طلبات نوتة أ / عادل صموئيل الجزء الثانى

[essamghazaly]

المشاركة الأصلية كتبت بواسطة عادل صموئيل

احبائى
اقدم لكم عمل من اروع اعمال رياض السنباطى ومن اروع ماغنت الفنانة سعاد محمد.. قصيدة ....



انتظار

... الاغنية دى من الاغانى الصعبة اللى بتحتاج مزاج معين وجو معين وما تتدونش وخلاص يعنى حد من الاعضاء طلبها ولولا انه قال وانت الوحيد الى تقدر تكتبها .. لولا الكلمة دى ماكنتش حاكتبها بسرعة فى هذا الوقت .. لأن دى مش من الاغانى اللى بنتطلب وخلاص .. يعنى الى بيطلبها طبعا فاهم قيمتها وبيقدر اللى بيدونها .. الاغنية دى تاخد اسبوع تدوين على الاقل يعنى بشتغل ساعة كل يوم .. طبعا مش انا الوحيد اللى مكمن يدونها فيه اتنين على الاقل بس طبعا مش بيدونوا مجانا .. يعنى شوف الناهردة لما يكون تذكرة عمرو دياب ب 10 آلاف جنيه شوف المدون الكبير ياخد فى تدوين قصيدة زى دى كام .. وانا بدون بسرح بخيالى .. يعنى انا عزفتها مع سعاد محمد .. بفتكر الايام دى .. وبفتكر انى سافرت مع سعاد محمد العراق زمان وعملنا حفلات فى بغداد ثم البصرة ثم الناصرية .. وكنا بنتحرك بالطيارات لكن عدنا من الناصرية الى بغداد بالسيارة وكانت قاعدة جنبى وتجاذبنا الحديث وقعدت تحكى لى على بيتها ف لبنان ولما عرفت اهتمامى بأجهزة التسجيل قعدت تحكى لى عن الاجهزة بتاعتها .. وان عندها نسخة من اغانيها واخداها من الاذاعة على شرائط ريل .. واتذكر رياض السنباطى وان اى حد عشان يدون لحن زى ده لازم يكون خبير متخصص فى السنباطى .. يعنى انا دونت الحمد لله معظم اعمال السنباطى .. والصعب فى الالحان دى انك لازم تكون حافظ اللحن 100% مش النوتة فقط لأن السنباطى كان له لمسات .. يعنى هو قال لى انه كان بيرتاح مع ام كلثوم لأن مابتستعملش نوتة .. وكان اللحن بياخد شهر ونصف بروفات بحفظ الفرقة بالعود .. يعنى كان بيحفظهم النوت بالحليات بتاعتها مرة واحدة .. لكن الحليات او نكهة السنباطى عادة بتكون اكتر بكتير مما تستطيع النوتة انها تعبر عنه لذلك كان فى الفرقة الماسية ومع وجود النوتة برضه لازم يمسك العود بعد مانقرا الجملة ويعزفها ويقول انا عايزها كده .. يعنى اغنية لاتقل لى ضاع حبى من يدى اخدت اسبوع بروفات .. بالنوتة كان ممكن نخلصها فى يوم .. لكن الوفت ده اخدناه فى اللمسات الى كان بيعزفها بالعود ويحفظها لنا .. يعنى اللعب بالمقام .. كمان من اخطر المشاكل ان زمان كان التدوين صعب جدا للمحترفين جدا فقط لكن انا بحاول ابسط التدوين عشان اللى يقرا النوتة يحس انها سهلة تتعزف مش مستحيلة يعنى .. ووسط ما بسرح بخيالى .. تخيلت لو كان الزمن الجميل مازال مستمر كان الملحن يقبض فى لحن زى ده كام مليون جنيه ويدى المدون كام .. يعنى انا كنت خلال كام شهر اشترى اليخت اللى نفسى فيه .. واربطه فى المرسى اللى جنب شيراتون الجزيرة .. وبعد كل لحن صعب زى ده لازم اخد اسبوع استجمام اعمل رحلة بحرية .... اتمنى تعجبكم النوتة ومع اطيب تحياتى

يا أستاذ عادل هذه تحفة موسيقية بكل المقاييس و هي فعلا لا تقدر بثمن و لو قلت انها تستحق عشر أضعاف ثمن تذكرة عمرو دياب...فسأكون مخطئ لأنها في الحقيقة تساوي وزنها ذهب.

