مـش مظبوطة

الظلــــم ســــــــاد ويــا الفســـــــاد
لا ســـــاب تــلال و لا فـــات حيطة
إصـــــلاح و تغييــــــر إيـه يـا ولاد
دا كــــــــلام و ملــــزوق ع الحيطة

مـــــا عـــادش فيهــــا أي أمــــــان
و لا حتــــــى فـــي جــــوة الحيطة
خـــــلاص أنـــــــا قــــررت يا ناس
أسيــــــب مكــــــاني جنــب الحيطة

..

[هاله]

يسعدنى اكون اول من يعلق على قصيدتك الجديده اخى العزيز
بجد رائعه يامحمد
كلام ممتاز ومعبر جدااا عن احداث كتير
هايله يا سلامونى

[M O H A M E D]

أنا أسعد بتعليقك و برأيك

و الحمد لله إنها عجبتك

شكراً .. ألف شكر يا لولي

[مصطفى]

أحييك يا سلا مو ني
أسلوب جميل و موضوع أجمل
و كأنك تتكلم بلساني
يبدو أن همومنا فعلا واحدة

[ريما]

بص يا فنان

هو احنا زملاء عنبر واحد اها لكن لما يجى البيه امين الشرطه

انا ولا اعرفك ولا شفتك ولا حتى سمعت عنك انت عارف زلومه الاقرع

مبيرحمش لكن كون مطمن هبقى اجبلك عيش وحلاوه هعملهملك فى ريحه شياط

بس بجد بجد باه القصيده تحفه ملهاش حل

حسيت وانا بقراها انى بقرا للفاجومى اللى بعشقه

بجد يا سلامون يوم عن يوم بتثبت انك موهوب فعلا مش سلامون

[M O H A M E D]

المشاركة الأصلية كتبت بواسطة مصطفى الحيدوكي

أحييك يا سلا مو ني
أسلوب جميل و موضوع أجمل
و كأنك تتكلم بلساني
يبدو أن همومنا فعلا واحدة

أهلاً صديقي المثقف مصطفى الحيدوكي
أخيراً حظيت أحد تجاربي الأدبية بشرف تعليقك
شكراً لك يا أخي
و مرورك هو الأجمل

و بالتأكيد همومنا واحدة

[M O H A M E D]

المشاركة الأصلية كتبت بواسطة ريما

بص يا فنان

هو احنا زملاء عنبر واحد اها لكن لما يجى البيه امين الشرطه

انا ولا اعرفك ولا شفتك ولا حتى سمعت عنك انت عارف زلومه الاقرع

مبيرحمش لكن كون مطمن هبقى اجبلك عيش وحلاوه هعملهملك فى ريحه شياط

بس بجد بجد باه القصيده تحفه ملهاش حل

حسيت وانا بقراها انى بقرا للفاجومى اللى بعشقه

بجد يا سلامون يوم عن يوم بتثبت انك موهوب فعلا مش سلامون

ههههههههههههههههههه أصيلة يا ريما

و عموماً

لـــو كان كلامـي مش مظبوط
و زعـَّـل بـــــاشــا أو ظبُّــوط
سـامحوني أصل انا و دماغي
لســه خابطين في الحيــــــطة



يظهر اني جيت أكحلها عميتها

سلام

[ثروت رضوان]

إيـــــــــاك تسلم وتفرط وتسيـــــب مكانك فى الحيطة

ده سيدنا الخضر يا سلامون لجل الولاد عدل الحيطة

وانت رسمت العلم وكتـــــــاب ووردة وقـلم

موش عيب يموت الأمل من خبطتين بالقلم

ده الصبر آخره الفرج مهمــا عنيــــنا الألم

[M O H A M E D]

يا ألف أهلاً و سهلاً
نوَّرت الصفحة يا أستاذ ثروت
و إيه الجمال ده .. الله عليك :good:


و اقـــول للدمع لا .. إنسـى طريقـك ليَّا
قلبـي نــاوي يعيـــش أحـــلامه المنسية
حتــى لـو في يــوم .. الدنيا قسيت عليَّا
هضحـك في وشهـــا .. و لا ابكـِّي عنيَّا

هتحدى الكون كمان .. و لا شئ هيهمني
همشي في الطريـــق .. أحـلامي هتشدني
لا هستسلــــم و لا .. اليــــــأس يصــدِّني
عارف هوصل في يوم .. و الفرح يضمني

يعني ما تخافش على سلامون

سلام

[غواص النغم]

شوفوا الراجل...
بقى دي متعلقة في الحيطة من 4 ايام وانا اخر من يعلم!!!!
اقول ايه بس


كويسة قصيدة الحيطة
واتمنى لك التوفيق
مش عارف اقول ايه
لو افتكرت ح اجي اكتب لك ع الحيطة ((صفحتك الخاصة))