( 25 ) الليل
---------------
مسحراتى
مصاحبنى ليلى
سكوته صاحبى
سهره خليلى
فى فرحى وبكايا
وأقول فى غنايا
يا عينى يا ليلى
-----
يا ليل يا ساكن
يابو شعر داكن
ترخيه علينا
تنام الأماكن
ولما تتعب
فى الصبح بدرى
وتروح تنام
ويجينا فجرى
تروح وتيجى
تانى فى ميعادك
ولا حد يعرف
سبب سهادك
قالوا عليك
أبو الغلابة
من غير قراية
ومن غير كتابة
موال سمعته
ياما من زمان
من شيخ يليل
وبعود كمان
يا ليل يا ليل
يابو الغلابة
يا ليل يا ليل
ميت صبابة
يا ليل يا ليل
وحشونى يابا
يا ليل يا ليل
والدنيا غابة
يا ليل يا ليل
يابو الغلابة
يا ليل يا ليل
يا جميل ولكن
قالوا فيك نحرس
من غدر ساكن
والغدر دا
من بعض ناس
والطبع فيهم
هو الأساس
يبقا لا ذنبك
ولا عيبة فيك
واحد يحبك
غيره يعاديك
وواحد فى حضنك
على جنبه راكن
اصحى يا نايم
يا نايم اصحى
رد: المسحراتى
العرض الشجري