متمكن .... لا أحب الإستماع إليه

[samirazek]

اليكم هذه التسع
(1) ماوصل الينا من صوت عبده الحامولى ادهش ماهو الطرب الذى فيه وعلام هذه الشهرة الطاغية ؟ على العكس فأبنه حسن الحامولى مؤد جيد وصوته رخيم
(2) منيرة المهديه صوت غجرى منطلق بلا فرامل ولكن ليس به جمال ..على العكس شهرزاد صوت منطلق لكن بجمال وتحكم كامل فى العرب ...وبأنوثه طاغيه
(3) سيد اسماعيل صوت يغنى وكانه مندهش لا يجذب احساسك يغنى ويخرج ولا يعلم فى دماغك وعلى العكس محمد عبد المطلب من اول الترويسه الموسيقية والتقاسيم التى يتسلطن بها وقد يقول ياعينى لجوده عزف القانون تجد نفسك متسلطن معاه قبل ان ينطق
(4) فتحية احمد لها بحة تينور رجالى فى صوتها..منفره ... تفرمل احاسيسك مش لايقه على انثى
بينما فريد الأطرش بالباص بتاعه فهو ملك متوج فى ملعبه البياتى... ياليل يابدر يا أغصان... وعزف عوده مطعم بالمدرسة الأسبانيه لأستاذه فريد غصن وانا مع ملايين الدهماء البسطاء من عشاقه... ربنا يجعل كلامنا خفيف على اللى فى بالى .. فهذه اذواق يا ذوق .
(4) ابراهيم الحجار صوته مرتعش برغم ادائه الجيد يذهب باقتناعك بما يقول رغم جودته ... فى حين عوض دوخى بصوته الحريرى الهادىء يحلق بك فى سماء الطرب فى ثوانى.
(5) زينب يونس برغم ادائها الجيد صوتها غير مقنع ...غير مشبع فى حين ان احلام صوتها الحريرى كهديل الحمام برغم فارق الأوكتافات ...ومقنع للثماله
(6) صباح حين اسمعها فى كل اعمالها قاطبه تعطينى ما تعطينيه عالمه درجة ثالثه فى فرح شعبى فوق السطوح ...بيما نجاة الصغيرة حيت اسمعها اسمع آلة كمان تتكلم العربيه محلقة بى فى دنيا الخيال.
(7) حليم بامكانيات صوته المحدوده استطاع بذكاء العباقرة من ملحنيه ان يستخرج كم هائل من الشجن البديع الذى يمسك بتلابيب القلب..فهو ...ظالم ..واحن اليه..ولو كنت يوم انساك ايه افتكر تانى ؟
(8) عبد الوهاب هو عصر طويل... طويل... من الجمال من شبه السوبرانو فى ويلاه ماحيلتى الى الباص فى اسألك الرحيلا ...وكل له جماله... فى اوانه تزينه موسيقى غير مسبوقه ... الأبداع وغاية زمانها تطورا ورشاقه وطرافه.
(9) حين يحل الليل لا يحلو السهر الا مع ام كلثوم فهى البدايه وهى النهاية وهى الطول والعرض و الأرتفاع الذى يجسم لك العظمة بكل معانيها ...والشجن بكل الوانه ... وفى كل ماقالت...بدءا من كم بعثنا مع النسيم سلاما ..الى حكم علينا الهوى فى النهايه..
اما حين تنزع الى الهدوء والصفاء والسكينه حين تصحو صباحا... فهى فيروز وبس

سمير عبد الرازق

[انتوكارى]

حقيقي موضوع يستفز نظرا لكمية الكبت اللي عند السميعة تجاه مطربين معينين

أنا مثلا شايف فريد الأطرش بعيون كوميدية ، أضحك كلما أراه يبكي أو يتباكى من أجل حبيبه اللي هجره أو عمل معاه دقة نقص
و بصراحة أذني لا تتوافق مع صوته المتباكي ، حيث يذكرني بطفل يلح على ابوه أو أمه لشراء لعبة فيدعي البكاء و النهنهة ـ باستثناء رائعتيه عش أنت و أضنيتني بالهجر ـ


