عـم بـطـاطـا

**سيادة الرئيس** · #1 08/05/2008, 11h34

عم بطاطا

عم بطاطا لذيذ و معسل - - عمره ما طاطا لغير الله
لما الدنيا بتقسى يمثل - - إنه خلاص سلّم لأضاه
قال إيه خلاص سلّم لأضاه

عم بطاطا يقول الراوي - - خبّى الحكمه في توب الحاوي
ينفخ ناره عشان إفطاره - - و بنكتته بيداوي بلاوي

عم بطاطا لذيذ و معسل - - عمره ما طاطا لغير الله
لما الدنيا بتقسى يمثل - - إنه خلاص سلم لأضاه
قال إيه خلاص سلّم لأضاه

عم بطاطا بيمشي في حاله - - علشان رزقه و رزق عياله
غصبّن عنه يقف يتكتّف - - بس بيكيفه يفك حباله

عم بطاطا لذيذ و معسل - - عمره ما طاطا لغير الله
لما الدنيا بتقسي يمثل - - إنه خلاص سلّم لأضاه
قال إيه خلاص سلّم لأضاه

عم بطاطا يزُك الزكّه - - يُعبر سينا و يفتح عكا
و بيصبر ع الجار السو - - خمسين سنه ويقول دول فكه

عم بطاطا لذيذ و معسل

هوه ده الكلام مش تقول لي ( جاكته )

و كده قال الأستاذ جمال بخيت عن المصري

من أحلى ما أنتج هذا الثلاثي الرائع

جمال و فاروق و علي

مجموعة لم الشمل
إنتاج 1991

كلام زي ما قريت و قول إنت

اللحن للملحن الرائع الجاد : فاروق الشرنوبي

المقام : هزام

في شكل شعبي بديع و زاد بدعه المقام المستخدم

مقام يحوي مسافة ( الثلاث أرباع ) مش كده و بس لا ده الركوز عليها

طيب دلوقتي كلام بيخر حلاوة و لحن بينضح طعامه يقوم التنفيذ يزود الحلاوة حلاوتين و الطعامه طعامتين

تعالوا كلنا نسجل في وقت واحد ( ريل تايم ) مافيش تراكات و لا يحزنون و نغلط نعيد من الأول يبقى الإحساس أحلى و الأسلوب ده متبع في إصدارات العتاولة حتى الآن و أذكر منهم سيدة الغناء الغربي ( بربرا سترايسند ) اللهم بس فواصل خشبية بينهم عشان لو فيه ( ميكساج ) يكون أسهل شوية

يبقى الجماعه كلهم مع بعض

و اسمع عود الملحن الراحل الشاب إللي أمتعنا بصوته و هو طفل : رياض الهمشري
و لا كولة : عبدالله

لا و مين كورال

رياض الهمشري و طارق فؤاد و أحمد الحجار و رأفت الحجار

طبعا بعد كل إلي أنا قلته حضرتك متوقع أداء علي

لكن زود الحلاوتين تلت حَلاوات و الطعامتين تلت طَعامات بأدائه للكوبلية الأخير و تبادله فنون القواله بينه و بين الكورال على بيت ( عم بطاطا يزك الزكه - - يعبر سينا و يفتح عكا )

حاجة كده تسمعها بقلبك قبل ودانك

الناتج عمل أمتعني من ساعة ما طلع لغاية النهارده و أقدر أقول عليه و بجد

wow wow wow

عم بطاطا

كلمات : جمال بخيت

ألحان : فاروق الشرنوبي

غناء : علي الحجار

الملف مرفوع بتاريخ الموضوع

هنا

**MOHAMED ALY** · #2 08/05/2008, 12h34

و الله يا استاذ / صلاح .. انت اللى كل مشاركاتك لذيذة و معسلة ...و جادة و محترمة ... و لولا الملام كان نفسى نعمل مثبت لعلى الحجار ... لولا الخشية من كلمة ( اشمعنى ) و ان نفتح الباب لكل من هب و دب فى الحقل الغنائى .... طيب و ماذا عن اغنية : يا مصرى ؟ .

**سامية** · #3 08/05/2008, 14h04

أستاذنا صـلاح علام
اختيارات حضرتك كلها مميزة ومختلفة .. طبعا حضرتك بتملك الدراسة الأكاديمية والموهبة ولذلك سيادتك بتأتي لنا بإبداعات فنية رائعة .. والغريب إن هذه الإبداعات غير منتشرة .. طبعا طالما عايشين في زمن الروشنة الطحن لازم الفن ده يضيع
الحقيقة باشعر إن حضرتك متحمل مسئولية هذه الإبداعات الفنية وبتحاول تنشرها بقدر المستطاع وبإذن الله يساهم منتدانا في ذلك

هاستغل الفرصة دي وأحيي حضرتك على إبداعك في تنسيق موضوعاتك .. لكن ده مش غريب على حضرتك لانك باختصار فنــان
مع خالص تحياتي

**Egy_LoveR** · #4 08/05/2008, 19h18

أستاذ صلاح.....شكرا ليك عشان قلبتلي يومي من حالة نفسية سيئة جدا ، لقمة المزاج ...بالاغنية دي..

