مافيش فايده
ما فيش فايده.. لمّا ضل التوتة مدّد قولت ياد كوّع شويّه عضمي يومها كان مهدّد وإلتقيت الخلق جايّه الليّ سارح يوم زمال والليّ طهقان م العيال و الليّ زرعُه ف غيطه مال جه يروّي ما طالش مايّه ,, والتقيت عبده الزناتى جاي بيشكي من سلومه كارشه م القهوة ليلاتي عشان بيشتم فى الحكومه قولت عيب يا عبده قصّر قال لي حالة الناس تحسّر قولت فاكرك جاي تعصّر وإحنا مش عاملين عزومه ,, رد خيشه وقال له عندك الفرح لسّه الخميس شا الله يومها زيْ عادتك تبقى بايت فى البوليس احنا يا ابني كرهنا جيرتك والليّ حتى يجيب فى سيرتك كل يوم تطلق حمارتك لمّا خلـّصْت الدريس ,,, فاكر المرحوم أبوك واللا يعني ما تعرفوش لمّا كان يكره ريحتنا وكان يحب العرص بوش واللا جدّك كان رابطنا نحرسوا المحصول فى غيطنا جه فى يوم وشحت غبيطنا ضرب عليه وما رجّعوش ,,, ردْ عبده وقال يا لهوي انتوا ليه مستسلمين جبتوا عسكر يحكموكم حبسوا كل المسلمين قتـّلوا الأطفال فى رابعة وحرّموكوا تصلوّا جمعه وحبسوا كعب الخير وباتعه ورفدوا خيشه ابن اسماعين ,,, صرفوا كل المليارات ع المساكن والشباب واشترولنا الطيارات واحنا مش ناقصين عذاب كل أمن الدولة منهم آه لو أعرف فين كمينهم دا الليّ يقتل حد منهم كل يوم يكسب ثواب ,,, ناس بتستصلح اراضي واحنا عشنا أمّا نشوفوها؟ والقنال تسمع نصيحتي نقوموا بدري ننشـّفوها ننطلوا المايّه الليّ فيها والبواخر ح نتاويها واللى يسألنا عليها نقولْ لهم بنعفـّشوها ,,, وقـّعوا الابراج وطفـّوا كل نور ييجي البلد دي واقطعوا الطريق ولفـّوا ما تسيبوش واحد يعدّي والكنايس ولــّعوها والمعامله هرّبوها وإلعنو مايتين أبوها إوعوا واحد منكوا يٍدّي ,,, إمسكوا حالة البطالة وقولوا إن السيسي باع واكتبوا للخلق كلـّه إن تلت الدولة ضاع واشتموا ف ميديا وفيس وإلعنوا موسى ولميس من هنا ليوم الخميس تنشروا إن الشعب جاع ,,, ما تقولوش عليّه داعش واللا اخواني وحماس كام طلاق انا كنت عايش فى البلد من غير لباس همّا بعتولي الهدايا والفلوس كترت معايا واشتريتلي كام عبايه وقولت اسيب دقني وخلاص ,,, صدّقوني قبل ما احلف ان مرسى ح ييجي تاني يفحر الانفاق بحالها ويحبس السيسى وتهاني وكلـّـنا لبّيك سوريا ونزرعوا البطيخ فى كوريا والشعوب تاكل كابوريا والغدا صيني وياباني ,,, رد بعزق كان بيعزق ويّا حمديه وشفيقه قال يا عبده لم نفسك دانتوا عايزينها حريقة الحمار مهما تحاكيه عمره ما بينسى اللى فيه لمّا يرتاح بتلاقيه يقضي حاجته ع العليقة ,,, البلد مش ناقصه خيبه واحنا ساكتين من زمان همّا ناس فاكرينها سيبه ودول مكانهم فى اللومان كل يوم صابرين عليكم لمّا ييجي العقل فيكم والضلال عامي عنيكم لعنه ع الكلب الجبان ,,, واتعازم بعزق يوميها ورصْ عبده نبّوتين والعصايا لمّا طارت خد فى وشـّه بونيتين دمّهم غرّق غدايا والبنات قزحوا القنايا والليّ بيسلـّك معايا صابحه بنت الشيخ ياسين ,,, كسّرولي التوته يومها والصوات زيْ السّرينه حدْ نادى وقال غيتونا لم كل الناس علينا والحريم عاملين فضيحة وعبده كان راقد سطيحة وبعد ما اكل الطريحة قام يقول لي احنا اتهرينا ,,, أصل بعزق كان عساكر والعساكر يكرهونا يعني ما يحبّوش ريحتنا وهمّا دايما يضربونا أصله كان فى الجيش زمان بس جه دي الوقت بان والتميم مع اوردغان بكره ح يجيبوا الماعونة ,,, رد حوده وقال يا عبده انت شاطر في الهيافة هوّ طيّب اوردغان لسّه طمعان في الخلافة وابن موزه فيه قريحة واللا بيخاف م الفضيحة دا الزعيم قالها صريحة قبل ما نروّوا الجوافة ,,, وانتوا زيْ زمان يا عبده لسّه برضه مصمّمين دا الصّغار في العزبة عرفوا من عزيزه مرات أمين دا انتوا فيكم جهل ياما من هنا ليوم القيامة واحنا ما شبعناش رخامه من بديع وابواسماعين ,,, باختصار اسمع يا عبده فز قوم رويّ الخضار انت عمرك ما انت فاهم تعيش حمار وتموت حمار دي البلد مظلومه بيكم لسّه بتضلل عليكم ألف داهيه ونايبة فيكم دا انتوا جيبتولنا الدمار ,,, كان في جيبي علبه بوستون لسّه فيها كام سيجارة خدت واللاعة هريدى ورٌحت راكب ع الحمارة وقلت داري أولى بيّا والبهايم والحوليّة العالم فهم القضيّة واحنا شاطرين في الخسارة
|
العرض العادي
