طلبات نوتة أ / عادل صموئيل الجزء الثانى

[عمرو الهنداوي]

أستاذ عادل سؤال من فضلك..

أم كلثوم في حفلاتها الأخيرة وبالذات مع حفلات أغنية الحب كله كانت بتغلط في الكلام بتاع الأغنية بشكل ملحوظ جداً.. الغلط ده كان بسبب الإرهاق أم النسيان وعدم التركيز أم محاولة للارتجال في الكلمات لكن كان بيخونها التوفيق في بعض الأحيان..

كمان حضرتك لما كنت وراها على المسرح.. انتم كعازفين كنتم بتحسوا بأية لما كانت تغلط بشكل ملحوظ وبالذات مع حفلاتها الأخيرة.. هل كنتم حاسين أنه خلاص المرض تملك منها أو ماذا؟ كمان أمتي حضرتك حسيت أنه أم كلثوم خلاص الأسطورة انتهت هل عند الوفاة أم مع أخر حفلاتها.. و هل شعرت حضرتك في حفلة ما في النهايات، أنها ستكون أخر حفلة والحلم معها بينتهي؟

معليش سألت أكثر من سؤال..
كل التحية والتقدير

فيه اثناء الوقوف على المسرح وبالذات للفنانين الكبار اوى اللى بيخافوا على شغلهم بتحصل لهم حاجة كده ممكن ينسوا الكلام زى ما انت فى امتحان تكون شاطر اوى بس الرهبة بتخلى مخك يتوقف ولو حد قال لك كلمة تبتدى تفتكر وتكتب كل الكلام ... دى عادى بتحصل للكل بس مع ام كلثوم كان الموضوع مختلف ... ركز اوى اوى مع حفلات ام كلثوم الاقدم وخد بالك من محمد عبده صالح عازف القانون كان هو حافظ كل حاجة الاغنية والكلام واغانيها القديمة كلها باللحن بالكلام لذلك كان دايما بيلقنها اول كلمة من الجملة لما توفى حصلت لها مشكلة انها لو نسيت اول الجملة ماحدش بيلقنها ولازم هى مع نفسها بتفتكر ... العملية دى برضه عملت حالة رعب عند كل المطربات بعدها .. يعنى لاحظ مع وردة وفايزة تلاقى عندها بيبتر ( حامل نوتة ) ماحش بيبقى عارف فيه ايه بس كان بيبقى مكتوب فيه كلمات الاغنية بخط كبير جاموسى عشان لو حصل ونسيت بتبص تفتكر وللعلم مع انها ممكن ماتنساش بس وجود الكلمات قدامها بيعمل لها حركة بتونسها ع المسرح مع اطيب تحياتى عادل صموئيل