المسحراتي - الصفحة 4

**حازم فودة** · #31 05/04/2025, 16h51

المسحراتي
(الحلقات الإذاعية آداء سيد مكاوي وأشعار فؤاد حداد)
(30)
... يا مؤمنين سبحوا الله يا مؤمنين سبحوا الله ... رمضان نزل فيه الكتاب المبين ... على رسول الله ودان الأنام ... وفيه ليلة القدر للموعودين ... لا تنسني يللي بلغت المرام ... يا مؤمنين سبحوا اللهيا مؤمنين سبحوا الله ... ادعي لأحبابك ينولوا المنى ... في الدين والدنيا وكل الأمور ... اعي لبلدك تنتصر ع العدا ... وتبعد عنها كل الشرور ... يا مؤمنين سبحوا الله يا مؤمنين سبحوا الله ... الأنس يا رمضان في قرب الحبيب ... وانت حبيب مؤنس لكل القلوب ... والوَحشَة يا رمضان لما تغيب ... كما يغيب النور بعد الغروب ... يا مؤمنين سبحوا الله يا مؤمنين سبحوا الله ... رمضان يا كل شئ فيك جميل ... وفرقتك تصعب على العابدين ... رمضان يا كل شئ فيك جميل ... وفرقتك تصعب على العابدين ... جعلتني يللي نويت الرحيل ... أودعك بالاشتياق والحنين ... يا مؤمنين سبحوا الله يا مؤمنين سبحوا الله ... يا مؤمنين سبحوا الله يا مؤمنين سبحوا الله ... يا مؤمنين سبحوا الله يا مؤمنين سبحوا الله ...

الملف الصوتي هنا

**حازم فودة** · #32 05/04/2025, 17h20

المسحراتي
(الحلقات الإذاعية آداء سيد مكاوي وأشعار فؤاد حداد)
(31)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي ع الشاطئ منأراتي هواه ناطق ... يا كل ناسي وأحبابي فتح القنال رد شبابي ثمان سنين حق شقانا لخمسة يونية اللي رأنا ... شرع السما والحرية حلم المدينة البحرية يا بور سعيد يا إسماعيلية الفجر الأبيض بحار ... احنا اللي غنينا ليالي وقلنا للدنيا تعالي وقمنا في الظهر العالي باسم السلام اللي دعانا ... يا ام القلوع المنصورة كل الحبايب في الصورة والدفة زي العصفورة والنسمة حنة وريحان ... طارحين شبكانا وطرحانة على الشطوط الفرحانة ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي طوال ... وكل شبر وحتة من بلدي حتة من كبدي حتة من موال ... أبوك شهد وابنك يشهد شد الحبال واصبر واجمد وهيلا هيلا يا محمد الشمس اهيه طالعة معانا طارحين شباكنا وطرحانة على الشطوط الفرحانة اصحي يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصح وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #33 05/04/2025, 18h32

المسحراتي
(الحلقات الإذاعية آداء سيد مكاوي وأشعار فؤاد حداد)
(32)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي سحر نادي ... منأراتي وبنادي ... على القمر بنتي أميرة اصحى يا نايم وحد الرزاق ... رمضان كريم ... الليل على كتافها فطيرة ضحكتها في الحي منيرة وسعد يمشي على اقدام ... ضحكتها يا روحي يا روحي حنينة وردت روحي ضحكتها قلة مندية ... ضحكتها قلة مندية وعيش وملح الحرية ومهما اشوف الليل ضلمة .. ومهما اشوف الليل ضلمة والدنيا مهما تكون ظالمة ضحكتها للدنيا براءة اصحى يا نايم وحد الرزاق ... رمضان كريم ...ضحكتها للدنيا براءة تحت النجوم البراقة ضحكتها تفتح أحضاني تخدني للشط التاني ... ضحكتها بدر الرمضاني ضحكتها مصر المنصورة ... قمر أميرة الأمورة ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال ... في ضحك بنتي أميرة وضحك بنتي جنان جناين الإنسانية يا قمر ونان ضحك بنتي جنان جناين الإنسانية يا قمر ونان لفيت معاكي البلد والحي والتاني لفيت معاكي البلد والحي والتاني وف كل بيت التقيت حب الضنى جامد والبنت في مهدها والبنت في مهدها هي اللي ست الناس اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #34 05/04/2025, 18h54

