مشاركات خارج موضوع طلبات النوتة

[سليم العباس]

شكراً للأساتذة الكرام على توضيح علاقة سرعة الأغنية بصعوبتها ، و أشيد بالرأي العلمي القيم الذي طرحه الأستاذ فؤاد العلمي عن العلاقة بين صعوبة الأغنية و بين سرعتها و ميزانها و لحنها .

ملاحظة: لا أعتقد أن هناك خلاف بين عاقلين حول التفوق المطلق لعصر الفن الذهبي عما نراه حالياً ( عصر الانحدار ) سواء من ناحية الصوت أو اللحن أو الكلمات أوالأخلاقيات الفنية .

تحية طيبة وشكراً لكم على الإفادة .

اخى العزيز التفوق جه من ايه ؟ ان يبقى كل رجل فى مكانه المناسب .. يعنى زمان كان اى واحد بيغنى بنقيسه بواحد عملاق يعنى مثلا انت عايز تغنى اقول لك غنى لى حاجات لعبد الحليم واعطيك درجة وعشان تبقى يادوب بتغنى لازم تكون مثلا مش اقل من 60% من عبد الحليم .. لكن النهاردة الدرجة بتبتدى من واحد % يعنى تخيل مطرب واحد % من عبد الحليم يبقى شكلو ايه ... كان زمان اللى نفسو يغنى بيحفظ كل اغانى عبد الوهاب النهاردة اللى عايز يغنى بيبتدى من تامر حسنى وانت نازل

مع اطيب تحياتى عادل صموئيل

[عادل صموئيل]

ياعزيزى هيثم

قيمة المطرب فى ايه ؟ اول حاجة ان تكون اذنه موسيقية يعنى بيقول كل النغمات اللى بيغنيها صح وتكون صريحة بحيث انك انتلما تسمعها تحسها واضحة يعنى الفرق بين السى والسى بيمول مثلا تلاحطدظ كل مطربين زمان النغمات صريحة جدا جدا بحيث انا مثلا وانا بدون اسمع ما يحصلش عندى اى شك فى النغمة اقول دى كذا ولا كذا اللى بيعطلنى ويشغل مخى التفعيلات الايقاعية لكن انا شخصيا لما يحصل عندى التباس فى النغمات اللى بسمعها يبقى اللى بيغنى ده مش مطرب ولكن بتاع بطاطا
الشىء المهم ان الفرق بين مطرب وآخر هو نوعية ونكهة وطعم صوت المتميز وده اللى بيميزه ... يعنى لما يكون الجمهور بيمسعم عبد الوهاب مثلا وتشبع بصوته لو جه واحد تانى صوته شبه عبد الوهاب كان الجمهور بيلفظه لنو تقليد واحنا عندنا الاصل .. وكان التميز فى صوته الطبيعى وانا اكرر اناسمعت صوت كل المطربين الكعالقة على الطبيعة فى البروفات وكنا زمان ( مش زى دلوقت ) فى البروفات عمر مامطرب استعمل حتى ميكروفون فى البروفة كنت بسمعهم على الطبيعة كان الصوت اللى بسمعو هو صوته اللى فى الراديو وهو اللى فى التسجيلات بجميع انواعها بس كان زمان اخطر شىء مهندس الصوت اللى بيطلع صوت المطرب زى ما هو بالظبط لذلك كان كل مطرب بيبقى عندو مهندس صوت بيتعامل معاه على طول يعنى ام كلثوم كان مهندس الصوت بتاعها اسمو جلال نوارة وكانت مش بتناقشه فى موضوع الصوت لأنو خلاص فهم هى عايزة ايه عبد الحليم ووردة وفايزة كان مهندس الصوت بتاعهم اسمو زكريا عامر ومرة حادثة شهيرة كانت الاذاعة جابت ديسك جديد فيه امكانيات عالية جدا وكنت واقف مع عبد الحليم وزكريا عامر كنا فى تسجيل احد الاغانى وزكريا قال لو ممكن احط لك شوية صدى صوت عبد الحليم اعترض بشدة وقال لو لما الجمهور يسمع التسجيل ده بعدين يسمعنى بدون صدى الصوت حيقول ده مش صوتى ... كان زمان فيه اعتزاز بالشىء الطبيعى يعنى المؤثرات الصوتية دى تزوير لصوت المطرب عاملة زى ماتشوف واحد بيرفع اثقال شايل 300 كيلو جرام وهم مش 300 يعنى مكتوب عليها 300 وهى خمسين فقط .. او لاعب بيجرى سباق جرى ولكن واخد منشطات او حصان بيجرى السبق وواخد منشطات .. طان زمان الاعتزاز بالطبيعى يعنى مثلا زى الصناعات اليدوية انت لما تنزل عندكم فى السوق العربى وتشوف التحف اليديوة دى قيمتها كبيرة لأن واحد فنان قعد يشتغلها جزء جزء غير اليوم الصين بتعمل الحاجات دى فى مصانع كان الفنان زمان بيعمل القطعة فى شهر الصين بتعمل منها 1000 واحدة فى اليوم لكن مالهاش قيمة حتى تلاقى السواح مش بيشتروها ويتهافتوا على الحاجات اليدوية
يعنى اقول لك على حاجة لو انت بتسمع اغانى هندية مثلا عندهم عيب خطير جدا جدا مع ان اللحن حلو الغناء حلو والفرقة حلوة لكن العيب ان الصوت واحد يعنى من خمسين سنة الصوت النسائى كلو نكهة واحدة والصوت الرجالى كلو نكهة واحدة وطلع كلام ان فيه اتنين ستات واتنين رجال هم اللى بيغنوا كل الاغانى دى كلها .. بالطبع انا ما اقدرش اجزم لأنى بسمع خمسين اغنية اسمع نفس نكهة الصوت هى هى .. واقول على السرعة والبطء كلمة تانية انا حالا مدون لكن اغنية اقول لك ايه عن الشوق ياحبيبى بتتميز ببطء شوية فى اجزاء كتير بس اتحدى حد من اللى بيغنوا دلوقتى يعرف يقولها حايقع فى الوحدة خمسين مرة لأن البطء بيحتاج مطرب عندو حس عالى بالوحدة يعنى التطويل بالمللى اد ايه مع اطيب تحياتى

