الأدباتى

[حمدى شبانة]

شخصيات تاريخية
عبدالله النديم
ـــــــــــــــــــ

أدباتى أنا ف الموعد جيت

كلامى عن شخصية ياريت
لو أبقا زيُّه شُهرة وصيت
دا أديب وشاعر بالفطـرة
الله الله يابدوى جاب اليسرا

الليلة جايب شخصيَّة
زجال من الأدباتيَّة
أيام الثورة العُرابية
أسس مجلات لها شُهرة
الله الله يابدوى جاب اليسرا

( تنكيت وتبكيت ) و ( المسمار )
مجلِّتين صوت للأحرار
أدباتى يِنشِد ليل ونهار
وشُهرته ( خطيب الثورة )
الله الله يابدوى جاب اليسرا
ــــــــــــــــــــــــــــــــــــــــــــــ

[حمدى شبانة]

شخصيات الأدباتى
ــــــــــــــــــــــــــ
بيرم التونسى

أديب أصبَّح وأمسِّى
أقولها وأعلِّى ف حسِّى
شخصية عُمره ماكان منسى
وف الزجل قيمة ودُرَّة
الله الله يابدوى جاب اليسرا

أغانيه وأشعاره يا أحباب
دايماً بتسحِر الألباب
( هوَّة صحيح الهوى غلاب )
أعماله حلوة مُفتخـرة
الله الله يابدوى جاب اليسرا

( القلب يعشق كل جميل )
أهل الهوى .. شمس الأصيل
كلام عشقناه جيل ورا جيل
( يا أهل المغنى ) خدوا عبرة
الله الله يابدوى جاب اليسرا

كتب لنا ( عزيزة ويونس )
و ( سيرة الظاهر بيبرس )
مصرى وجدُّه من تونس
أستاذنا إنتم بيه أدْرَى
الله الله يابدوى جاب اليسرا

[حمدى شبانة]

شخصيات الأدباتى
ـــــــــــــــــــــــــــ

الإمام الشافعى

أنا الأديب والمولى مُعين
إقروا معايا يا مُتابعين
عن شخص مولود بفلسطين
فى غزَّة الصامدة الصابرة
الله الله يابدوى جاب اليسرا

فقيه وصاحب مجلس علم
ألِّف كتاب ضخم بيضُـم
أراؤه وسمَّاه ( الأُم )
ومذهَبُه علامة كُبرى
الله الله يابدوى جاب اليسرا

ترك لنا ف الشِعر ديوان
أبياته سايرة ف كل أوان
ومسجِدُه فى مصر كمان
وعلومه بينَّا مُنتشـرة
الله الله يابدوى جاب اليسرا
ـــــــــــــــــــــــــــــ

[حمدى شبانة]

شخصيات الأدباتى
ـــــــــــــــــــــــــ
عمر بن الخطاب

أدباتى والشعر هوايتى
سعادتكو مقصدى وغايتى
إنتم يا أحبابى مرايتى
ومعايا الليلة وبكرة
الله الله يابدوى جاب اليسرا

شخصية الليلة يا صايمين
خليفة م الخُلفا الراشدين
أكيد حتعرفوا يطلع مين ؟
علشان ( مبشر م العشرة )
الله الله يابدوى جاب اليسرا

قوى وكان بيخاف ربُّه
التقوَى نابعة من قلبه
أمَّا ( الفاروق ) كان لقبُه
و ( العدل ) دى صفتُه الكُبرى

الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــــــــ
جميلة بوحريد

أنا الأديب جاى الليلة
ومعايا شخصية ( جميلة )
لها ف الكفاح قصَّة طويلة
بسببها قامت الثورة
الله الله يابدوى جاب اليسرا

سِـت وإنَّما تسوَى رجال
قضت حياتها كفاح ونضال
بالثورة يتغيَّر الحـال
والإحتلال يطلَع برَّة
الله الله يابدوى جاب اليسرا

( حكموا عليها بالإعدام )
لاكن ضمير العالم قام
وخفِّفوا .. الحُكم قوام
( للسجن ) إقرا وخُد عبرة
الله الله يابدوى جاب اليسرا

العِبرة ثورة على جاير
أبطال ولادِك يا ( جزاير )
الإحتلال أصبح حاير
مِشى وساب أسوأ ذكرى
الله الله يابدوى جاب اليسرا

ذكرى تمنها صعب شديد
كان التمن ( مليون شهيد )
( جميلة ) شافت عهد جديد
من سجنها صبحت حُـرَّة
الله الله يابدوى جاب اليسرا

[حمدى شبانة]

شخصيات الأدباتى
ــــــــــــــــــــــــــ

محمد على

أدباتى أنا راجع تانى

شخصية هامة وعجْبانى
( باشا ) وأصلُه ( ألبانى )
ف عصره مصر كانت كُبرى
الله الله يابدوى جاب اليسرا

أسس لنا دولة قويَّة
غزا الجزيرة العربية
وصلت لِحَدْ ( الدرعيَّة )
جيوشُه دايماً منتصرة
الله الله يابدوى جاب اليسرا

علشان ماينعم بالسُلطة
قام للماليك دبَّر خطـة
ف القلعة جمَّعهُم أورطة
كانت مَدْبَحَة ضـد الأُمـرا
الله الله يابدوى جاب اليسرا

صاحب بصيرة ورأى سليم
أسس لنهضة ف التعليم
كفاية جهل وفِكر قديم
أرسل بعوث تدْرِس برَّة
الله الله يابدوى جاب اليسرا

للنهضة خطَّط وفكَّـر
قال الزراعة تتطوَّر
النيل بدال مابيتهدَّر
لابُد نبحث عن فـكـرة
الله الله يابدوى جاب اليسرا

حفر تِرَع تتملى ميَّة
وزادت المساحة الزراعية
جعل السودان مصريَّة
عرفت ليه ياللى بتقرا ؟
الله الله يابدوى جاب اليسرا

عظيم وجالنا فى ميعادُه
حَكَمنا هوَّة وأولادُه
وبعد منهُم أحفاده
لحد ما قامت ثورة
الله الله يابدوى جاب اليسرا
ـــــــــــــــــــــــــــــ

[حمدى شبانة]

شخصيات الأدباتى
ـــــــــــــــــــــــــــــــ
الحسين بن على

جدُّه النبى إقرا وتابع
وأبوه الخليفة الرابع
وأمُّه منها الخير نابع
آدى النسب آدى الأُسرة
الله الله يابدوى جاب اليسرا

ثاير وكان ف العزم شديد
قال الخلافة مش ل ( يزيد )
الحق راجع لينا أكيد
عزيمتى أقوَى من الصخرة
الله الله يابدوى جاب اليسرا

حق الخلافة ( لآل طالب )
وبيها أنا لازم اطالب
جَمَّع صحابه وحيحارب
وف كربلاء كانت الحسرة
الله الله يابدوى جاب اليسرا