طلبات نوتة أ / عادل صموئيل الجزء الثانى

**تامرتامر** · #1 20/08/2017, 18h38

يعطيك الف عافيه استاذنا المحترم عادل ياريت تتكرم علينا نوتة وردة ( قلبي سعيد ) من درجة صول وشكراً

اليك النوتة
مع اطيب تحياتى

**عمرو الهنداوي** · #2 22/08/2017, 00h00

أستاذ عادل أزي حضرتك وعندي بعد إذنك سؤال يبدو اكاديمي شوية:

يعني أيه صوت حلو؟

هل يعني حد بيعرف ينطق النغمات بشكل سليم و واضح؟
هل يعني حد بيعرف ينطق النغمات سليمة و واضحة وله شخصية ويحسن التلاعب بالنغمات دون نشاز؟

طيب هل أي حد بيعرف يقول النغمات صح يقدر يغني؟ طيب فين الصوت الحلو كده؟ طيب هو ينفع صوت حلو بس بيقول النغمات غلط؟ ولا هي تركيبة ربانية مادام صوت حلو، حيبقي بيقول صح..

طيب رأي حضرتك أيه؟؟ في محمد الموجي وسيد زيان وعبد المنعم مدبولي لما بيغنوا، الناس بتبقي مستمتعة ومع ذلك هما مش مطربين.. طيب الناس بتبقي سعيدة بيهم ليه؟؟

مرفق مشيت على الأشواق بصوت الموجي ويؤدي أداء جميل رغم أنه مش مطرب

كل التحية والتقدير

اخى العزيز
ده يمكن اخطر سؤال محتاجينه النهارده اننا نفهم معناه
حلاوة الصوت يعنى صوت زى العسل زى عبد الحليم او وردة مثلا دى تيجى فى المرحلة التالتة ... يعنى دى الحاجة اللى بتكمل حاجتين فى منتهى الاهمية او اكون او لا اكون ... اخطر حاجة عشان واحد يغنى لازم بيكون عنده مساحة صوتية .. يعنى مثلا مثلا فيه مطرب مساحته الصوتية من دو اللى تحت المدرج الى رى الخط الرابع ... بنقول مثلا .. يبقى لازم يتوفر فيه شروط فى منتهى الاهمية ... انه بيجيب النغمات دى من اول دو الى رى كلها سليمة ما يقعش منه حرف .. اقصد يطلع خاسس او زايد او لما تسمعه تشك فيه تقول دى لا ولا لابيمول ... النغمات اللى على الاصابع البيضاء والسوداء والنغمات الشرقية بتاعتهم ... يعنى وانا بدون لما بسمع اولا باخد البيتش .. بعدين طول ما انا سامع بقول ايوه دى لا نص بيممول يوم ما اشك ف اللى سامعه لانص بيمول ولا لا بيمول يبقى ده مش مطرب .. يبقى بيحدفها زى ماتطلع .. بعد كده حاجة مهمة .. احنا قلنا المساحة الصوتية تبدأ من دو معناها ان عنده نغمتين تحتها ممكن يقولهم ما يفطس يعنى بس بيتلحن لو من دو عشان يغنى وهو مستريح ...ونغمة الجواب لازم يبقى عنده نغمتين ع الاقل فوقها عشان لما يغنى نغمة الجواب يقولها مستريح ماتحسش انه حاينفجر وده اللى بيديك متعة السمع والطرب يعنى ماتحسش كان واحد ماشى على حبل ومضبط نفسه بالعافية وممكن يقع ... حاجة كمان فى منتهى الاهمية ... ممكن الموسيقى تسلم لو نغمة مش اللى بيغنى منها ... يعنى انا بديه رى مثلا وهو بيغنى من لا .. ان ماقالهاش سلسيمة طبعا ما يبقاش مطرب .. زائد بقا امكانيات خاصة زى العُرب السليمة والزمن الصح يعنى ما يقعش فى الايقاع ... كمان لازم يفهم فى المقامات يعنى يبقى فاهم انه فى بياتى ولا كذا عشان يركز فى النغمات المتميزة .. ممكن المطرب يكون صوته اجش مش حلو زى المربى .. بس بيقول الحاجات اللى فاتت كلها بأعلى جودة ويخليك تتسطل يعنى ... انت قلت محمد الموجى .. تخيل بقا محمد عبد المطلب ... انا شخصيا بيجننى .. مع ان صوته مش حلو او كان صالح عبد الحى صوته برضه مش ناعم زى عبد الواهب مثلا ... فهمت المقصود ؟ يعنى حلاوة الصوت دى تالت حاجة ... فيه اصوات تنفع تنادى فى السوق على فاكهة ... او يقف على باب ميكروباص ينادى عتبة عتبة ... دى مش اصوات للغنا ... مع الاسف دلوقتى بتغنى والمصيبة ان معندهاش كل المواهب اللى قلتها ف اول كلامى .. عبد المنعم مدبولى صوته وحش مش صوت للغنا ... بس بيخل جوه المقام ... والجو المطلوب للأغنية يخليك تتجنن .. وصلت ؟ مع اطيب تحياتى