[منذر44]

استاذي العزيز عادل صموئيل
وبعد ان تعلمت التدوين على برنامج انكور بفضل توجيهاتك وارشادتك
اقدم لك اول نوتة من تدويني وهي اغنية احب دمشق لفيروز
وانا احبوا في اول خطواتي اتمنى منك التقييم والنصح والارشاد
واين موضع الخطأ والصواب
مع اجمل تحياتي
اخى العزيز
طبعا الواحد بيكتب وبيجرب وكل مرة لما بتظهر اخطاء بيتفاداها المرات القادمة بإذن الله وانا شخصيا ما بقيتش كده فى يوم وليلة يعنى اخدت اجرب واغلط واصلح سنوات طويلة بس انت من حسن حظك انى انا ممكن اختصر لك سنوات طويلة فى وقت قليل وانا بسعد بمساعدة اى حد بيحتاج مساعدة
انا شفت النوتة واللحن بسرعة بس اكتشفت كام حاجة صغيرين اول حاجة انت فى نهاية السطر الثانى ناسى مرجع بيرجعك الى اول النوتة
فى اسطر الثالث والرابع الجملة لاحظت انها بتتعزف 3 مرات والمرة الوسطى فيها تغيير لو كان هذا التغيير توزيع كان ينفع تتركها كده وتكتب عليها 3 مرات لكن طالما التغيير بتعملو الفرقة كان لازم تكتبها 3 مرات
فيه كمان حاجة مهمة جدا ودى ممكن تحصل فى الحان قادمة
انت كاتب علامة مى نصف بيمول تحت النغمة وده غلط انا عارف ان المكان مزنوق لكن فى انكور لها حل وهى انك تمسك النغمة اللى قبلها من رأس النغمة وتضغط عليها بالماوس وتحركها الى اليسار قليلا بتعمل توسيع للمنطقة وتحط علامة النصف بيمول فى مكانها الطبيعى ولو حصل ضغط وازدحام للنغمات اللى قبلها ممكن بنفس الطريقة تحركهم واحدة واحدة بحيث تمعل توازن وتنسيق لجميع النغمات اللى قبلها بحيث ان شكل المزورة يبقى متناسق والابعاد متناسقة ده اولا لتسهيل القراءة وثانيا عشان النوتة تبقى بالشكل الطبيعى العالمى اللى كل العازفين متعودين عليه
حاجة تانية انا لاحظت انك عامل اوقواس فوق اللزمات الصغيرة وسط الغنا وده برضو شىء مش طبيعى خد من القائمة جرافيك بيوجد فى ثالث سطر خط بتضغط عليها وتاخد الخط من اسفل القائمة واختار سمك الخط ثالث واحد من اليسار عشانيبقى مش سميك ومش رفيع واسحبو فوق اللزمة وممكن تحركه بعدين فى اى اتجاه زى ما انا بعمل
فيه كمان لو 3 كروشات بعدهم اتنين دوبل البرنامج احيانا بيخليهم علامة واحدة انت ممكن تفصل اى علامات ايقاعية انك تظللهم كلهم وتضغط كونترول زائد b حتلاقى انفصلوا بعدين تظلل العلامات اللى عايز توصلهم مع بعض وتضغط نفس العملية يوصلهم تانى ثم تكرر العملية مع باقى العلامات وجربها
فيه حاجة انا لاحظت ان بعض التدوين ممكن يكون اسهل من كده وبالتدريج طبعا حاتتعود بس بالطبع انا سعيد المحاولة ناحجة عموما
مع اطيب تحياتى

