طلبات نوتة أ / عادل صموئيل الجزء الثانى - الصفحة 400

**El mago Silva** · #**3991** 17/04/2015, 23h44

صباح النور \ مساء النور
بحكم عملك مع محمد عبده ايام الفرقة الماسية اللي نفتقدها حاليا مع محمد عبدهـ ولو إن فرقة وليد فايد ممتازة خصوصا اللي كانت معاهـ في بداية الألفية
لكن أنا نفسي أتكلم عن أغنية مش عارف إنت فاكرها أو لا .. غناها محمد عبدهـ مرة وحدة بس وما غناها ثاني
هي اغنية إسمها " خطأ تبخل علي " غناها في السبعينات .. تقريبا 75
تعرف ليه ما غناها ثاني .. مع إنها من أجمل ألحانه
ومقدمة موسيقية فيها رائحة عبدالوهاب خصوصا في تسريع العزف اللي يكون في نهاية المقدمة زي ما صار في مقدمة أغدا ألقاك ومقدمة الكوبليه الثاني من أمل حياتي

ياريت نعرف تفاصيل عن هالأغنية لو تتذكرها
اخى العزيز
مع الاسف طالما الاغنية ممكن اكون عزفتها معاه مرة واحدة صعب جدا افتكرها .. يعنى احنا بنفتكر الاغانى اللى عملنا فيها بروفات كتير وعزفناها فى حفلات كتير بنحفظها طبعا ... هو محمد عبده كان بيلحن كثير من اغانية وبياخد الحان من آخرين يعنى انا لما كنت بعزف معاه اتذكر عدد كبير من الملحنين سراج عمر وفوزى محسون وغيرهم .. وتكرار غناء الاغنية فى كذا حفلة بيرجع للمطرب نفسه يعنى هو لو عنده مثلا 3 حفلات ( وليه بقول 3 حفلات مثلا ) لن محمد عبده كان مش مقيم ف القاهرة .. يعنى كان بييجى مصر ومعاه 3 عازفين ايقاعات خليجية ملازمين معاه على طول فكان عشان ييجى مصر لازم يكون فيه كذا حفلة ورا بعض غير فايزة ووردة طبعا يعنى كان ممكن تعمل اربع حفلات متفرقة كل شهر ... المهم ان المطرب هو اللى بيختار يغنى ايه مش احنا .. لذلك يرجع عدم غناؤه للأغنية ليه هو شخصيا .... يعنى ليها عوامل كتير ممكن الجمهور ماتقبلهاش زى ماهو عايز او ممكن تكون صعبة وبيخاف يحصل فيها اخطاء يعنى الموضوع لازم هو اللى يقول
مع اطيب تحياتى عادل صموئيل

**عادل صموئيل** · #**3992** 18/04/2015, 00h53

احبائى
اقدم لكم من اغانى الفنانة سلوى القطريب

يمكن بكرا

مع اطيب تحياتى

**عادل صموئيل** · #**3993** 18/04/2015, 00h54

احبائى
اقدم لكم من اناشيد الاطفال الدينية

صلوا صلوا صلاتين

مع اطيب تحياتى

**احمد نور احمد** · #**3994** 18/04/2015, 02h51

الاخ الفنان عادل صموئيل
ياراجل انا داخل بقولك ازيك وايه الجمال ده ماتردش علي
عموما لما لفيت شويه في المنتدي اكتشفت انك مابتدونش الا مع وجود الملف الصوتي
لو حاسس ان الحدود مغامره مش مضمونه مع اني متاكد انك قدها وقدود بلاش ياعم
وشكرا يابو الكرم
اخيك
احمد نور احمد