**وائل علوي** · #3 26/08/2017, 23h41

سلام عليكم ايها الاحبة
كل عام وانتم بخير
استاذي واخي عادل صموئيل
اتمنى ان تكون بصحة جيدة ولي طلب عندك وكعادتي طمعان في كرمك وهو نوتة دور انا هويت وانتهيت للاسطورة سيد درويش
طبعا انا عارف ان كتابته اصعب من الاغاني العادية ومحتاج يتسمع كويس ويتعزف بحس
اتمنى اعرف اذا كنت هتحطه في الجدول لانه من اجمل تراثنا الشرقي انا شخصيا بيقشعر جسمي لما بسمعه
مع خالص تحياتي
اخوك وائل علوي

**عمرو الهنداوي** · #4 27/08/2017, 01h04

اقتباس:

المشاركة الأصلية كتبت بواسطة وائل علوي

سلام عليكم ايها الاحبة
كل عام وانتم بخير
استاذي واخي عادل صموئيل
اتمنى ان تكون بصحة جيدة ولي طلب عندك وكعادتي طمعان في كرمك وهو نوتة دور انا هويت وانتهيت للاسطورة سيد درويش
طبعا انا عارف ان كتابته اصعب من الاغاني العادية ومحتاج يتسمع كويس ويتعزف بحس
اتمنى اعرف اذا كنت هتحطه في الجدول لانه من اجمل تراثنا الشرقي انا شخصيا بيقشعر جسمي لما بسمعه
مع خالص تحياتي
اخوك وائل علوي

أستاذ عادل مدونها وموجودة في المنتدى أخى وأئل

**المنير** · #5 28/08/2017, 21h29

السلام عليكم
عفوا يا عزيزي الأستاذ صموئيل لم ادخل المنتدى خلال العطلة الصيفية. لقد وصلني طلبك للتو.
انا بصدد تحميل البرنامج.
رجاء اعطني رقم الواتسب لأعطيك طريقة التحميل من مواقع مهمة.

اخى العزيز
الف شكر بس انا معنديش واتس اب ممكن تنزلهم زى مانزلتهم من قبل يعنى وقتها انا نزلتهم بسرعة ومعلش اتقل عليك محتاج ضرورى برنامج Freemake Video Converter اصدار 4.1.10 مع السيريال
مع اطيب تحياتى والف مليون شكر
وكل عام وانت بخير بمناسبة عيد الاضحى المبارك

**المنير** · #6 28/08/2017, 21h51

اخي العزيز رجاء "دليلي احتار" من do.

**سليم العباس** · #7 01/09/2017, 23h05

بعد التحية أستاذ عادل :
أي صولو كمان كان الأفضل في حفلات المطربين الكبار ؟
هل التوزيع الموسيقي كان موفقا في جميع الحالات وهل كان الملحن هو نفسه الموزع؟
مثلا في مقدمة ليلة حب لأم كلثوم أعتقد حسب ذوقي الشخصي أن الأورغ لم يكن مناسبا لموسيقا البياتي و جاء فجاً غير مريح للمستمع.
الرجاء إبداء رأيك و شكرا.