[armendo]

المشاركة الأصلية كتبت بواسطة فؤاد العلمي

أخي Sfakhri سؤالك يبدو بسيطا لكنه في غاية الأهمية.
أنا متفق تماما مع الأخوين العزيزين الأستاذ الآلاتي والأستاذ عادل. فالمسألة تعد لون غنائي يتلائم مع المطرب. أما من ناحية المقدرة التقنية فالمطربين الطربيين لهم الإستطاعة لغناء أي لون سريع دون أدنى مشكل.
أما من ناحية الصعوبة، هناك ثلاث نقط:

السرعة: طبعا إذا أخذنا نفس الجملة الغنائية، فكلما ازدادت السرعة، ازدادت الصعوبة سواءا على المغني أو العازف.

الميزان: هناك موازين أصعب أداءا وعزفا من الأخرى، ف 3/4 أصعب من 2/4، وهناك موازين أصعب مثل 6/8 أو 10/8 أو 12/8 إلخ، وهي إيقاعات تتطلب حفظ دقيق (وأُسَطّر على كلمة حفظ)، وتركيز مستمر، حتى لو كان التيمبو بطيئا.
ملاحظة: من كثرة صعوبة عزف إيقاع الفالز 3/4 أو 6/8، أحيانا العازف، لتسهيل العملية، فإنه يجعل الإيقاع وكأنه 2/4، أي أنه يجعل كل نوار بوانتي وكأنها نوار. أي عوض أن يعمل برجله 3 حركات (نوار+نوار+نوار)، يعمل فقط حركتين، نوار بوانتي+نوار بوانتي. (أتكلم هنا عن العازف الماهر).

اللحن: نجد ألحانا في نفس السرعة ونفس الإيقاع، ومع ذلك تختلف الصعوبة، لأن بعض الألحان تتحتوي على البلانش والروند والدوبل كروش في نفس الجملة مما يزيد من صعوبة أدائها، بالنسبة للحن الذي كله نوار مثلا.
أخي Sfakhri عندما قلت إن في البطء الوقت الكافي للمطرب، فأنا لا أتفق معك 100 في 100، لأن ذلك البطء هو سيف ذو حدين، لأن المغني قد يتوه ويخلف الموعد مع الدوم، وكمثال على ما أقول مقطع يطول بعدك في أغنية أروح لمين، فهو إيقاع 4/4 وبطيء، لكنه في قمة قمة الصعوبة (أنا استمعت إلى البعض من المحترفين يكسرون الوحدة لأنهم يغنونها على 2/4).
هناك صعوبة أخرى تتعلق بتغيير المقام، خصوصا الخروج من السيكا المصورة. مَن من مطربي هذا العصر يستطيع أن يغني أغنية عبد الوهاب سهرت منه الليالي في مقطع كل الأحبة رفقا بحالهم... أو أغنية شمس الأصيل في مقطع أنا وحبيبي يا ليل غايبين عن الوجدان؟ أقول وبكل تأكيد لا أحد (إلا من يملك تكنيك عالي جدا، مما يعد على رؤوس الأصابع في كل البلدان العربية).
مع تحياتي الخالصة- فؤاد

اخى وصديقى العزيز فؤاد...اتفق معك تماما فى ان الأصوات الطربيه قادره على ان تؤدى اى شكل من اشكال الغناء دون اى مشاكل,وسأعطى مثلا على ان الأصوات الطربيه تستطيع ان تؤدى الأغانى السريعه دون مشاكل وكيف ان ملائمة هذا الشكل من للصوت الأغانى يؤثر على نجاح الأغنيه من عدمه .... فلنأخذ تجربة الملحن الرائع صلاح الشرنوبى مع السيده ورده رحمها الله وانا ارى ان الشرنوبى استطاع ان ينقل ورده نقله نوعيه شديدة الأهميه فى مسيرتها الفنيه من خلال اغنيتى بتونس بيك وحرمت احبك وقد ادتهما بإقتدار ونجحت هذه الأغانى نجاحا كبيرا فى اوساط الشباب وغير الشباب.

