فؤاد حداد شاعر شعراء العاميه

[MOHAMED ALY]

تبارك الله

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
نيلى فراتى
أشرب زلال
وأقرأ وردي
وارعش يا ولدي
من تحت جلدى
فى الابتهال
تبارك الله ذو الجلال

الله رحيم
إن كنت باطمع
قلبى سليم
فى عينى يلمع
نور النعيم
وبودنى أسمع
أدان بلال
تبارك الله ذو الجلال

الله ودود
أحب وطني
من غير حدود
وانقى قطني
من كل دود
واخد في حضني
كل العيال
تبارك الله ذو الجلال


الله لطيف
تغنينى لقمه
من الرغيف
عن جنس لؤما
وأنا الضعيف
من أجل حكمه
أشيل جبال
تبارك الله ذو الجلال


أشيل جبال
وأخد في حضنى
كل العيال
اسمع بودنى
أدان بلال
طريقي خالي
من الضلال
حالف ما أخاوي
إلا الحلال
كل الخطاوي
على كل حال
حتنحسب لي

المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال

وكل شبر وحته من بلدي
حته من كبدي
حته من موال :

يا أبو القلوب اللي بتسنبل وبتزهر
واللي بتبني الحياه وتشيلها وتعمر
أنا قلبي من نفسه يطلق نفسه ويعبر
عن فرحته بالبطل ويغني ويصور
فتحت بحرين وعليت العلم الأخضر
طلعت سربين تقبل فينا وتبحر
قلنا الصباح وأنت صحتنا بصباح أكبر
يوم القنال أنت جددته بيوم الأزهر
الله أكبر ولما طلعت ع المنبر
نفس الشهيد علي عمدان الحرم كبر

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

أبو فصادة



اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
مغنواتي
وكلامى دوا
لازم يدون
فى من تلوى
ومن تلون
كمثل سمكة
بتعوم فى كنكه
وعامل لى راجل
شديد فى بأسه
ع الخضرة أحضر
ع الصفرة أصفر
ع البيضه أبيض
والكل فاقسه
لكن ما همش
صاحبنا همش
على الدفاتر
وقال تآنسوا
بيروقراطي
يقول قيراطي
فدان بيطرح
دهب بلمسه
فدان بيطرح
من غير ما أفلح
غيرى اللى يسرح
ورا جمايسه

لكن الحكايه
لها نهايه
الريش حيسقط
اللي أنت لابسه
أراد صيدا
وكاد كيدا
أبو فصاده
فصاد نفسه
مثل ضربته
والا انضرب لى
علي غرابته

المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال

وكل شبر وحته من بلدى
حته من كبدى
حته من موال

كان عندي زغلول ورايح للطبيب عارضه
جسمه رقيق ما تعرف طوله من عرضه
خده انجرح في النسيم لما النسيم عارضه
يا للي حزين ع الي فات وقتلت زغلولى

كان عندى حب الدره أبرك من اللولى
حزنك على مال مكلفني الشقا والغم
والدمع والدم من عينى ومن عين أبى
أدى البلد نورت بالورد والعــــــــــــنب
ورجع لى زغلولي مالك ثورته وعرضه

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

القدس

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى يا مؤمنين
منقراتى مد الأنين
الله على رعشة الحنين
عمره ما كان الامل ضنين
يا قدس نوارة السنين
كأن عينى فى ميتمى
يا قدس ما يحتمل دمى
الا أشوفك و أرتمى
و أبوس ترابك المريمى
أبوى و ابنى على فمى
ما أتوهش يا قدس فى المطال
سقاك من دمعته الهلال
يا قدس يا سبحة الشقا
الأعمى فى سجدتك رأى
و الفجر من صخرتك سقى
يا قدس تتفجر الجراح
و الصبر حرب و أيوب صلاح
يا أخت من مكه و البطاح
قلبى انضرب للعرب و صاح
لا بد من فتح فى الصباح

المشى طاب لى
و الدق على طبلى
ناس كانوا قبلى
قالوا فى الأمثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

لما تقول اجمل ما فى الدنيا ..الميه للعطشان
يعرفوك عربى
اما للراوى ريحة البرتقان فى مداخل يافا
يعرفوك عربى
لما تقول ابنى اتولد لاجئ
يعرفوك عربى
لما تقول يا رب
يعرفوك عربى
لما تباشر جهادك.. ترمى اوتادك
فى قلب دابح ولادك
يعرفوك عربى

