محمد رشدي

[الشاعر صلاح عطيه]

الحلقه الثانية (اول خطوه)
مشوار الفنان محمد رشدى
#رشدى_المغنواتى
________________
*دسوق عرفت ان (رشدى) صوته حلو وبيغنى فى كل مناسبه.
*كان بيحلم انه يسافر مصر ( كل وجه بحرى بيقول على القاهره مصر)
ويقابل الفنانه (ليلى مراد) لانه بيعشق صوتها.
اللى فيما بعد هيسكن فى عمارتها (عمارة الإيموبيليا بوسط البلد _القاهره)
*طبعاً والدته و والده كانوا خايفين عليه من مشوار الغنا
لانه الولد الوحيد ( على بنتين )
ومن وجهة نظرهم ان المغنواتى ( المطرب) ماعندوش دخل ثابت
فكانوا يتمنوا يكون صاحب صانعه او موظف .
*فى الفتره دى 1946 كان مصاحب (فريد زعلوك) ابن عمدة البلد
اللى هو اكبر منه فى السن
و اللى كان مترشح لعضوية مجلس النواب عن حزب الوفد
وكان بيلف معاه وبيعمله دعايه ويغنيله.
واللى وعده انه هيساعده فى موضوع الغنا وهيقف جنبه ، وقد كان
* اول ما المرشح نجح عمل حفله كبيره وجاب الست (ام كلثوم) تغنى
وقالها عندنا ولد صوته حلو ، والست سمعت رشدى
غنالها غنوتين ، غنوه ليها ( انا فى انتظارك)
وغنوه للمطربه نور الهدى ( يا اتومبيل ياجميل محلاك)
والست عجبها صوته
وطلبت من المرشح انه يدخل رشدى معهد الموسيقى فى القاهره ،
وفعلاً الراجل ماقصرش وعمل كده
وسافر رشدى القاهره فى 1947 ودخل معهد فؤاد الأول للموسيقى
( اللى هو دلوقتى معهد الموسيقى العربيه)
* وراح اشتغل فى فرقة (بديعه مصابنى) اللى كانوا اشتغلوا معاها فنانين كبار: فريد الأطرش ومحمد الكحلاوى واسماعيل ياسين ومحمد عبد المطلب ومحمد فوزى وغيرهم كتير .
ورشدى كان بياخد اجر 9 جنيه فى الشهر.
*الناس قالولوا عشان تبقى مطرب صح لازم تقدم فى الإذاعه،
وعشان يتم إعتمادك لازم تكون ليك اغنية خاصه
رشدى هيعمل إيه؟ وإيه هتكون اول اغنية يغنيها ؟
وفين عبد الوهاب ؟
ده اللى هنعرفه مع بعض فى اللى جاى وعليكم خير
#الفن_وسنينه
#صلاح_عطية ✍️