صنف النسا

[حمدى شبانة]

وست تسعد قلوب أُسرتها من نظرة
مالكة زمام أمرها ف البيت كما ناظرة
تلقاها فاهمة راجلها من بصة أو نظرة
وست تقرف ف جوزها دايماً تناكف فيه
تلقا النكد طبعها وتقوللو : أبصَر إيه !
سايبة الولد للجيران هُمَّا يربوا فيه
وفاكرة نفسها إيه ولا ستنا الناظرة

[حمدى شبانة]

فيه ست دايماً كريمة وأصلها معروف
صابرة ف مُرَّة وحلوة وعايشة بالمعروف
إن مال ف يوم الزمن ودا شيء ساعات معروف
تلقاها تسنِد ف جوزها ومتشتكيش منُّه
واقفة تمللي جواره وقريِّبة منُّه
تقوللو إلاّ الحرام حاسب بقا منُّه
إبعدنا يارب عنُّه وحتمشي بالمعروف
---------------------------------

[حمدى شبانة]

فيه ست ماشية تمللى بكل شكل ولون
وست منفوخة دايماً عالفاضى كالبالُّون
وتالتة حلوة ف طباعها مايهمهاش اللون
ورابعة لو شوفتها تجرى قوام مِنْها
الشر فى وِشَّها على طول باين منها
وخامسة متلوِّنة .... إبعِد قوام عنها
وفاكرة إنُّه يزينها فى وشَّها ميت لون

[سعدالشرقاوى]

وست زي القمر وكفاية منظرها
تسعد جميع البشر وكل من زارها
والنظرة منها بتغفر كل أعذارها
تلقاها تروى العطش لكل من يشرب
كلامها بالسلسبيل والمستمع يشرب
والناس تفوت عندها من شكلها تشرب
لو مرّه تشرب تشوف المايّه من زورها