وايضا كانت هناك تجربه للرائعه فايزه احمد مع الرائع محمدسلطان من خلال ثلاث اغانى منذ اكثر من خمسه وثلاثون عاما ولم يكتب لها النجاح برغم انه من الناحيه التقنيه فقد ادت ورده الأغانى بإمتياز الا ان هذا النوع من الأغانى لم يكن ملاءما لصوت فايزه ولم يتقبله الجمهور منها.

وهنا اود ان اتساءل لماذا نجحت ورده ولم تنجح فايزه ؟, اعتقد وفى رأيى الخاص ان هناك من العوامل التى تمس شخصية المطرب والتى تنعكس على راى الجمهور حتى يتفاعل مع هذا النوع من الأغانى.

واخيرا اود ان اشكرك على هذا الشرح الجميل للصعوبات التى يجدها المؤدى او العازف عند اداءه للجمل اللحنيه السريعه وذلك عند استخدام الموازين الصعبه والتى اشرت اليها من خلال شرحك الجميل.

اما فيما يخص تبطيئ اللحن فانا اتفق مع صديقى سليم فى انه يعطى فرصه للتجويد والتصرف والسلطنه وفى كل الأحوال فاننا نتحدث عن مطربيين محترفون ويحترمون الوحده بحكم خبرتهم الطويله.

اما فيما يخص الصعوبه فى تغيير المقام فانت محق تماما ولكنك تتحدث عن خوارق موسيقيه مثل السنباطى وام كلثوم وعبد الوهاب وانا الى الآن لا احب ان اقترب من عزف مقطع (انا وحبيبى يا ليل ) شديد الصعوبه فى العزف بالنسبة الى على الأقل فقد فشلت فى عزفه فشلا ذريعا وحسبى الله ونعم الوكيل.

مع ارق تحياتى

احمد (ارمندو )
احبائى
ممكن اقول حاجة عملية وعلمية تحسم الوضوع
انت النهاردة لو اشتريت سيارة جديدة على الزيرو انظر فى عداد الكيلومتر لو لقيت سرعتها القصوى 200 كم
وحسب قوانين السرعة فى مصر اقصى سرعة مسموح بيها فى الطريق الصحرواى للسيارة 100 كم
وانا واحد مش بحب اخرق القانون يعنى لما بسافر فى الصحرواى عينى دايما على عداد السرعة بحيث لايتجاوز المسموح اولاعشان ما آخدش مخالفة وثانيا وهو الاهم ان اللى حدد السرعة ب 100 كم واحد خبير ومراعة الامان والسلامة
ولو انا ماشى فى شارعنا مثلا شارع عين شمس العمومى لما يبقى فاضى خالص انت لو مشيت بسرعة 20 كم / ساعة تبقى سرعة جنونية والسائق اللى بيفهم بياخد بالو من ظروف الشارع .. تعالوا نثارنها بالموضوع المطرب القدير يقدر يغنى على اى سرعة للحن بس بشرط اولا انه يكون مقتنع بالجملة السريعة وحاببها وثانيا انها تبقى تلوين للون بتاعه لكن ما يغيرش لونة 180 درجة يعنى تبقى جملة فى وسط اللحن زى فى هذه ليلتى ياحبيبى طاب الهوى مثلا بتديك لون جميل فى السرعة لكن بعدها بتغنى ادليب يا حبيبا قد طال ..
ونرجع للسيارة لو عداد الكيلومتر بتاعك فيه سرعة 200 انت لو مشيت على 200 الموتور حايسخن ويولع ويزعق ويستغيث لكن لومشيت على سرعة 100 السيارة بتتاهدى بنعومة والموتور شغال فى نصف طاقته والخلاصة ان السيارة لما تكون ماشية على سرعة 100 بيبقى لسه فيها سرعة اكتر كتير .. لما تيجى لأم كلثوم مثلا تلاقى اصعب اغنية غنتها ده نصف طاقتها .. يعنى بتبدع وهى كانها قاعدة مرتاحة بتشرب فنجان قهوة .. مرة محمد فؤاد غنى مذهب لم كلثوم انا حسيت ان هذا الكوبليه اكتر من طاقته عشر مرات فهمتم الفرق ؟ وفيه كلمة مهمة جدا فيه فرق بين الطرب والرقص الطرب محتاج ايقاع زى الواحدة الكبيرة زى كل ليلة وكل يوم
مع اطيب تحياتى عادل صموئيل