المسحراتي
(الحلقات الإذاعية آداء سيد مكاوي وأشعار فؤاد حداد)
(33)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي من حواري الكل ... منأراتي في الندى والفل ... القلب لما سمع أول بيان في العصر ... كان إنسان بيحضن في الجميع الكل ... والدنيا خالية من الهوان والذل اصحى يا نايم وحد الرزاق ... رمضان كريم ... القلب لما سمع أول بيان في العصر ... كان السما العالية والناس اللي فوق الحصر كل البشر فرحانين كل البشر شعراء كل البشر حلوين ... كل الخطب والمصاطب ؟؟؟؟ وكل ضي ابتسامة وكل رعشة إيد اصحى يا نايم وحد الرزاق ... رمضان كريم ...انا قلبي لما سمع أول بيان في العصر ... كل الجدود اللي بكت في مصر وكل الولاد اللي ضحكت وكلنا على بعض بنجري وندور ... وكلنا زرع بنبت وبنور ... وكلنا جنود وبنثبت رايات النصر ....
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال ... الشمس دقت على بابي وفتحت الباب لقيت ألوف البشر حاملين شجر ونسيم الشمس دقت على بابي وفتحت الباب لقيت ألوف البشر حاملين شجر ونسيم وكلهم عيلة واحدة وكلهم أحباب وكل ناحية جميلة وكل مصر عظيمة فى القلب لما سمع أول بيان في العصر اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #35 05/04/2025, 20h46

المسحراتي
(الحلقات الإذاعية آداء سيد مكاوي وأشعار فؤاد حداد)
(34)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

وكل خطوة لسة خطوة كمان لو عندى ذرة من الأمل والإيمان أقدر أهد من الجبل أركان ... الإنسانية صنعة الإنسان الأرض للي بيفلح الفدان تصبح ولاده أسطوات حلوان اصحى يا نايم وحد الرزاق ... رمضان كريم ... والفجر أبيض والنسيم فتان وكل شئ في القلب لازم يبان يللي اللي معاك الحق خصمك جبان ... اجمع ولادك تكسر العدوان ... هات الكتاب اقراه من العنوان ... اقراه في نور الآدان والمدرسة والميدان ... والنصر نازل مصر في رمضان ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال ... الأولة نمشيها خطوة ثبات والتانية خطوة نبات والتالتة ع الدبابات احنا مشاو النصر احنا قلوب مؤمنة النور جري في دمنا يا مصر يا أمنا النور جري في دمنا يا مصر يا أمنا يا أمنا يا مصر اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #36 05/04/2025, 22h17

المسحراتي
(الحلقات الإذاعية آداء سيد مكاوي وأشعار فؤاد حداد)
(35)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي منئراتي أئدي فرضي وازرع في أرضي خضرة ومباني ... وافتح مواني لابني الصغير يعرف يطير طير المعاني ... مزاجه فني يعرف يغني يشعر يقول ... من صغر سني وانا ماشي دوغري من سن تسعة نصوم ونسعى ... أصل اللي شاطر غير اللي فاطر ... أصل اللي شاطر غير اللي فاطر ... أصل اللي يشقى هو اللي يلقى اصحى يا نايم وحد الرزاق ... رمضان كريم ... لك يا ابا عندي أنجح واعدي وتعيش بلدنا أم الف مادنة تعيش بلادي ... أصغر ولادي حسن ابو علوة بيغني غنوة مش بس حلوة جميلة جداً والديك بيدن والفجر شق ... على دق قلبي عديت حبايبي من بر غربي لبر شرق ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال ... قلبي اللي جبته هنا قلبي اللي سيبته هناك الحي ده حينا والقلة ع الشباك الأصل واحد يا عيني والشبه ملايين تنده أسامي وتتلفت شمال ويمين حسن محاسن سعاد طارق علاء الدين يا ابو العيال ده حبك وكله شقاك اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #37 05/04/2025, 22h52

المسحراتي
(الحلقات الإذاعية آداء سيد مكاوي وأشعار فؤاد حداد)
(36)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي في ندى رمضان منئراتي وماشي بين الغيطان والا بين حواري الحي ... اصحى يا نايم وحد الرزاق ... رمضان كريم ... القى الحيطان تقولي شوف الطوب وشوف الحجر بالليل بيعطش زيه زي الشجر ده كل شئ في الدنيا رق وشعر ... فيه قلب دايماً قلب حتى الجماد ... وشمس دايما جمر بين الرماد ... وفيه منابر سبحت للعرش يا مؤمنين فيه وردة ما بتدبلش ... اصحى يا نايم وحد الرزاق ... رمضان كريم ... فيه يد بتحطم الأوثان عرق النبي بيزهر الأغصان فيه كلمة يكتبها الحفيد عن أبوه ... وحرف يتمنى البشر يكتبوه ... على مآقي العين ولو إنه قديم ... عرابي ومحمد عبيد والنديم ... فيه ناس بنوا لي بعد ناس بعد ناس ما بطلوش الرقة والإحساس فيه حلم أحلم بيه واصحى وابات ... كل الحجارة أفتكرها نبات ... وندر دايم للندى والنور ... وشهر أبيض في الزمان مشهور ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال انا كنت قايم اغني والا ماشي أزور وصنعتي والا فني والا باوفي ندور خد كلمة الحق عني والأمل مبدور انا شفت كل الشوارع تلتفت للضي وشفت كل الليالي مبحرة للنور اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #38 05/04/2025, 23h31