اخى العزيز
اولا اطيب تحياتى واهلا بك فى المنتدى
هو اول حاجة لما حد بيطلب اغنية لازم ينزل الملف الصوتى .. لأن انا راجل سنة داخل على 65 سنة وصحتى على ادى ومش بقعد ع الكمبيوتر وقت طويل يعنى نص ساعة واقوم وبعد شوية اقعد تانى كذا مرة ف اليوم .. ولما حد بيطلب اغنية اكون انا مش سامعها وحافظها كويس زى حيرت قلبى معاك مثلا .. قدامى حل من اتنين اما انى ادور عليها اجيب الملف وده ممكن ياخد والوقت اللى بقعده على الكمبيوتر وممكن اسمع الاقيها مش من اللون اللى بكتبه او مش دخت مزاجى .. لذلك اى حد بيرفق الملف الصوتى ( وممكن افتح اى وقت الاقى كذا اغنية مطلوبين .. انا بعمل ايه ؟ بشغل الملف الصوتى من اول دقيقتين فيها ( ده لو معرفهاش من قبل ) لو عجبتنى بنزلها عندى وبديها دور فى الطابور الطويل من الطلبات .. بس لو اغنية صغيرة وتخلص بسرعة مافيهاش مشاكل زى مثلا فوق فيه اخ طالب نشيد دينى للأطفال اسمه صلوا صلوا مرتين .. يعنى كام سطر سهلين وبيتكرروا بكتبها بسرعة واخلص منها .. اما فيه اغانى بتحتاج تفكير وتمخيخ واخراج دى بركنها شوية لما يكون المزاج عندى عالى واكتب فيها شوية شوية .. اما السؤال اللى انت سألأته فى المشاركة السابقة ان ممكن تكون الاغنية مش من طبيعة زمن الفن الجميل .. احنا هنا فى المنتدى مش بنشتغل الا فى اغانى الزمن الجميل .. وده مش تعصب ولاعنصرية .. ولكن اغانى الزمن الجميل كانت بتتميز بالسلاسة يعنى انا مدون اكتر من 1000 نوتة اى نوتة منهم اى مبتدىء ممكن يعزفهم ..وحتى لو فيه زمان جملة صعبة او فيها كلكعة او فزلكة كان بيبقى لها مضمون وبالطبع بدونها بحاول افكها شوية بحيث ان ماتقفش فى ايدك وانت بتعزف .. زمان كان شوف مثلا اغانى عبد الحليم اللى فيها توزيع زى مثلا خايف مرة احب .. بس كان فيها ميزة ان اللحن او الخط اللحنى انت سامعه كامل 100% والتوزيع عليه وممكن انت تعزفها كاملة بالعود بدون التوزيع واللى يسمعك يقول لك الله عليك ..لكن الاغانى الحديثة اول حاجة ان كلها موزعة والتوزيع متداخل مع الاحن الاساسى بحيث انى حتى لو فصلت اللحن الاساسى بيبقى مالوش قيمة بدون التوزيع يعنى اللى يسمعها من الشريط بيسمع عشرين حاجة على بعض وانت ع العود طبعا حاتعزف منهم حاجة واحدة حاتبقى فاضى ... انا سمعت جزء من اغنية الحدود اول حاجة لفت نظرى فيه كلكعة فى الميزان او غموض فى المقدمة ( يعنى انا اول حاجة اول ما اسمع احس الميزان هل هو 4 او 3 مثلا وافهم المقام ) هنا الميزان لخبطنى عايز استوعبه .. بعدين الباقى ممكن ماشى بس فيه حتة سريعة جدا جدا مش ممكن تتعزف على العود هى بتاعة اورج اصلا .. ولما دخلنا فى موسيقى الكوبليه لقيت عود مع اورج ده بيقول حاجة وده بيقول عليه حاجة ومش باين مين منهم اللحن الاساسى ومين المصاحب لأنهم مخلوطين على بعض اوى والمشكلة حتى لو انا طلعت منهم خط اللى حايسمعك لو حافظ الاغنية حايحس انك بتقول حاجة غلط لنو ف الشريط سامع حاجة تانية .. ومشكلة التوزيع حاجتين اول حاجة انك لو عايز تعيد عزف او تقديم فى حفلة لحن موزع بالطريقة دى لازم اللى ينفذه الموزع الاصلى لنو عارف هو عامل ايه فين .. وحاجة تانية انت لما بتسمع جملة عليها توزيع من النوع ده بيبقى كل حرف انا سماعه مش حرف بيبقى جزء من كورد .. يعنى اقصد انا مثلا سامع صول .. لا .. سى ... جايز اللحن مش كده لكن تداخل الخطوط اللحنية بيديك ايحاء انها صول لا سى وهى مش كده هى حاجة تانية بتزن من تداخل الاصوات وهنا انا لو كتبتها صول لا سى منفردة اللى يسمعها حايحس انك بتعزف حاجة غلط ... فهمت ليه احنا متعصبين للزمن الجميل ؟ مع اطيب تحياتى وآسف انى مارديتش عليك امبارح لأن كان عندى مشكلة فى احدى الطابعات عندى كان فيها عفريت مبرجلنى بس الحمد لله صلحتها عادل صموئيل