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

الكعـك



اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتي
منقراتي
خالاتي عماتي سيداتي
على تل عجوه وعسل وسمن
ولا مجلس الامن سهرانين
لت وعجين
يبنوا الهرم
قالت حماه المحترم
ياكعك ياسيد الكرم
نبطلك في المشمشي
يابنت قومي وفرفشى
لاتحوشى
ولا تختشى
احمي الوابور واستحمشى
اشى واشى
تلاقيه مشى
اشى نغبشى
واشى حبشى
واشى دندشى
واشى انقشى
واشى ينحشى
واشى رشرشى
سكر عليه
بركة ايديه
فرحة عنيه
قال ايه وايه

المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدى
حته من كبدى
حته من موال

قال واحد اتنين تلاته واللي كان في الجرن
كله انفتل وانقتل وانشال وراح الفرن
عيني على رصه راحت ولا رصه جات
عمال اسحر وانا ماشي ورا الصاجات

اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق

[MOHAMED ALY]

الحق واجب


اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى
منقراتى
استثماراتى
أمل و نيه
فى الانسانيه
الناس هنيه
و الشعب قيم

أختار و أقدم
اللى بيخدم
و يا مصر كونى
بهجة عيونى
هلالى ثابت
و عودى نابت
على ثراكى
علمى اشتراكى
ايمانى مسلم

أختار و أقدم
اللى بيخدم
لا نخلى واحد
ع الكرسى قاعد
يذل تانى
ملزوم يعانى
يقف مكهرب
و دمه يهرب
و يدنه يضرب
تعظيم افندم

أختار و أقدم
اللى بيخدم
خلينى أصبح
ايمانى اصلح
طريقى أملح
دول حديثه
بقلوب حسيسه
و دراع فواعلى
أسبق و أعلى
من قبل ما اهدم

أختار و أقدم
اللى بيخدم
خلى الليالى
توصل حبالى
و أدور أسحر
الجيزه الأزهر
و اللى فى بالى
يبان و يظهر
بحس عالى
أخنار و أقدم
اللى بيخدم
بالمسك أختم

المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :
يا اللى المعانى الكريمه تسعدك و تسر
شرع الكرامه اتوهب قبل الدهب و الدر
الحق واجب علينا فى كل ســـــــــــاعه تمر
رمضانى هدانى و هلال الهجره فى محرم
أنا ابن آدم مكــــــــــــــــــــرم ابن آدم حر

اصحى يا نايم وحــــــد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

ليلة القدر

اصحى يا نايم
وحد الدايم
وقول نويت
بكره ان حييت
الشهر صايم
والفجر قايم
اصحى يا نايم
وحد الرزاق
رمضان كريم

مسحراتى
منقراتى
يا رب يا رب
أنا ذو شجن صب
أهدينى للصبر

اخدم فى ناسى
و يدوم حماسى
وأوفى بالندر

وقلبى مالي
أبدر آمالى
للعالمين بدر

الرايه قلعى
والصارى ضلعى
قادر على البحر

للسعد إبنى
ولعينى جفنى
وللأمان بر

مالكين مصيرنا
ينصر ناصرنا
صبح لنا قدر

فى كل ناحيه
عينينا صاحيه
يا ليلة القدر

ليلة بكل السنه
الطاقه عرض السما
والطاقه فى الصدر

المشي طاب لي
والدق على طبلي
ناس كانوا قبلي
قالوا في الامثال :
الرجل تدب
مطرح ماتحب

وانا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدى
حته من كبدى
حته من موال :

يا بلدى نورك سرح فى كافة الأمصار
بدر الآمال بدر
مهاجرين فى سبيل الله مع الأنصار
غزينا فى بدر
ووفينا بالندر
لمنزل الوحى هادى الوحى والأبصار
فى ليلة القدر

اصحى يانايم وحد الدايم
السعي للصوم خير من النوم
دي ليالي سمحه نجومها سبحه
اصحى يانايم يانايم اصحى
وحد الرزاق

[MOHAMED ALY]

و لا كل مين

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى
منقراتى
ولا كل مين
فى الضلمه شقر
طبل و نقر
يعرف يسحر
يا مسلمين

و لا كل مين
عاش فى الحديقه
و قال فيه حريقه
على الحقيقه
اصبح امين

و لا كل مين
حط اللاوندى
ع القلقشندى
ينفع افندى
فى الفلاحين

و لا كل مين
كسر سنونه
و عمل لى نونو
يصدق جنونه
و يرجع جنين

و لا كل مين
له كلمه صابحه
فى ربع صفحه
و آراؤه صالحه
صلاح جاهين

و انا صحت صيحه
و لا كل مين
سحر و صحى
المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

