رد: طلبات نوتة أ / عادل صموئيل الجزء الثانى
الأصدقاء الأعزاء...
المفروض أن بكرة عيد ميلاد صديقنا المحبوب الأستاذ /أحمد عبد الله الأمير...نجم النجوم...نور الصباح...وهو بقاله فترة كبيرة مختفى....ربنا يطمنا عبه...انا متوغوش عليه..وربنا يستر ويخيب ظنونى....
اللى أعرفه انه كان بيتصل بالدكتور محمد ابراهيم والدكتور وسام أكرم ...وانا حاولت اكتر من مرة بكل ارقام تليفوناته اللى كانت معايا لكن للأسف مفيش فايدة...أرجو اللى معاه رقم تليفونه يديهولى او يحاول يتصل بيه....وياحبذا لو الرقم الأرضى...أطال الله فى أعماركم....
أستاذنا الجميل / عادل بك صمويل
محمد عبد المطلب أبونور...له أغنيه حلوة أسمها "مستنى جواب"... تشبه الى حد ما لحن "علشان بدك ترضينى "انما اللى لفت نظرى ...أن أغانى كتير سوف تحال الى المعاش ... ومفيش حد ح يغنيها بعد كده لعدم ملائمتها للعصر....اللهفة بتاعة زمان فى أنتظار الجواب أو الخطاب من الحبيب للأسف ح تنتهى ....أيقاع العصر وطغيان تكنولوجيا الأتصالات ح تضحك الناس علينا لو حد غنى "مستنى جواب" أو "جواب حبيبى "...هل ح تنقرض الأغانى والألحان دى؟...خسارة التعب والمجهود والله....
..حاليا شغال فى "كول سنتر"...كل اللى حواليا شباب وبنات من مواليد التسعينات...أحب أقول لحضرتك...أن اللى بيسمعوه مالوش علاقة باللى احنا بنتكلم فيه هنا...كلهم من مستويات مختلفة اجتماعيو وثقافية ومادية مختلفة....لكن نادرا لما تلاقى حد بيسمع عبد الحليم حافظ...مش حقول محمد عبد المطلب....احب اقول لك الأغانى المكتسحة الروشة اللى هما بيسمعوها هى "لأ...لأ...تبقى معدية..ماتسلمش عليا...تلبس ضيق ...وأنا ركبى تزيق"...غير طبعا أكتساح"ألعب يالا"...هل بيجى لك احباط على كده يااستاذ عادل....على فكرة الأجيال الجديدة بعيييييدة جدا ...كان زمان الراديو بيتحكم ويربى الاذواق... دلوقتى الدنيا زحمة ومتنوعة ومفيش سيطرة...
اخى العزيز
احنا فى الكلية كنا بناخد مادة اسمها التاريخ الموسيقى ... بغختصار يعنى الفن و مرآة الحضارات يعنىلما الدولة بتزدهر تلاقى الفن مزدهر ولما الدولة بتتكسعم تلاقى الفن هبط الى الحضيض ... يعنى فاكر زمان كان فيه محل اسمه رفا .. الرفا ده كان لما غصب عنك تقعد على مسمار او تحك فى حاجة والبنطلون يتخرم خرم ممكن لايرى بسهولة كان الواحد يروح جرى للرفا عشان يزيل الخرم ده ... ولو الخرم فى وش البنطلون الواحد بيعتبر البنطلون ده خلاص انتهت صلاحيته مهما كان تمنه والواحد يخليه ينزل يجيب بيه الخضار والعيش او يلبسه فى البيت ... نفس الحكاية لو فيه بلوفر واتخرم وتلاقى الخيط ابتدى يكر لو ما اتلحقش بمنتهى احرفية الفتحى تكبر والبلوفر ده يترمى ... الناهردة روح باريس فى شارع الشانزليه حتلاقى بلوفر الخيط كر وعامل فتحة 10سم × 10سم والبلوفر ( اللى الواحد ما يتيعناش يمسكه اصلا تمنه 100 دولا او اضعاف كده .. ام البنطلون فحدث ولا حرج شوف فيه كام ضربة سكينة ده يقول لك ذوق الناس دى ايه بعد كه اكيد لما يسمعه حايسمعوا فن مقطع كده ولا ايه ؟
التعديل الأخير تم بواسطة : tarak766 بتاريخ 04/02/2019 الساعة 19h50
|
العرض الشجري