[منذر44]

استاذي العزيز عادل صموئيل
اسعدني كلامك جدا جدا وفعلا انا محظوظ بوجود ك فعطاءك الغير
محدود يعود بالفائدة على الجميع
سوف اخذ بنصائحك القيمة في المرات القادمة
مع اجمل تحياتي

[منذر44]

استاذ عادل
وبعد توقف النقاشات لفترة طويلة ارجو ان تحدثنا عن كيفية بدأ علاقتك بالكمبيوتر
وكيف تعرفت على منتدى سماعي وكيف بدأت علا قتك بكتابة النوتة في المنتدى
وذلك حتى نستفد من خبرتك وتجاربك
مع تحياتي
اخى العزيز
سؤالك حلو ودرس ممكن تتعلموا منه
انا من مدرسة ام كلثوم وعبد الوهاب والسنباطى والعمالقة .. يعنى اثروا عليا فى كل شىء فى حياتى .. ومنها حاجات خطيرة زى التواضع الجم وعدم حب المنظرة والحفاظ على التراث وانى احب الاشياء اللى بستعملها واحافظ عليها كالجديدة عشان تبقى كفائتها 100 % وانا كنت بصلح تقريبا بإيدى كل الاجهزة اللى عندى وعندى بالطبع اجهزة تهبل يعنى .. المهم ان من ضمن الحاجات اللى اتعلتمها انك ماتنساقش ورا الموضات اللى بتطلع
لما ابتدأ الكمبيوتر المنزلى ينتشر فى المصر ( وكلمة المنزلى لن الكمبيوتر الاول كان حجمه اد العمارة وبتاع مؤسسات فقط اول مانزل مصر )كان سنى 52 سنة مالفتش نظرى الاول بصراحة .. لكن شاءالقدر انى كنت بزور واحد من اعز اصدقائى اسمه الحاج محمود فهمى هو عارف طبعا انى بموت فى التسجيلات والشرئط والاسطوانات وخلافه قال لى تعالى اوريك حاجة تجنن
وفتح الكمبيوتر ودخل على فولدر مكتوب عليه ام كلثوم فتحه لقيت كل اغانى ام كلثوم ومعمولة بابجدية يعنى عايز تسمع فكرونى تروح عند حرف ف وتفتح الاغنية .. ملاحظاتى الخبيرة كذا حاجة طبعا يعنى كمية الاغانى دى تساوى مثلا 100 شريط وثانيا انك فى ثانية تشغل الاغنية اما الشرائط بالذات لما يكون عليه عدة اغان ممكن تقعد ساعة تبحث عن اغنية ما .. وفتح فولدر تانى عبد الوهاب وثالث عبد احليم انا بصراحة اتجننت يعنى خرجت من عنده زى الفلاح اللى اول مرة يشوف المدينة
انا من عادتى بدرس اى موضوع كما ينبغى يعنى قعدت اعمل تحريات من اصحابى اللى عندهم كمبيوتر يعنى ايه احسن ماركات والامكانيات وهكذا وبعدين اشتريت اغلى كمبيوتر كان موجود فى الوقت ده كان بانتيام فور وكان ثمنو 6000 جنيه مصرى يعنى مايقرب من اقل شوية من 1000 دولار .. وبعدين اكتشفت انك ممكن تكتب عليه نوتة .. ودخلت فى العملية اشتريت طابعة وسكانر وكاميرا ديجيتال ثم طابعة تانية ثم طابعة ليزر الوان دى احدث حاجة وجبت سكانر خطير لأن كل ما ايدك تمشى ف العملية يعنى امكانياتك العملية بتزيد بتحب تشترى اجهزة كفاءتها اعلى .. زائد طبعا ابتديت استكشف برامج تساعدنى فى شغلى يعنى من اخطر مشاكلى لما بكتب نوتة من شريط ايام الكاسيت ( لأنى اصلا كمحترف الصح ان الملحن بيملينى بالعود يعنى بيعزف مازورتين مازورتين وانا اكتبهم ) اما اكثر شىء متعب لما تكتب من كاسيت المفروض زى ماقلنا انا الاول بسمع الجملة كذا مرة افهمها مقامها وميزانها يعدين اشغل مازورتين من كذا مرة استوعبهم اوى بعدين اكتبهم المشكلة التسجيل كان بيجننى لأنو لما برجع المازورتين بيرجع كتير ويضيع