المسحراتي

[حازم فودة]

المسحراتي
(الحلقات الإذاعية آداء سيد مكاوي وأشعار فؤاد حداد)
(21)
اصحى يا نايم اصحي يا نايم اصحى وحد الدايم .... وقول نويت بكرة إن حييت الشهر صايم والفجر قايم .... اصحى يا نايم وحد الرزاق ... رمضان كريم

مسحراتي أروح وأجي منأراتي وبسطجي جايب رسالة م الحاج زين ... على المحطة شايل دورين شايل معاه السنبلاوين ... نورت يا بلدينا المدينة ... سافرت صايم منين لفين الله يزينك يا حاج زين على جبينك السجدتين أما الحبايب باسوا الإيدين ... نورت يا بلدينا المدينة ... أنا جيت اسحر والحاج زين ضحك بسنة وغمز بعين ... وقالي صبرك يا ابو جناحين ننزل نسحر الاتنين سوا أنا قلت يللا أنا قلت هوا ... نورت يا بلدينا المدينة ...
والمشي طبلي والدق على طبلي ... ناس كانوا قبلي قالوا في الأمثال ... الرجل تدب مطرح ما تحب ... وانا صنعتي مسحراتي في البلد جوال .... حبيت ودبيت كما العاشق ليالي طوال ... وكل شبر وحتة من بلدي حتة من كبدي حتة من موال ... ليالي مبروكة بتنقط علينا الضي ... يجري عليها الزمان اللي بيطوي طي ... قلبي انعصر لما قال يا شهر عن إذنك ... لا أوحش الله منك أهل هذا الحي اصحى يا نايم اصحي يا نايم اصحى وحد الدايم .... السعي للصوم خير من النوم دي ليالي سمحة نجومها سبحة اصحى يا نايم يا نايم اصحى ... وحد الرزاق ... اصحى يا نايم يا نايم اصحى ... وحد الرزاق....اصحى يا نايم يا نايم اصحى ... وحد الرزاق


الملف الصوتي هنا