المسحراتي
(الحلقات الإذاعية آداء سيد مكاوي وأشعار فؤاد حداد)
(37)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي صوتي يشبه شهيد بيرد في الدنيا في كل سحور ... منئراتي من قريب وبعيد أنا ماشي في الوطن مسحور ... ومعدي ست سنين وست بحور ... وباغني يا ولاد العرب يا ولاد أجمل ما في الدنيا شجر وبلاد وأجمل الأيام وأجمل نور ... ايه أجمل الأشجار أقول النخيل من حد سينا يطل من فوق النيل درعات ولادنا لما هدوا السور الله أكبر يا هتاف الجيش ... أجمل علم في الدنيا علم صقر قريش ... وأجمل الخيالة جيش منصور ... أرضك يا سينا لما تكتب كتاب العاشق المصري اللي عمره ما تاب ... وأما أجمل كلمة كلمة عبور ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال يا جنة العرقانين والشمس وردية والخلق وردية تدخل بعد وردية على الجسر كل الحبايب والمعدية وأمنا بين ايدها كلنا هدية قالت أمنت بشهيد كان يحبي في حجري أمنت بالله وبدموعي اللي راح تجري على رمل أطيب من الزرعة المندية اصحى يا نايم اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #39 06/04/2025, 00h06

المسحراتي
(الحلقات الإذاعية آداء سيد مكاوي وأشعار فؤاد حداد)
(38)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي آدي عاشر سنة ... منئراتي بطبلي أخضر ظريف ... ربيع منور في الشتا والخريف قتلني أجري الدنيا بالدندنة ... اصحى يا نايم وحد الرزاق ... رمضان كريم ... حس اللي بيحس البشاير رهيب حس اللي نسم ع الجلود والرغيف سحر على جبهة ومدينة وريف ... تحت السلاح والمدنة والمدخنة حضر الحديد والصلب لما اتنى وكل شئ في مصر طيب ووليف ... اللي اتزرع بالحب واللي اتبنى أمنت لو ينطق بإذن اللطيف مش ح يقول غير اللي قلته أنا ... كان الأمل صادق وقلبي شريف ... اتنزهت عيني وبالغ أنا شفت العلم دايس على بارليف اصحى يا نايم وحد الرزاق ... رمضان كريم ... ع الضفتين طبلت بالمأديف ... يا قسمة السعد والهنا ...
المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال ... حبيت حبيت حبيت ودبيت كما العاشق ليالي ليالي ليالي طوال ... وكل شبر وحتة من بلدي حتة من كبدي حتة من موال وبالي وف مالي انت الدنيا والأحلام ريحة الندى والرغيف من أول الأيام في ضحكتك كل لولي البحر يا بلادي ولو بكيتي انعسر قلبي على ولادي انت الحياة للشجر والموت على الأعداء يا منورة المؤمنين يا سبحة الشهداء عايش على كلمة واحدة والفؤاد والعين متعلقين في شفايفك يا رضا الوالدين اصحى يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى وحد الرزاق ... اصحى يا نايم اصحى يا نايم يا نايم ... وحد الرزاق

الملف الصوتي هنا

**حازم فودة** · #40 06/04/2025, 16h01

المسحراتي
(الحلقات الإذاعية آداء سيد مكاوي وأشعار فؤاد حداد)
(39)
... ... اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم ...

مسحراتي منأراتي ع الطبلة إيدي ريشة في دوايتي اسمع يا سيدي اسمع حكايتي ... معاه استمارة راكبة الحمارة أول ما راحت راحت لحسني قالت يا حوستي هو انت فاطر ... قالت يا حوستي هو انت فاطر قال كنت فاكر مش ح انسى تاني خليك مكاني ... الاستمارة راكبة الحمارة راحت لفكري قال تيجي باكر وتروح لذكري قال روح لشاكر والا لشكري شكري في أجازة ... راحت لبهجت لا حط ماذا ولا سألها أشر نقلها لهاني خليك مكاني ... هاني التاطوري قال فيما يبدو ح تروح لعبده لازم ضروري ضروري لازم راحت لحازم ... من نولي تيفة شغال لطيفة من نولي مكتب راجل مؤدب ببدلة بني ... ببدلة بني قالي أظني في تاني أوضة عند الموظف أبو بدلة سودة ... بدلة رصاصي قال لامؤاخذة مش اختصاصي ... يا سيدي لاظوغلي خلص لي شغلي ... في تاني طرقة على شمالي لبدلة زرقة شرح لي حالي قال ثانية واحدة ... والاستمارة من يومها قاعدة راكبة الحمارة لو كنت راكب ما كنتش أوصل ولا أأدي واجب ولا أحصل واطلع بلاشي ... أحسن لي أفضل ع المهل ماشي ماشي ماشي ...
ده المشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال .... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... انا صايم الشهر طول الشهر وده فاطر ... وانا ماشي في الشغل قلبي سخن ودفاتر ... ما يتنقل شبر الا بحبر ودفاتر اصحى يا نايم اصحي يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق

الملف الصوتي هنا