كارم محمود : صاحب صوت ـ نظامي ـ بارد كأنه خارج من فريجيدير لا إحساس فيه و لا شعور ، صوته يتوقف عند الأذن و لا يتسرب إلى الوجدان


محمد فوزي : ألحانه سطحية تلمسها و لا تمسك بها فهي لا تستقر في الشعور
و دائما احس انه يستسهل الجملة الموسيقية و لا يجتهد في ترسيخ بصمة غنائية
و صوته يشبه ألحانه ، حاجة كدا ع الماشي .. خفيف خفيف


عبد الحليم في أغانيه الفاشلة الأخيرة : فاتت جنبنا ، نبتدي منين الحكاية ، قارئة الفنجان
لا أطيق سماع جملة واحدة من هذه الأغاني التي تمنيت لو لم يغنها حليم


شهر زاد : نسخة مشوهه من الست ، حتى تعمدها الإمساك بمنديل و ارتداء ملابس تشبه ما كانت ترتديه أم كلثوم لم يشفع لها


عبداللطيف التلباني : دخيل على عالم الغناء بصوته الذي يشبه كوبا من الشاى تم تحليته بعشرين ملعقة سكر ، و تصوري الشخصي أن هاني شاكر إمتداد له ، لكن هاني شاكر شاطر في تكوين علاقات مع أهل العقد و الحل في زمن الرداءة
صوت هاني شاكر يستفزني و ينفرني من الغناء أصلا


على الحجار : كلما غنى و حاول يطلع بعُربة أو يستلف نفس طويل ، يصيبني بالفزع عليه ، إذ تنفر العروق في جبهته و رقبته و أشعر أنه يوشك على الموت اختناقاً فهو لا يغني مرتاحا ، و على إيه يعني ، ما بلاش غنا يا عم علي أفضل


لطيفة : أعوذ بالله

صباح فخري : كذبة كبيرة

نادية مصطفى : لها صوت ـ إنهزامي ـ ذابل ، منطفىء


و أشكركم على الموضوع الذي يفرغ كبت المكبوتين

[صوت الموسيقى]

المشاركة الأصلية كتبت بواسطة unicorn

اما انا فما لفت نظرى ان هناك اصوات من كبار المطربين اتفق عليها الجميع ضمنيا و لم تذكر من اى عضو ,

و هذا إن دل انما يدل على سلامة هذه الاصوات من أية شائبة صوتية , أو من اى مبالغة غير مرغوبة فى الاداء
إضافة الى جمال نبرات الصوت و رنين محبب لأذن الجميع
أمثال
سعاد محمد
اسمهان
ليلى مراد
حورية حسن
و من الرجال
طلب
قنديل ( باستثناء أخونا غازى اللى أكيد بيهزر)
محمد فوزى
كارم محمود

يرحم الله من مات منهم و عوضنا عنهم خيرا

اؤيد الاسماء النسائية لكن الرجالى اشيل منهم فوزى وكارم

[غواص النغم]