المكان اللى انا بشتغل فيه والمطلوب يكون محدد جدا عشان مخى لا يتشتت .. انا بحب الاستكشاف ورفع الكفاءة اكتشفت برنامج اسمه كول اديت ده برنامج خطير يعنى بيطلع اللحن اماك مرسوم على الشاشة زى جهاز رسم القلب وممكن تقف على المازورتين اللى بتكتبهم بدين تنقل المؤشر على اللى بعدهم بقى طبعا مريح جدا فى الكتابة ( بالمناسبة انا زمان لما طلبوا منى اكتب من غير ليه من شريط الكاسيت بعد ماكتبت اللحن جهاز الكاسيت كان اتدمر من كتر التقديم واالترجع ورميته ) من مميزات كول ايديت انك ممكن تعمل عليه مونتاج للموسيقى يعنى تحذف وتنقل وتشيل وتضيف وانا بقيت حريف اوى فيه يعنى ممكن اشيل من كوبليه حرف من كلمة واستبدله بحرف تانى وخدمنى جدا جدا جدا فى تسجيل معزوفاتى اللى على المنتدى يعنى انا لما كنت بسجل كنت بعمل الطريقة اللى اتعلمنا بيها التسجيل يعنى اسجل الكوبليه كذا مرة والجملة الواحدة بعيدها كذا مرة بحيث تطلع احلى حاجة بعدين اقعد اعمل المونتاج اختار احلى حاجة .. انا الاول طول عمرى كنت بدون بالقلم الرصاص على ورق موسيقى بعدين لما ابتديت ادون على الكمبيوتر ورفعت كفائتى فى انكور بقى كل شغلى كمبيوتر واطبعه كان طبعا كل العملاء بتوعى فى السوق بيتجننوا لأن كان مطبعة .. بعدين دخلت المنتدى هنا من خمس سنوات الاول لقيت قسم المبدعون يعنى عرفتهم بنفسى ونزلت لهم معزوفة اول حاجة ليالى الشرق حسيت انها عجبتهم اوى وابتديت انزل يعنى وصلت لأكتر من 100 معزوفة .. لعلمك المنتدى هنا كبير جدا جدا جدا يعنى صعب انك تلم بكل اللى فيه يعنى شوف انا هنا اد ايه يمكن ماشفتش 20% من المواضيع من كترها .. اكتشفت ان فيه قسم للنوت دخلتو .. بصراحة النوت ماعجبتنيش خالص اولا مكتوبة بالقلم ومتصورة صور رديئة جدا واكيد انت بعد ماتشوف نوت الكمبيوتر مش حاتطيق تشوف نوتة بالقلم لأن كمان القلم ممكن نغمة انت مش عارف دى مى ولا فا .. كمان لفت نظرى النوت مكتوبة للمحترفين اوى يعنى صعبة جدا جدا ولما دققت لقيت فى معظمها غلطات كتير فنية .. بعدين لفت نظرى ان بعض الاخوة بيطلبوا طلبات نوت وماحدش بيسأل فيهم لأن وقتها كان اللى بينزلوا نوت بينزلوا من حاجات عندهم او كتب يعنى مش هم اللى بيدونوها فانت لو طلبت نوتة انت وحظك عندهم ولا لأ
وابتديت كتبت نوتة من الطلبات دى ونزلتها طبعا فيه ناس اتجننت وقالوا عايزين وعايزين والتفتت الى ادارة المنتدى وقالوا اعمل موضوع اسمه طلبات النوت خاص بيك واعطونى الاشراف عشان آخد حريتى فى التنظيم للمواضيع وكانت .. والقسم بعد ماوصل ل 900 صفحة وكاد ان ينفجر ادارة المنتدى قالت نقفله ونعمل واحد تانى هو اللى شغالين فيه دلوقتى ... اهم ما فى الموضوع ان كذا اخ من الاخوة الاعزاء اللى ممكن يدونوا لما لقوا انا فتحت السكة ابتدوا هم كمان يعملوا مواضيع وانا شجعتهم يعنى عملت ثتبيت لمواضيعهم وصار لكذا عضو موضوع خاص بيه وتيجى لو طلبات يعنى تلاقى المتخصص فى الشامى والفلسطينى والمتخصص فى دول المغرب العربى وربنا يزيد
كفاية كده وانا تحت امركم فى اى اسئلة
مع اطيب تحياتى عادل صموئيل

[منذر44]

