طلبات نوتة أ / عادل صموئيل الجزء الثانى

**عمرو الهنداوي** · #1 17/04/2016, 00h02

أستاذ عادل ازي حضرتك ..
كان عندي سؤالين لحضرتك لو تفضلت..

السؤال الأول: عن الة الكمان الكهربائي .. حضرتك شايف الألة دي ازي؟ وهل شايفها أنها الة منفصلة عن الكمان الطبيعي؟ يعني مثلا الجيتار الكهربائي الة منفصلة ولوحدها خالص غير الجيتار العادي؟ ومن وجهة نظر حضرتك أيه هي مميزات الكمان الكهربائي وعيوبها؟ اعتقد انه لها مميزات عن الكمان الطبيعي مادام منتشرة أوي كده. كنت سمعت قبل كده انه الموجي استخدمها في رسالة تحت الماء وبليغ حمدي أيضا في الحان له.

السؤال الثاني: ايه راي حضرتك في عازفين الكمان الحاليين زي "محمود سرور وجهاد عقل ويحيي الموجي" وغيرهم ومن الغرب العازف "أندري ريو" هو واحد من أعظم عازفي الكمان في العالم.

كل التحية والتقدير

**elarabi** · #2 17/04/2016, 11h40

الاستاد الفاضل عادل صامويل
لكم مني كل التحيات الصادقة و التقديرات الفاءقة لما تقدمونه في توثيق الطرب الاصيل و دلك بدون مقابل. استادي ادا سمح وقتكم
وتكرمتم علي بتدوين القطعة الاصيلة و الراءعة للموجي
مر هدا اليوم بصوته

**عادل صموئيل** · #3 24/04/2016, 23h49

اقتباس:

المشاركة الأصلية كتبت بواسطة عمرو الهنداوي

أستاذ عادل ازي حضرتك ..
كان عندي سؤالين لحضرتك لو تفضلت..

السؤال الأول: عن الة الكمان الكهربائي .. حضرتك شايف الألة دي ازي؟ وهل شايفها أنها الة منفصلة عن الكمان الطبيعي؟ يعني مثلا الجيتار الكهربائي الة منفصلة ولوحدها خالص غير الجيتار العادي؟ ومن وجهة نظر حضرتك أيه هي مميزات الكمان الكهربائي وعيوبها؟ اعتقد انه لها مميزات عن الكمان الطبيعي مادام منتشرة أوي كده. كنت سمعت قبل كده انه الموجي استخدمها في رسالة تحت الماء وبليغ حمدي أيضا في الحان له.

السؤال الثاني: ايه راي حضرتك في عازفين الكمان الحاليين زي "محمود سرور وجهاد عقل ويحيي الموجي" وغيرهم ومن الغرب العازف "أندري ريو" هو واحد من أعظم عازفي الكمان في العالم.

