طلبات نوتة أ / عادل صموئيل الجزء الثانى

[عاصم المنشاوى]

أستاذنا الكبير...
يامن تسعدنا دائما بتدويناتك من مدرسة الحرفنة والشياكة والتبسيط...
كل سنة وحضرتك طيب بمناسبة عيد القيامة المجيد...
وبمناسبة عيد شم النسيم وأعياد الربيع ...وحفلات فايزة وعبد الحليم ونجاة وفريد...ألخ ألخ...
انا عارف ان حضرتك كتبت قبل كده عنها...بس أكيد لسه فيه فى جعبة الذكريات عن اعياد الربيع...
أحكى لنا يامولانا...مثلا بصراحة كده ...حضرتك أخدت كام جنيه عن حفلة قارئة الفنجان الاولى
اعتقد كانت فى نادى الترسانة..وهل حضراتكو مخصصين لعبد الحليم بس ولا عزفتوا لمطربين تانيين فى نفس الحقلة...
اشكرك اخى العزيز عاصم واطيب تحياتى وكل عام وانت بخير وكل الاعضاء بخير ...حفلة شم النسيم كانت فى السنوات الاخيرة مخصصة فقط لعبد الحليم .. ومش الحفلة فقط ولكن 50 يوم قبلها كان فيه اتفاق مع كل الفنانين الى بنعزف لهم زى وردة وفايزة ونجاة وغيرهم .. ان ماياخدوش حفلات ولا تسجيلات خلال هذه الفترة يعنى يعملوا بيات شتوى بحيث تتفرغ الفرقة لبروفات عبد الحليم الى بتدأ من 5 مساء الى 9 مساء كل يوم ماعدا الجمعة .. انت طبعا عارف حفلات اضواء المدينة الجميلة زمان كان كل الفنانين بيشتركوا فيها كل واحد فقرة من 10 الى 15 دقيقة .. لكن بعد كده لما انفصلوا كل واحد بيحى حفلته .. عبد الحيم بقا يعمل وصلتين بينهم فقرة مرة جاب عماد عبد الحليم فى اول ظهور له ومرات جاب الراقصة نجوى فؤاد ومرات جاب عفاف راضى تقدم وصلة بين الوصلتين فى حفلة قارئة الفنجان ماجابش فقرات تانية كانت استراحة يعنى .. اما عن الاجر كان زمان الاجور ملاليم مش زى دلقوتى يعنى اعلى اجر انا خدته كان 20 جنيه فى حفلة عبد الحليم بس كانت قيمة الجنية وقتها كبيرة .. ماحضرناش احنا الملايين اللىبياخدوها دلقوتى .. يعنى فريد الاطرش فى آخر فيلمين عملهم كان بياخد 17 الف جنيه الناهردة محمد رمضان واخد فى مسلسل جعفر العمدة 50 مليون جنيه ما اخدهمش كل من حليم والست وفريد وعبد الوهاب ( وحط لى كمان وردة ونجاة وفايزة ) كلهم على بعض طول عمرهم وكانت اغلى تذكرة اول صف فىالحفلة دى 10 جنيهات ولم تتعدى ام كلثوم حاجز 15 جنيه للعازف الكبير و10 جنيه تذكرة صف اول