أهلا بكم
طبعا الموضوع جميل وجريء
واحد الأصدقاء شاور لي على الموضوع
طبعا علشان لقيت انا فيه حوالي 3000مشاركة فاتتني بالمنتدى
واول ماقريت الموضوع فرحت جدا لان هذا الموضوع لاتوجد فيه مجاملة
بالنسبة لي انا
تعرفوا ليه انا بحب منتدى سماعي؟
لأنني احب كل الذي فيه من مطربين ومطربات ومغنيين ومغنيات ومونولوجيستات
وطبعا احب سعاد حسني
وبدون مجاملة
طبعا توجد اغنيات من مطرب محبوب لا احبها ((حاليا))ممكن بعد شوية احبها
وده حصل معايا في عدة اغنيات
حاولت اتذكر من الذي لا احبه فلم اجد
ممكن يكون ماهر العطار او محمد رشدي ((لكن وجدت انه عندي اغاني بحبها لهما))
يعني
بما ان لكل مطرب جمهور ومعجبين وانت لاتحبهم ..لماذا لاتحاول ان تستمع اليه من جديد
مثلا كنت لا احب سماع محمد عبدالمطلب ((لان سني كان صغير فلا اعتقد ان طالب في الابتدائي يحب ان يستمع لطلب ده صوته رجالي وكله قوة لو سمعه واحد في كجي وان ح تصيبه سكتة قلبية))لكن لما كبرت عشقت صوته وسماعه
حاولت ان اسمعه وسمعته واعجبت بفنه
وانا الان بحاول في اغنية حاول تفتكرني ومداح القمر ممكن ممكن اعجب بهما
على فكرة ريما انا كنت عارف انك ماتحبيش تستمعي لأغاني
ارجوكم
نحن نتكلم عن الاصوات الموجودة في سماعي
لطيفة واصالة وايهاب وشعبان وهاني والحجار هل هم موجودون في سماعي
؟؟؟؟
اعتقد ان عدم وجودهم في المنتدى هو اكبر من اي تعليق قد يقال
على فكرة ا.بشير عياد كان رئيس تحرير مجلة كاريكاتير ..فطبعا لازم تكون عنده كل الاعداد
وياريت بما انه عنده اسكانر يبعث لنا كام عدد وشوية صور كمان له ولعبدالوهاب محمد وكل اللي يجبه كويس
تحياتي

[جرامافون]

ما حدش ليه دعوه بالست ( فتحية أحمد )

إنتوا عندكوا إخوات بنات برضه

يا جمااااااااااااااعة
اوعوا حد يقرب من ست الكل
الكروانة البلبلة مطربة القطرين
(فتحية أحمد)
ولا يهمك يا عمي
أنا متحزم بجنزيرين علي وسطي
ومعايا كازلاك تحت البلوفر
ولو الموضوع كبر العيال مخبيهم في القهوة اللي جنبينا
حنولعها وننط من الشباك
ونغير هدمونا بسرعة ونرجع ناخد العزاء ونعيط
علي الضحايا

[صوت الموسيقى]

المشاركة الأصلية كتبت بواسطة غواص النغم

ارجوكم نحن نتكلم عن الاصوات الموجودة في سماعي لطيفة واصالة وايهاب وشعبان وهاني والحجار هل هم موجودون في سماعي؟؟؟؟

اعتقد ان عدم وجودهم في المنتدى هو اكبر من اي تعليق قد يقال

عزيزى منعم اولا حمدلله على السلامة ووحشتنا جدا...ثانيا بقى حتة انه كفاية انهم مش فى المنتدى فدى اسمحلى اختلف معاك فيها... لأن المنتدى يختص بالحاجات القديمة و النوادر بس... يعنى الجديد الكويس مش موجود هنا لأنه جديد مش لأنه وحش ودى بالذات كانت موضع نقاش طوييييييييييييييييل مع العزيز غازى و القدير أ. الالاتى...كذلك الاعمال الغربية يعنى بيتهوفن ملوش مكان هنا رغم انى طلبت ده اول دخولى المنتدى هل معنى ده ان بيتهوفن فاشل وكفايه انه مش موجود فى المنتدى وعدم وجوده ده اكبر من اى تعليق يقال؟؟؟

انا من رأيى انه طالما مش بنرفع ملفات تحمل على السيرفر و الحكاية مجرد ذكر اسماء يبقى كل واحد يقول الاسامى اللى فى نفسه... على الاقل نتعرف على ذوق بعض اكتر...