و أكاد أجزم أنه لا يستطيع كتابتها غير حضرتك

أنا مغرم بالقصيدة دي لأن كلمات الشاعر ابراهيم ناجي و هو شاعر مرهف الحس و رومانسي و كل أشعاره تمس شغاف القلب. و طبعا لحن رياض السنباطي لا يمكن التعليق عليه لأنه لحن فريد و يعبر عن روح قصيدة انتظار و عن اللهفة و الشوق و الذل و الانكسار ...كل هذا في لحن واحد

أما تدوين حضرتك فهو مثل ميزان الذهب تماما لذلك فكل الشكر و العرفان لمجهودك العظيم

[Madeleine]

المشاركة الأصلية كتبت بواسطة عادل صموئيل

احبائى

اقدم لكم اغنية راغب علامة

لو شباكك ع شباكى

طلبتها الاخت العزيزة مادلين وانا اعتذر انها اتأخرت لأنى كنت مشغول بتدوين قصيدة انتظار مع اطيب تحياتى

مساء الورد استاذ الفاضل عادل بشكرك من اعماق قلبي على كل أعمالك الموسيقية وبل اخص تنويط لو شباكك ع شباكي ربي يحفظك ويطول بعمرك

[خليل سليم]

صباح الخير استاذنا واخي الفاضل عادل المحترم وشكرا وألف شكر لحضرتك على ما تدم لنا من اعمال راءعة وخالدة .... عشت وعاشت اعمالك القيمة وحفضكً الرب

[elarabi]

استادنا القديرو الغالي بل غلاوتك ليس لها حدود مع الكل وهدا من فضل الله .و ليكون في علمك انك تسعد الكل في هدا المنتدى.اما بالنسبة لي انني لا يمكن لي عزف النوطة بسبب مرضي و اكتفي برؤيتها في اليوتوب ملازمة مع الاغنية والحمد للله.متمنيا ان يحفضكم الله من هدا المرض المدمر-جلطة دماغية-الزمتني الجلوس في كرسي متحرك و مع دلك احاول داءما ان اكون اجابي.

الف سلامة عليك وربنا يشفيك ان شاء الله واطيب تحيات

[عادل صموئيل]

احبائى
اقدم لكم من اروع اعمال السيدة فيروز ...
سنرجع يوما



... اللحن ده من اصعب الالحان الى انا دونتها لفيروز .. يعنى بيحتاج فهم فى الاول ,, يعنى فيه الحان زى حنا السكران وفيه الحان زى ده .. اللى بيدون لو حس انه مايسترو كبير مطلوب فى حنا السكران يعنى انا ادونه وانا بشرب كوب شاى متوسط الحجم وطبعا الالحان الى زى كده .. لكن لحن زى سنرجع يوما لازم احس انى مبتدىء .. يعنى بتحسس كل حرف وإلا تطلع غلطات كتير .. ليه ... طبعا الكلام ده مهم اوى .. لأن دايما بيديك الحرف ال مش متوقع .. حتى فى الموسيقى مافيش التتابع الطبيعى يعنى اللزمات يتهيأ لك انها شبه بعض .. واحنا فى مصرالموسيقى مألوفة لأنها كانت تتر برنامج اذاعى اسمه لغتنا الجميلة كنا بنسمعه كل يوم .. لكن لو دققت فيها تلاقى الموسيقى 3 مرات مش زى بعض فيهم فخاخ .. يعنى لازم تدقق اوى وتراجع كل مازورة وبعدين تراجع كل جملة تتأكد انك كاتب صح .. والنتيجة الحمد لله نسبة الاخطاء صفر .. فيه ملحوظة هى بتغنيه وفيه دليل 3 دييز يعنى كرد من الدو دييز وطبعا ده سكة مش مألوفة للعازفين الشرقيين انا نزلتها تون عشان يبقى الدليل واحد دييز وبقا كرد من سى ناتوريل ... معقول شوية طبعا واسهل من دو دييز .. تبقى شىء واحد .. اللحن ده من النوع اللى مايتقراش حروف .. لازم تكون حافظة وتشغل ودنك وانت بتعزف لأنه محتاج احساس فى الاداء ... مع اطيب تحياتى

[عادل صموئيل]

احبائى
اقدم لكم من اروع اعمال الفنانة ليلى مراد ..


