المسحراتي
(الحلقات التليفزيونية آداء سيد مكاوي وأشعار فؤاد حداد)
(17)
.... ....
... مسحراتي السنة دي دايب من الحنية منأراتي أنادي على القنطرة الشرقية ... ارجع في سن ولادي والمركبة معدية الاقي في الناحية دي كل النجوم عسلية ... على الطريق الهادي قابلتني غنوة هدية الفجر يدن ديوكه قال الزمان ده ملوكه عساكر الوردية ... طالعين في عز شبابهم الله أكبر كتابهم الجنة والوطنية ... يا بدر يا رمضان يا فاتح الأحضان للملحمة المصرية اصحى يا نايم وحد الرزاق ... رمضان كريم ... وراح خيالي ف سرحة ولقيت دموع الفرحة ع الأرض طرحة الدبابات دهبية ... ورجلي فوق الجسور ومعايا كل العصور ... بتشترك في العبور لشاطئ الحرية ...
المشي طاب لي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... بالعودة يا سينا كل الدنيا بالأحضان ... يا بدر من بدري يا رمضاني من رمضان ... يا جنة الفجر يا حنية الأوطان ... أرضك ف عيني سما صوتك في ودني أدان ... نارك ف قلبي حنان ... رملك ف إيدي غيطان ... وانا ح اصوم و ح اصلي على التراب واللي حصلي أصبح وطن رمضان اصحى يا نايم اصحى وحد الدايم ... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق
رد: المسحراتي
العرض الشجري