الاخ العزيز
بالطبع لايعلى فوق صولوهات كمان الحفناوى جميعا ... لأن الحفناوى تميز انه بيقدر يعزف الصولو من اى مقام ومن اى درجة يعنى الصولو بتاع اغدا القاق ده على الكمان يعتبر اعجازى لأنه صبا على سى ناتوريل ودى منطقة مستحيلة فى المكان ان عازف يعزف فيها ببراعة .. يعنى فى مناطق فى الكمان مش اى حد يقدر يعزف فيها مثلا نغمة الدو نصف دييز على وتر اليكاه عشان تطلع جميلة طبعا اقصد ... ببساطة لأن كل دارسى الكمان كانوا بيدرسوا من ميتود غربى مافيهوش الكلام ده طبعا ... بس الحفناوى بيمتاز بفطرة اكبر واكثر من اى عازف آخر ... اهم ما يميز الحفناوى ( وكان صديقى طبعا وزاملته فترة طويلة جدا ) انه كان بيلتزم باللى بيقوله الملحن بنسبة 97% يعنى اى تجويد او حاجة حلوة بيقولها بتكون فى الحدود اللى ماتغيرش اللى عامله الملحن .. وكلمة اللى عامله الملحن يعنى اللى مش ممكن يبقى احلى من كده وبالذات طبعا لما يكون الملحن احد العمالقة ... وفيه شىء مهم جدا للمستمع عشان يطرب لازم يكون حافظ اللى حايسمعه عشان يتمتع بيه وكان الحفناوى لو عزف نفس الصولو فى عشرين حفلة بيقوله كام هو ولو عمل حلية او حاجة بتكون فى حدود زى ماقلت 3% من الصولو ... بعد الحفناوى حصلت كارثة وهى ان مفهوم الكمان نفسه اتغير ... يعنى الكمنجة بالذات دونا عن اى آلة فيه كمان غربى بيعتمد على التكنيك الكبير وكمان غربى بيعتمد على التطريب والفطرة شوية مع الدراسة ... الفطرة هى اللى بتعمل نكهة لكل عازف مختلفة عن غيره ... العازفين اللى طلعوا فى الاجيال اللى بعدنا تناسوا هذه المعلومة واتجهوا لإستعراض التكنيك على حساب التطريب كمان بقا العازف يعمل تحوير فى الصولو من عنده بحيث يمسح شخصية الصولوا ويبقى شىء غير المكتوب ف النوتة او اللى عامله الملحن ( ده طبعا بعد رحيل العمالقة لنهم لن يسمحوا لهم بذلك ) وللعلم انا لما بدون اغنية من الاجيال اللى بدعنا وبالذات من فرقة هانى مهنى ... لو صولو الكمنجة بتعزفه الفرقة بعده انا بدون من اللى بتقوله الفرقة ولو صولو الكمنجة مش بتقوله الفرقة انا مش بدون الاغنية برمتها لأن مش بفهم اللى بيقوله العازف ... اما بالنسبة للبياتى فى صولو الاورج فى ليلة حب عبد الوهاب كان بيحب المفاجئات الغير متوقعة يعنى هو كان قاصد ان المستمع يحس بالشعور اللى انت قلته عشان ما يبقاش اللحن شبه الحان اخرى مع اطيب تحياتى عادل صموئيل

**المنير** · #8 02/09/2017, 15h26

السلام عليكم
الأخ صموئيل طلباتك أوامر. البرامج تكون عندك في المساء.
دليلي احتار التي رفعتها من fa. ألرجو ان ترفع نسخة على do.
حياتي.

اخى العزيز انا آسف للخطأ
اليك دليلى احتر من دو
مع اطيب تحياتى عادل صموئيل

**المنير** · #9 04/09/2017, 13h15

الأخ صموئيل طلباتك أوامر.

https://www.mediafire.com/file/5dhp7mthq7arive/FreemakeVideoConverter.rar