طلبات نوتة أ / عادل صموئيل الجزء الثانى

[عمرو الهنداوي]

أستاذ عادل أزي حضرتك وعندي بعد إذنك سؤال يبدو اكاديمي شوية:

يعني أيه صوت حلو؟

هل يعني حد بيعرف ينطق النغمات بشكل سليم و واضح؟
هل يعني حد بيعرف ينطق النغمات سليمة و واضحة وله شخصية ويحسن التلاعب بالنغمات دون نشاز؟

طيب هل أي حد بيعرف يقول النغمات صح يقدر يغني؟ طيب فين الصوت الحلو كده؟ طيب هو ينفع صوت حلو بس بيقول النغمات غلط؟ ولا هي تركيبة ربانية مادام صوت حلو، حيبقي بيقول صح..

طيب رأي حضرتك أيه؟؟ في محمد الموجي وسيد زيان وعبد المنعم مدبولي لما بيغنوا، الناس بتبقي مستمتعة ومع ذلك هما مش مطربين.. طيب الناس بتبقي سعيدة بيهم ليه؟؟

مرفق مشيت على الأشواق بصوت الموجي ويؤدي أداء جميل رغم أنه مش مطرب

كل التحية والتقدير


اخى العزيز
ده يمكن اخطر سؤال محتاجينه النهارده اننا نفهم معناه
حلاوة الصوت يعنى صوت زى العسل زى عبد الحليم او وردة مثلا دى تيجى فى المرحلة التالتة ... يعنى دى الحاجة اللى بتكمل حاجتين فى منتهى الاهمية او اكون او لا اكون ... اخطر حاجة عشان واحد يغنى لازم بيكون عنده مساحة صوتية .. يعنى مثلا مثلا فيه مطرب مساحته الصوتية من دو اللى تحت المدرج الى رى الخط الرابع ... بنقول مثلا .. يبقى لازم يتوفر فيه شروط فى منتهى الاهمية ... انه بيجيب النغمات دى من اول دو الى رى كلها سليمة ما يقعش منه حرف .. اقصد يطلع خاسس او زايد او لما تسمعه تشك فيه تقول دى لا ولا لابيمول ... النغمات اللى على الاصابع البيضاء والسوداء والنغمات الشرقية بتاعتهم ... يعنى وانا بدون لما بسمع اولا باخد البيتش .. بعدين طول ما انا سامع بقول ايوه دى لا نص بيممول يوم ما اشك ف اللى سامعه لانص بيمول ولا لا بيمول يبقى ده مش مطرب .. يبقى بيحدفها زى ماتطلع .. بعد كده حاجة مهمة .. احنا قلنا المساحة الصوتية تبدأ من دو معناها ان عنده نغمتين تحتها ممكن يقولهم ما يفطس يعنى بس بيتلحن لو من دو عشان يغنى وهو مستريح ...ونغمة الجواب لازم يبقى عنده نغمتين ع الاقل فوقها عشان لما يغنى نغمة الجواب يقولها مستريح ماتحسش انه حاينفجر وده اللى بيديك متعة السمع والطرب يعنى ماتحسش كان واحد ماشى على حبل ومضبط نفسه بالعافية وممكن يقع ... حاجة كمان فى منتهى الاهمية ... ممكن الموسيقى تسلم لو نغمة مش اللى بيغنى منها ... يعنى انا بديه رى مثلا وهو بيغنى من لا .. ان ماقالهاش سلسيمة طبعا ما يبقاش مطرب .. زائد بقا امكانيات خاصة زى العُرب السليمة والزمن الصح يعنى ما يقعش فى الايقاع ... كمان لازم يفهم فى المقامات يعنى يبقى فاهم انه فى بياتى ولا كذا عشان يركز فى النغمات المتميزة .. ممكن المطرب يكون صوته اجش مش حلو زى المربى .. بس بيقول الحاجات اللى فاتت كلها بأعلى جودة ويخليك تتسطل يعنى ... انت قلت محمد الموجى .. تخيل بقا محمد عبد المطلب ... انا شخصيا بيجننى .. مع ان صوته مش حلو او كان صالح عبد الحى صوته برضه مش ناعم زى عبد الواهب مثلا ... فهمت المقصود ؟ يعنى حلاوة الصوت دى تالت حاجة ... فيه اصوات تنفع تنادى فى السوق على فاكهة ... او يقف على باب ميكروباص ينادى عتبة عتبة ... دى مش اصوات للغنا ... مع الاسف دلوقتى بتغنى والمصيبة ان معندهاش كل المواهب اللى قلتها ف اول كلامى .. عبد المنعم مدبولى صوته وحش مش صوت للغنا ... بس بيخل جوه المقام ... والجو المطلوب للأغنية يخليك تتجنن .. وصلت ؟ مع اطيب تحياتى