الف الف حمد لله ع السلامة مرة تانية و الف الف شكر لسعة صدرك الغالية

[غواص النغم]

المشاركة الأصلية كتبت بواسطة صوت الموسيقى

عزيزى منعم اولا حمدلله على السلامة ووحشتنا جدا...ثانيا بقى حتة انه كفاية انهم مش فى المنتدى فدى اسمحلى اختلف معاك فيها... لأن المنتدى يختص بالحاجات القديمة و النوادر بس... يعنى الجديد الكويس مش موجود هنا لأنه جديد مش لأنه وحش ودى بالذات كانت موضع نقاش طوييييييييييييييييل مع العزيز غازى و القدير أ. الالاتى...كذلك الاعمال الغربية يعنى بيتهوفن ملوش مكان هنا رغم انى طلبت ده اول دخولى المنتدى هل معنى ده ان بيتهوفن فاشل وكفايه انه مش موجود فى المنتدى وعدم وجوده ده اكبر من اى تعليق يقال؟؟؟

انا من رأيى انه طالما مش بنرفع ملفات تحمل على السيرفر و الحكاية مجرد ذكر اسماء يبقى كل واحد يقول الاسامى اللى فى نفسه... على الاقل نتعرف على ذوق بعض اكتر...

الف الف حمد لله ع السلامة مرة تانية و الف الف شكر لسعة صدرك الغالية

اولا الله يسلمك
ثانيا بماذا تفسر تواجد المطرب احمد إبراهيم بالمنتدى؟
والكل يعرف احمد ابراهيم من اي جيل من المطربين
ثالثا اعتقد ان كلامي وتعليقي عن عدم تواجدهم هو ملخص لكل من لا احب ان استمع اليه من المطربين والمطربات بمعنى ان الذين لا احبهم ليس لهم مواضيع خاصة بهم في المنتدى ..انا بقى اللي في سماعي بحبهم واللي بره منه لا احبه ((الا سعاد حسني ))وهذا من اهم اسباب حبي لسماعي ولا اعتقد ان مساحة السيرفر هي التي تمنع تواجدهم بالمنتدى ولو كانت مقتنع بعكس كلامي فهذا طبعا رايك واحترمه
رابعا :
تحياتي

[صوت الموسيقى]

المشاركة الأصلية كتبت بواسطة فؤاد عبد الحميد

تكمله،،،،،،
عندما أستمع الي المطربه عليا التونسيه
بأفتكر اللي يغني دلوقتي وبيقول
كوكو واوا كووو واووووا
وعلي طول بفتكر الست أصاله
بس أصاله بتقول
كيكي واوا كيكيكي واوا

مشكلة اصالة ( حتى البومين مضيا) هى الاستعراض المبالغ فيه لامكانياتها الصوتية على حساب الاحساس .... فكانت اشبه بصندوق اجوف يحدث ضجيجا... بس دلوقت حاجة تانية واللى مش مصدقنى يسمع اغنيتها الجديدة: نص حالة

[فؤاد]

المشاركة الأصلية كتبت بواسطة صوت الموسيقى

مشكلة اصالة ( حتى البومين مضيا) هى الاستعراض المبالغ فيه لامكانياتها الصوتية على حساب الاحساس .... فكانت اشبه بصندوق اجوف يحدث ضجيجا... بس دلوقت حاجة تانية واللى مش مصدقنى يسمع اغنيتها الجديدة: نص حالة

أول حاجه في حد سامعنا ولا شايفنا يعني الجو خالي

طيب أنا حاولت أسمع للست أصاله ، وفعلاً أستمعت واستمعت وفي يوم في أغنيه جديده ألا وهي ( قد الحروف ) وفعلاً أستمعت الي الأغنيه أول مقطع رائع وكانت قمه في الطرب وثاني مقطع أبداع وتقول مو أصاله والمقطع الثالت
بدأت تقول كعادتها ...... كيكي واواوا كيكيكيكي واوووا
بجد ياصوت الموسيقي بجد
أنا ماشي في حد بره ؟

[جرامافون]

أهوه ... ورايا رجاله يكلوكو أكل

البلبلة المغردة
ويا ويل اللي يقول غيركده

ست الكل فتحية أحمد

معلش بلاش أنت يا حمو اصلك عصبي
(دي عينه من الرجالة)