الحجار ده....أقول ايه بس وللا ايه جميل ، ممتع وأصيل فعلا الاغنية دي اول مرة اسمعها ..أداء عالي اوي وطبعا كلمات ولحن ومقام كله تمام...بعشق صوت علي الحجار واداؤه رايح جاي في الاغنية طالع نازل....وكل ده بمزاااااااج

واللي تمام أوي بئه ولسه بيعقدني إلى يومنا هذا ..عبد الله حلمي ...لو كان هو اللي بيلعب كولة في الاغنية دي.(واظن ان هو) الراجل ده فوق الفظيع! ربنا يديله الصحة

طبعا اسلوب التسجيل احترافي والاغنية جميلة جدا زي ما قلت
فشكرا جزيلا

صحيح انا ليا رأي مخالف في موضوع الجاكته ده بس هارد في الموضوع التاني....بس مش دلوقتي...لما اشبع الاول من عم بطاطا لحسن لذيذة فعلا!

**Egy_LoveR** · #5 09/05/2008, 00h55

مش عارف لييه الاغنية دي جوها فكرني بأغنية تانية(مع الفارق).....اسمعوها معايا كده..يمكن عبدالله العامل المشترك !

ايه رأيك يا سيادة الريس؟

**سيادة الرئيس** · #6 09/05/2008, 09h34

عم القناديلي

و الله إنت إلّي كلامك زي العسل ... بالنسبة لأغنية : يا مصري قريب نتكلم عنها و لا إتكلم انت يا اخي

الأخت سامية

شكرا على إطرائك اللطيف و لا حرمنا الله من كيبوردك الرقيق

السيد عاشق مصر

عبدالله حلمي عازف محترف يروض آلة غاية في التعقيد بسبب بساطة تكوينها فهذا يتطلب منه التمرين على تكنيكات لإخراج ما يريد منها

أما عن أغنية ( طفي النور ) أظن أنها كانت في عمل درامي و لا يحضرني إسمه و لا إسم الملحن لكن هى من مؤلفات الأستاذ : أحمد فؤاد نجم و هى من وحي أغنية متواترة كنا نغنيها و نحن صغار ( طفّي النور يا وليّه .. إحنا عساكر دوريه )

طفي النور

طفي النور يا بهيه
كله عساكر دورية

جوزك راجع من سوقه
راكبه الهم وبيسوقه
نطو العسكر من فوقه
دورية ورا دورية

جوزك سارح على غيطه
بيلضم همه في خيطه
ازحوا العسكر على حيطه
يلعبوا عسكر حراميه

خالك راجع من مكة
طلعوا العفاريت في السكة
الف ولاد الجّنية

ولد رايح على عكا
يفتح سكه على سكه
طلعوا عليه سدوا السكة
واتحاصر رايحة وجاية

ايدي النور يا بهيه
كل العسكر حراميه

**ريما** · #7 09/05/2008, 10h07

الاغنيه للجميل محمد منير

غناها فى مسرحيه الملك هو الملك

وكانت بطولته ومعاه صلاح السعدنى وفايزه كمال

لو عايزنى احكلكو احداث المسرحيه مفيش مانع كمان

اما بخصوص باه اغنيه عم بطاطا

فهى من اغنياتى المفضله الجميله

بحى معاليك على زوقك الجميل

**Egy_LoveR** · #8 09/05/2008, 11h10

اقتباس:

والغريب إن هذه الإبداعات غير منتشرة

شكرا يا استاذ صلاح

فعلا طفي النور كانت في الملك هو الملك غنى منير 11 أغنية كلهم كلمات نجم والملحن اسمه حمدي رؤوف الكلام ده سنة 1986

وصلاح السعدني ده ممثل جميل.....وعبد الله حلمي كان بيعزف برضه في المسرحية! ومرة اثناء العرض صلاح السعدني سكت وقاله ماتسمعنا حاجة يا عبدالله..وطبعا مبيتاخرش لعب كده 3 دقايق من الحاجات اللي بتقطع القلب دي

....انا كان سؤالي حد شايف الاغنيتين فيهم شبه من بعض وللا انا اللي بيتهيألي؟ ومقامها ايه؟....وايه حكاية عكا ؟

الا صحيح هو الاستاذ ابو حسام واخد أجازة وللا ايه؟

أؤيد برضه اننا نتكلم عن يا مصري، ابداعات الحجار لاتنتهي ...واقتراح كمان ...ممكن نتكلم عن مارسيل خليفة شوية؟

شكرا
معتز

**سيادة الرئيس** · #9 09/05/2008, 12h11

ريما

شكرا لك

معتز باشا

مقام طفي النور : كرد

و طبقة التسجيل : لا

التشابه يمكن يكون في جودة العمل

أما موضوع ( عكا ) فهى ضمن عبارة تطلق على فعل شئ صعب و كثير ما سمعتها من أمي ( رحمات ربي عليها )

هوه انت رايح تفتح عكا

**الألآتى** · #10 09/05/2008, 18h14

اقتباس:

المشاركة الأصلية كتبت بواسطة Egy_LoveR

الا صحيح هو الاستاذ ابو حسام واخد أجازة وللا ايه؟

شكراً لسؤالك عنى ياأستاذ معتز ..

فى الحقيقة .. إننى أستمتع مثلكم تماماً بما يضعه لنا أستاذنا صلاح علام .. لذا تجدنى قليل التدخل فى مشاركاته ..

وبصراحة .. أنا أنتظر بشغف مواضيع وتحليلات الأستاذ صلاح .. وأقوم بإحضار مقعد لأجلس عليه .. وأضع نفسى فى موقف المستمع المستمتع بما يجود علينا سيادة الرئيس .. ولا أجد عندى كلام أضيفه على كلامه .. حتى لا أفقد متعة الإستمتاع .. وخاصة أن الأستاذ صلاح يأتى لنا دائماً بالجديد والنادر من الأعمال .. وطريقته فى التحليل تعجبنى ..

هل عرفت الأن لماذا أنا مختفى ؟