استاذ نور الصباح
كل عام وانت بخير وعيد ميلاد متجدد
وفي هذه المناسبة سوف اهديك نوتة اغنية بدأت كتابتها اليوم

[عادل صموئيل]

احبائى
انا لوقلت لكم عن فوائد الكمبيوتر يعنى الكلام المفيد ممكن ما يخلصش
بعد ما كتبت الكلام الكتير اللى فوق تذكرت حاجات اكتر بس تحملونى
انا كل ما افتح انكور بقول الله يرحمك ياوردة
كنا ايامها بنكتب النوتة بالقلم الرصاص ( اقصد الاستاذ المدون طبعا ) فى الفرق الصغيرة كان بيصوروا منها نسخ ويشتغلوا بيها بس طبعا خطورة الرصاص ان المدون عادة بيكتب وهو مستعحجل مفيش وقت يعنى يجمل كتابته ودايما كانت بيقى الخط ردىء جدا اقل حاجة انك لما تيجى تكتب نوار او كروشين مثلا او 4 دوبل كروش اهم شىء رأس النغمة ولازم تبقى محددة هى على خط ولا مسافة بعدين لازم تخلى الراس دى تقيلة يعنى ماتبقاش نقطة يعنى اقصد انك بالقلم تخليها زى الزيتونة يعنى تعمل عليها كذا لفة مش نقطة وخلاص لأن النقطة ممكن تنحرف ربع ميللى انت تقصد فا اللى يشوفها يقراها مى او صول .. كان فيه طريقتين عندنا فى الماسية كان يوجد نساخ متخصص فى نسخ النوت يعنى بنتصل بيه ييحى ينقل النسخ الرصاص ويكتبها بالريشة والحبر الشينى كان اسمو عبد الملاك الله يرحمه طبعا كان خطه جميل جدا .. لو مش موجود انا كنت بكتب شغلى يعنى بنقله بقلم فلوماستر وانقله على مهلى عشان يبقى النغمات واضحة
المهم مرة فى بروفة وردة قالت : مافيش ماكينة تكتب النوتة دى قلنا لها ده حلم يعنى ( زى اول واحد فكر يطير )
كانت من قبل فى اوروبا كل الكتب الموسيقية اللى درسنا منها فى الكليات كتب تعليم البيانو والآلات المختلفة
النوتة بيكتبها نساخ خطو جميل جدا وبعدين بيتعمل لها زنكوغراف بتطبع بيه .. يعنى خلوا بالكم ان كل الكتب اللى قبل الكمبيوتر متكوبة بخط اليد .. بس طبعا العملية دى كانت مكلفة جدا جدا يعنى ما ينفعش نعمل العملية دى عشان نعم منها 15 نسخة مثلا ولكن لكتاب اوروبى بينطبع منو عشرات الملايين من النسخ
يعنى النوتة اللى إنتم بتنعموا بجمالها دلوقتى ايام الماسية كانت حلم بعيد اوى لأن كتابة النوتة غير كتابة الكلمات
من اخطر فوائد الكمبيوتر ايضا كنا زمان لو انت عايز اغنية ما لو حديثة ممكن تشترى شريط كاسيت لو اقدم او قديمة صعب او مستحيل تلاقيها فى السوق كانت محتاجة لازم يكون عندك عشر اصدقاء عندهم هواية جمع الاغانى وتتبادل معهم لكن كان ممكن تقعد شهور عشان تلاقى الاغنية انا فيه دعاء لفايدة كامل اسمه اللهى قعدت متربص اكتر من 15 سنة للراديو عشان اسجلو انه يتذاع كامل النهاردة بتكتب على جوجل اسم اى حاجة بينزل لك منها على كذا موقع وانت تختار دلوقتى حالا اخ من سوريا طلب اغنية بكره انت وجاى هى عندى طبعا على سى دى قلت لسه حاقوم وادور فى السيديهات ونزلتها من موقع موالى فى دقيقتين
فيه حاجات فنية خطيرة جدا بالنسبة ليا انا شخصيا عندى برنامج بيرفع التون ويخفضو يعنى كل تكة بنصف تون اعلى او اسفل .. ده بيفرق معايا كتير جدا جدا يعنى اولا كل اغانى ام كلثوم طبقة صغيرة يعنى انت لو عزفت معاهم اعنية كل ليلة وكل يوم تلاقيهم بيقولوها من سى بيمول لكن هم بيقولوها من دو عادى لأنهم خافضين الآلات تون ( فاهم )