كل التحية والتقدير

اخى العزيز
انت فتحت موضوع كبير جدا ضخم .. ناخده حتة حتة .. اولا فيه فرق بين الجيتار الكهربائى والجيتار العادى ( الاسبانيش ) اهم حاجة فى الفرق ده مش الآلة ولكن طريقة استخدامها يعنى الجيتار اااالكهربائى اضاف ميزة جديدة لإستعمال الجيتار .. اما الكمان ده موضوع مختلف 180 درجة .. الموجى لما استخدم الكمان الكهربائى فى مقدمة رسالة من تحت الماء .. ده كان كمان مش كهربائى ولكن كمان عادى زى اى كمنجة اتحط عليها كبسولة او ميكروفون .. كانت تقليعة يعنى .. ومحمد مصطفى لما سمع حليم طرقة عزفه للصولوا حليم اقتنع يعنى اساسا لأن الصولو بطريقة عزفه راكب على نوعية اللحن .. واستمر استعمال الكمان ( المكهرب ده ) مش الكهربائى فترة طويلة .. بالنسبة ليا انا .. بعد صولو رسالة من تحت الماء ماعجبنيش .. يعنى وقتها كانت الكبسولة دى تمنها من 25 جنيه وانت طالع وبتتحط ع الكمان ممكن تتربط بأستك او بعدين عملوا لها ديل فيه مسمار بيتربط على المشط باع الكمنجة ... واتعدلت بعد كده انهم جابو ميكروفون صغير دقيق اوى بحجم حبة العدس وكانوا بيخرموا فرسة الكمنجة ويلزقوه جواها وبيخرج منه سلك بيتوصل على امبليفاير وزودوا الافترا انهم جابو جهاز اسمه اوكتافر وكان برضه بتاع 25 جنيه وقتها بيحطوه بين الميكروفون وبين الامبليفاير بيخلى صوت الكمنجة يبقى او كتافين مع بعض .. انا طبعا عمرى ما حبيت او فكرت اركبه .. لن انا لما اشترى كمنجة بمبلغ مفزع ما اقدرش اقوله بشتريها ليه ؟؟؟ لصوتها الطبيعى ودى قيمتها .. زى مثلا قيمة صوت عمالقة زمان ايه ان ده كان صوتهم الطبيعى اما زبالة دلوقتى كله مؤثرات لدرجة انك اصبحت ما تعرفش تميز بين كذا واحد بيغنى .. كمان لما اضافوا الحركة اللى بتخلى صوت الانسان زى صوت الوزة بتاعة اوكل واورتيجا دى خلت لو 200 واحد بيغنوا ماتفرقهمش عن بعض لن الصوت صوت الميكسر يعنى مش الصوت البشرى .. اما الكمان الكهربائى الكهربائى يعنى احتاجوه ليه .. خلى بالك معايا .. انت لما بتعزف اورج لو بصوت واحد عزفت صول لا سى دو رى مى فا صول اهم حاجة ان الاصوات يبقوا متجانسين ما يجيش الاورج يقول صول لا سى دو وعند رى تحس النكهة اتغيرت بقت حاجة تانى ... يعنى اخطر واهم حاجة فى الكمنجة المحترمةتجانس الاربع اوتار وانت بتسمع وحش جدا انى بعزف على وتر رى بعدين اروح على وتر صول تلاقى نوعية الصوت اتغيرت .. دى ممكن تحصل لو انا ركبت وتر من ماركة مختلفة .. او اتحرك مكان العمود بتاع الكمنجة لذلك كان الفنى الفنان اللى بيضبط العمود لازم يكون عازف كمان ماهر جدا بحيث انه بيحرك العمود شعرة وبيجرب يعزف من اول الكمنجة لآخرها لو لقا وتر منهم مكتوم او اخنف بيحرك العمود تانى لحد ما الاوتار كلها تبقى متجانسة بتوع بعض يعنى .. كان من اهم مساوىء الكبسولة اللى بيلزقوها دى انها بتيجى تحت وتر واحد .. لذلك تلاقى صوت الاوتار التانية مش زيه مختلفين يعنى ... لما اخترعوا الكمان الكهربائى تحت الفرسة حطوا 4 ميكروفونات لكل وتر ميكروفون .. وممكن فى التجارب تلاقى الميكروفونات دى مش واحدة يعنى الوتر الرفيع عير ميكروفون الوتر الغليظ .. هنا استغنوا عن الصندوق الرنان بتاع الكمنجة ... بعد كده الاربع ميكروفونات بيخرج منهم اسلاك رفيعة بتتقابل فى نقطة يخرج منها كابل تخين بيتوصل للأمبليفاير .. طبعا بدون الامبليفاير تبقى حتة حاجة كه مالهش قيمة .. طيب ليه حصل الاقبال على الكمان الكهربائى .. مش عشان لو مميزات هو مالوش اى ميزة لكن فيه احتياج تانى خالص .. الكمنجات من 300 سنة لحد اوائل القرن العشرين كانت بتتعمل يدوى .. وكان صنعها اسرار بتاعة عائلات يعنى حتى نوع الخشب ايه سر .. وكانت الكمنجة بتاخد مع الصانع سنة شغل .. وبعد ماتكتمل يعزف عليها يلاقى صوتها مش اللى هو يفك منها حتة ويبدلها بنوع خشب تانى لحد ماتوصل للكمال .. بعدها يحطها فى شنطة ويحفظها فى مكان خالى من الرطوبة وعشان تبقى كمنجة تجيب سعر محترم يستاهل تعبه لازم تتركن 30 سنة ع الاقل .. لازم تتعتق زى النبيذ كده .. طيب كانوا بياكلوا منين ...الصانع بيسيب الميراث لأبناءة 40 او خمسين كمنجة بيبعوا منه وهم بيعملوا تانى لأولادهم وكده .. جه وقت والدايرة دى اتقطعت .. لأن انا قلت انها بتاخد سنة شغل .. لو رحت اوربا تلاقى الشخص اللى مالوش شغلة لو وقف على عبية فار او سندوتشات كبده اجره عشرين دولار ف الساعة .. ده ايه ؟ اللى مالوش شغلة او شغلة يتعلمها فى نص يوم .. طيب الصنايعى الشاطر اجره كام ؟ اللى بيعمل كمنجة صنايعى فنان متميز يعنى فى العالم كله بيتعدوا دول اجرهم لازم يكون رهيب يعنى نظرا لندرتهم (لأن فى اوروبا بيقدروا طبعا ) بقت الكنجة اليدوية لو معمولة من عشرين سنة ممكن تنمها يبدأ من مليون جنيه
طبعا نادرا ما حاتتباع ده فى حد ذاته خلا الصناع يغيروا مهنتهم لحاجة بتتباع او اكتفوا بعمل الصيانة للكمنجات .. بقا المتداول فى السوق من الكمنجات الثمينة دى هو اللى اتعمل قبل كده .. وابتدوا ينقصوا نظرا لحدوث حوادث .. يعنى لما غرقت تيتانيك مثلا ان عليها فرقة فيها 4 كمنجات ضاعوا فى الحادث ... ده نقص الكمنجات الثمينة 4 .. لما اتحرقت الاوبرا المصرية ضاع فيها 12 كمنجة ... كل النتاقص ده بيزود سعر باقى الكنجات الموجودة .. اما انتاج الكمنجات الحديث بقا شغل مصانع .. يعنى فى الصين مصنع سوزوكى بيدخل من ناحية خشب يطلع م الناحية التانية كمنجات طبعا اى خشب واى حاجة المصنع بيعمل 300 كمنجة ف اليوم وتمنها ف مصر 300 جنيه .. هى حلوة فى التعليم لكن كعزف تعتبر قبقاب .. طيب واحد عايز كمنجة حلوة .. ان ماتوفرش معاه مبلغ مفزع لأن الكمنجات كمان سعرها مش محدد يعنى تخضع للعرض والطلب يعنى واحد عايز يبيع كمنجة بيطلب فيها السعر اللى بيحدده ولك ان تقبل او ترفض .. كل الظروف دى خلت الناس لجأت للكمان الكهربائى .. بيتميز ان فيه انواع حسب فلوسك وكمان لو صوتها مش حلو اوى تقدر تلعب فى الامليفاير تحسن صوتها لكن عزفا والكلام ده حسب شطارة العازف دى زى دى مفيش اى تميز ده بالعكس الكمان الطبيعى بيبين مهارة العزف اكتر لأنه سامع صوت الالة الضعيفة غير الكهربائية ممن يعلى الصوت يسيطر عليك بالصوت العالى .. حكمل بعدين فى موضوع تانى مع اطيب تحياتى

