المسحراتي
(الحلقات التليفزيونية آداء سيد مكاوي وأشعار فؤاد حداد)
(01)
.... ....
مسحراتي من الحواري يطل منئراتي في الندى والفل ... القلب أول ما سمع أول بيان في العصر إنسان بيحضن في الجميع الكل ... والدنيا خالية من الهوان والذل ... وكان مدينة وعذبة وكان بساط الأحبة اصحى يا نايم وحد الرزاق ... رمضان كريم ... وكان شوارع وكان أيام بيتقابلوا ... بكرة نده بعده وامبارح نده قبله اصحى يا نايم وحد الرزاق ... رمضان كريم ...القلب أول ما سمع أول بيان في العصر ... كان السما العالية والناس اللي فوق الحصر ... كل البشر فرحانين وكل البشر شعراء كل البشر حلوين ... كل الخُطب والمساطب والرطب عناقيده مدنة ياما سجدنا وفجر ياما نئيد ... وكل ضي ابتسامة وكل رعشة إيد ... وكلنا جنود وبنثبت رايات النصر ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... الشمس دقت على بابي وفتحت الباب لقيت ألوف البشر حاملين شجر ونخيل ... وكلهم عيلة واحدة وكلهم أحباب ... وكل ناحية جميلة وكل مصري عظيم ... في القلب أول ما سمع أول بيان في العصر ... اصحى يا نايم اصحى يا نايم اصحى وحد الدايم ... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق
رد: المسحراتي
العرض الشجري