انا مش معقول اكتب الاغنية من سى بيمول يعنى تخيل راست ع السى بيمول صعب جدا فى الكتابة ومش ممكن يقراه غير واحد % منكم .. بنزل الاغنية على هذا البرنامج واسمه ادويو سيتى وانزلها او ارفعها زى ما انا عايز واحفظ منها نسخة اكتب منها .. كمان فيه خاصية اخطر ودى بالذات اعجاز ان ساعات بيبقى جملة سريعة بشكل غبى مش عارف استوعبها كما ينبغى ( وكلمة بشكل غبى مش بقولها اعتباطا يعنى انا بالطبع متعود على الجمل السريعة عادى جدا لكن ساعات ملحنين بيعملوها سريعة اوى وملخفنة يعنى النغمات معمولة بفزلكة مقرفة اى واحد لو كتبها حايكتبها غلط ) تميز البرنامج ده انك ممكن منه تخفض سرعة الجملة زى ما انت عايز عشان تستوعبها الاهم والاخطر انك لما تلعب فى السرعة بأى درجة التون مش بيتغير يعنى على اجهزة التسجيل لو السرعة زادت او نقصت التون بيتغير ودى مصيبة فى حد ذاتها يعنى اختلاف سرعة بين جهاز تسجيل وأخر ممكن يخلى الاغنية تسمعها ناقصة مش نص تون ممكن تكون خاسة او زائدة ربع تون ودى مستحيل حد يقدر يكتبها لأن البيتش اللى انت سامعو غير بيتش البرنامج اللى بتكتب بيه ويخليك تشك فى كل نغمة تكتبها ... الخاصية دى لو كان العمالقة بتوع زمان شافوها كانوا اتجننوا وألاف الميزات الاخرى .. يعنى مثلا انكور غربى 100% بالحاجة والتى هى ام الاختراع شوف انا بكتب عليه النوتة الشرقى ازاى
وللعلم بتوع شركة انكور نفسهم لو شافوا النوت بتاعتى حايتجننوا ازاى البرنامج ممكن يطلع منه كده بس هم برضو عباقرة يعنى لما عملوا الموازين مثلا عملوا الموازين التقليدية المعروفة الغربية لكنو اعطاك خيار انك ممكن تكتب اى رقمين على بعض يعنى تعمل اى ميزان يخطر ع بالك وميزة خطيرة تانية انك ممكن تختار عايز كم مازورة فى السطر اقصد نخليها مازورة واحدة للأدليب وميزة ثالثة ان فيه ايقونه بتلغى العداد بتاع الميزان يعنى لو عايز تحط ابجيكاتورا يعنى الحلية الكروش الصغيرة ما ينفعش تحطها لأنها فوق عدد نوارات الميزان بكروش فعملوا ايقونة بتلغى الميزان وقت ماتحب وحط زى ما انت عايز بعدين الغيها وكمل شغلك وميزة خطيرة جدا كمان انك اى حاجة او علامة او مدرج بتكتبه ممكن تحركه وتحطه مطرح ما انت عايز بالمللى دى طبعا سهلت اننا نعمل الدليل الشرقى او نكتب العلامات الشرقية بفونت يعنى نحطها فى اى مكان بعدين نسحبها فى المكان المطلوب شفتم بقى انا بحب الانكور اد ايه ؟
فيه كمان حاجة خطيرة جدا جدا انكور عامل من اول مابدأ لدلوقتى اكتر من 6 اصدارات هم كلهم واحد فى التدوين تقريبا يعنى مافيش اى اختلاف الاختلاف فى حاجت زى بنك الآلات ووده كلهم صوتهم زبالة ونا مش بستعمل غير البيانو لكن الاختلاف انك لو غيرت جهازك بجهاز احدث او طابعتك بطابعة احدث ممكن الاصدار اللى عندك مايشتغلش وهنا لازم يكون عندك اصدارات اعلى منه ... او تحط ويندوز 7 او اعلى وللعلم انا بستعمل اكس بى لأن معظم برامجى قديمة وعشان ما ادخلش فى مشاكل
شفتم الكلام اد ايه ... ولسه بس انتم لو تحبوا اسألونى انا تحت امركم
مع اطيب تحياتى

[منذر44]

استاذي العزيز وانا الان اقرأ ردك اراك معي في نفس الصفحة عى اللاين
اقول لك الف صباح الخير ولكن اخشى انقطاع التيار الكهربائي الذي اصبح
عقدتنا في سوريا

[adib aburuman]

استاذي الغالي نور الصباح المحترم
كل عام وانت بألف خير صحة وعافية
بمناسبة عيد ميلادك
أخوك الوفي
اديب.