[MOHAMED ALY]

صاحب ندا

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى صاحب ندا
منقراتى كدا و كدا
فى ايدى طبله مجوده
امشى على ريحة الندى
و النسمه فى الجو منشده
توالى موالى و الحدا
يا مصر يا واحه مسعده
نطقت و الفجر كان صدى
حتى الشجر فى الحجر شدا
لما بدأت التاريخ بدا
( لحمه و طول الزمن سدى )
انت الاميره المجاهده
الانسانيه ام الفدا
ام الحضاره يا والده
ضميت الازهر و السيده
و الف مادنه يدا يدا
سياج لامه موحده
يا مصر عيشى على المدى
و اهدينا ثانيه مخلده
اما الشهاده او الهدى
النصر الأكبر على المدى
يا كحل عينى يا منجده

و المشى طاب لى
و الدق على طبلى
ناس كانوا قبلى
قالوا فى الأمثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

صوموا و قولوا آمنا يا عباد الله
كونوا قلوب مطمئنه يا عباد الله
النصر فينا و منا يا عباد الله
احنا عرب و النبى عربى و ضامنا
ما ينكرشى يميننا يا عباد الله

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

القمر

اصحى يا نايم
وحد الدايم
و قول نويت
بكره ان حييت
الشهر صايم
و الفجر قايم
اصحى يا نايم
وحد الرزاق
رمضان كريم

مسحراتى فى شهر الصيام
منقراتى على الدوام
شوف القمر اكتمل تمام
من الف ليله و الف عام
قمر يراكم مغرب و شام
قمر تراحم قمر وئام
يا من تواصوا ألفين سلام
قمرمحجب بالابتسام
بشفه يحيى فيها الكلام
لاغى الحمام اللى فى الامام
فى السيده حن للمقام
ذكر معانا و قال ما بانام
ذكرت يا سعد يا كرام
و الليل قطيفه و لا ملام
تحت القمر قلبى فى هيام
من ليلة النصف للختام
فى ليلة القدر له مرام

المشى طاب لى
و الدق على طبلى
ناس كانوا قبلى
قالوا فى الامثال :
الرجل تدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

بعد الشهاده و بعد السجده للرحمن
حينكتب لى قيام الليل و صوم رمضان
و ما دمت عارف طريقى و صالح النيه
و كل خطوه تزيد اوصالى حنيه
فى ساعة الفجر يفتح لى الأمل رضوان

اصحى يا نايم وحد الدايم
السعى للصوم خير من النوم
دى ليالى سمحه نجومها سبحه
اصحى يا نايم يا نايم اصحى
وحد الرزاق

[MOHAMED ALY]

راجل عجوز

اصحى يا نايم
وحد الـــــدايم
و قول نــويت
بكره ان حييت
الشهر صــايم
و الفجر قــايم
اصحى يا نايم
وحد الــرزاق
رمضان كريم

مسحراتى تحت السمـــــا
منقراتى و لـــــــــــــربما
ضحكت سنانى المطرمه
يمكن يجــوز
راجل عجوز

لكن جوانحى بـــــيرفرفوا
فى صدرى بلبل انا اعرفه
من قبل نسمه ما تحـــــدفه
يلاقى نسمه بتــــــــــــلقفه
يمكن يجــوز
راجل عجوز

لكن مؤكد يا ســـــــــــيدى
الفن زهر على يــــــــــدى
ليالى سمحه و صباح ندى
اصيل و شارب من دا و دى
يمكن يجــوز
راجل عجوز

لكن فى رجلى عجل عجل
ماضى بماضى من العمل
ما حلو الا طعم الأمـــــل
بكره لعل و عسى عسل

المشى طـــاب لى
و الدق على طبلى
ناس كانوا قبـــلى
قالوا فى الامثال :
الرجل تـــــدب
مطرح ما تحب

و انا صنعتى مسحراتى فى البلد جوال
حبيت و دبيت كما العاشق ليالى طوال
و كل شبر و حته من بلدى
حته من كبدى
حته من موال :

بالله عليكم يوم العيد تـــــــــــــرقوا له
دلوقتى لما تشوفوه مع طبلته قـــــولوا
راجل عجوز ماشى ويا شويه من قلبه
الفجر فوق الطريق هما اللى شقــوا له

اصحى يا نــايم وحد الـــــدايم
السعى للصــوم خير من النـوم
دى ليالى سمحه نجومها سبحه
اصحى يا نــايم يا نايم اصحى
وحد الرزاق