حكايتنا احنا الاتنين



..او انا احبك وافضل احبك وانت عذابى ونور العين .. والمدون بيحس باللحن اكتر مليون مرة من المستمع او العازف .. لأن بقف على كل مازورة ولازم اسمعها واحسها كذا مرة قبل ما اكتبها وبعد ما اكتبها براجعها .. هنا بحس بالعبقريات بتاعة الزمن الجميل يعنى انت لما بتدقق فى جزء بتحس اد ايه اذا كان عبقرى او تافه .. وهنا ابهرتنى العظيمة ليلى مراد .. يعنى صوت مش ممكن يتكرر .. وامكانيات اكتر من اللى بتقوله بكتير .. واللحن ده يعتبرمن اوخر اغانيها .. يعنى هى لما ابتدت تكبر ف السن .. مايقتش تليق على ادوارها القديمة دور البنت اللىبيحبها البطل .. وهى ماتنفعش تطلع ام مثلا ماتركبش عليها.. يعنى ليلى مراد دى ماجاش حد زيها تحسها اميرة احلام .. تحسها ملاك نازل من السما .. يعنى ماحدش يتجرأ ويقول فلانة المطربة دى امتداد ليلى مراد .. واكتر شىء خلاها تعتزل انها ماكانتش بتعمل حفلات .. يعنى انا خبيرفى كل اغانيها بس عزفت معاها مرة واحدة فقط .. ما قدرتش اكتشف هى مكانتش ليه بتغنى ف حفلات .. يعنى لو كانت بتغنى ف حفلات كان ممكن تستمر 15 سنة زيادة عن الوقت الى اعتزلت فيه وكان ممكن تعمل مركز ثقل بين النجمات الكبار .. رحم اله ليلىمراد واترككم مع اللحن الرائع مع اطيب تحياتى

[عادل صموئيل]

احبائى
اغنية ملحم بركات

جيت بوقتك

مع اطيب تحياتى

[salhi_haithem]

الشكر الجزيل على هذه الباقة من عطائك اللامحدود أستاذنا الكريم عادل صموئيل

[El mago Silva]

أحب أشكرك جدا على العمل الرائع اللي تقوم فيه
ومستمتع بالقصص اللي تحكيها عن تعاملك مع الأساطير
أمدك الله بطولة العمر والصحة والعافية

[عادل صموئيل]

احبائى
اغنية محمد فوزى

بعد بيتنا ببيت كمان

انا مش عاجبنى الكوبليه التالت يعنىحسيت انه متكلفت مش متلحن .. والفرق بين التلحين انك تقعد تحط الكلام معاك وتحاول تلحنه وانت ماشى فىالشارع او سايق السيارة او قاعد علىالبحر يعنىاقصد فىاى مكان لحد ماطيلع جملة جميلة وجديدة ومن هنا تبتدى لكن المتكلفت هو الى الملحن بيمسك العود ويضع امامه الكلام ويلحنه وزى ما يطلع وطبعا دول كانوا محترفين يعنى اللحايطلع مع انه دون المستوى حلو برضه .. المشكلة السبب فيها الافلام .. يعنىمحمد فوزى كان بيعمل فىالسن عدد كبير من الافلام وكل فيلم 6 اغانى .. والاغانى لازم تلحن الاول وتتسجل قبل بدء التصوير عشان المخرج يحدد يخرجها ازاى .. وده كان بيتطلب من المنتجانه بيقعد يزن على المخرج الى بيزن ع الملحن كل يوم خمس مرات وده الى بيخلى الالحان تطلع فيها وفيها .. مع اطيب تحياتى