**عمرو الهنداوي** · #4 25/04/2016, 01h24

شكراً أستاذ عادل صموئيل على ردك الوافي .. وشكراً على نوتة سميرة سعيد

كل التحية والتقدير

**salhi_haithem** · #5 25/04/2016, 17h23

السلام عليكم
ألف مليون شكر أستاذ عادل على نوتة قال جاني بعد يومين و هي من ألحان الدكتور جمال سلامة, أغنية روعة و إختيار أروع
هيثم

**مراد سهيل** · #6 27/04/2016, 08h56

أستاذنا العزيز المايسترو عادل صموئيل

شكرا جزيلا على العمل الكبير الدي تقومون به

أرجو من سيادتك نوتة أغنية نوارة حنينة للمغني التونسي لطفي بوشناق

مع جزيل الشكر

**عادل صموئيل** · #7 29/04/2016, 00h14

احبائى
اقدم لكم نشيد للأطفال

الكون ضاء لفرحتنا

وارجو اخى العزيز طالب النشيد ,, انا خدمتك وكتبت لك النوتة ممكن انت تخدم زملائك المدرسين وتنزل لنا كلمات النشيد لنه فيه ميزة رائعة انه بيعتبر نشيد ترحيب بضيوف للمدرسة وانا كمدرس موسيقى النوعية دى ناقصة شوية عندنا والنشيد جميل وميزته انه عام يعنى مش مرتبط بدولة او مناسبة يتقال فى اى وقت
مع اطيب تحياتى والف شكر مقدما