**منذر44** · #**3995** 18/04/2015, 03h11

استاذ عادل
تعجز الكلمات عن شكرك
لك كل المحبة والتقدير

**El mago Silva** · #**3996** 18/04/2015, 09h24

اقتباس:

المشاركة الأصلية كتبت بواسطة El mago Silva

صباح النور \ مساء النور
بحكم عملك مع محمد عبده ايام الفرقة الماسية اللي نفتقدها حاليا مع محمد عبدهـ ولو إن فرقة وليد فايد ممتازة خصوصا اللي كانت معاهـ في بداية الألفية
لكن أنا نفسي أتكلم عن أغنية مش عارف إنت فاكرها أو لا .. غناها محمد عبدهـ مرة وحدة بس وما غناها ثاني
هي اغنية إسمها " خطأ تبخل علي " غناها في السبعينات .. تقريبا 75
تعرف ليه ما غناها ثاني .. مع إنها من أجمل ألحانه
ومقدمة موسيقية فيها رائحة عبدالوهاب خصوصا في تسريع العزف اللي يكون في نهاية المقدمة زي ما صار في مقدمة أغدا ألقاك ومقدمة الكوبليه الثاني من أمل حياتي

ياريت نعرف تفاصيل عن هالأغنية لو تتذكرها
اخى العزيز
مع الاسف طالما الاغنية ممكن اكون عزفتها معاه مرة واحدة صعب جدا افتكرها .. يعنى احنا بنفتكر الاغانى اللى عملنا فيها بروفات كتير وعزفناها فى حفلات كتير بنحفظها طبعا ... هو محمد عبده كان بيلحن كثير من اغانية وبياخد الحان من آخرين يعنى انا لما كنت بعزف معاه اتذكر عدد كبير من الملحنين سراج عمر وفوزى محسون وغيرهم .. وتكرار غناء الاغنية فى كذا حفلة بيرجع للمطرب نفسه يعنى هو لو عنده مثلا 3 حفلات ( وليه بقول 3 حفلات مثلا ) لن محمد عبده كان مش مقيم ف القاهرة .. يعنى كان بييجى مصر ومعاه 3 عازفين ايقاعات خليجية ملازمين معاه على طول فكان عشان ييجى مصر لازم يكون فيه كذا حفلة ورا بعض غير فايزة ووردة طبعا يعنى كان ممكن تعمل اربع حفلات متفرقة كل شهر ... المهم ان المطرب هو اللى بيختار يغنى ايه مش احنا .. لذلك يرجع عدم غناؤه للأغنية ليه هو شخصيا .... يعنى ليها عوامل كتير ممكن الجمهور ماتقبلهاش زى ماهو عايز او ممكن تكون صعبة وبيخاف يحصل فيها اخطاء يعنى الموضوع لازم هو اللى يقول
مع اطيب تحياتى عادل صموئيل

أشكر لطفك وتكرمك بالإجابة
الحقيقة أسعدني ردك ..

هو صحيح ممكن تكون أحد الأسباب اللي ذكرتها .. والله أعلم

اخى العزيز
من واقع خبرتى ... فيه مطرب بيعمل اغنية هو بيقى قاصد ان يكون مستواها عالى ولكن الجمهور عشانذوقه بقى مش زى زمان ممكن ما يتقبلهاش ويتقبل اغنية اقل منها جودة .. ومر علينا حاجات كتير كده .. يعنى وردة مثلا فى موسم واحد عملت اغنيتين مع بعض اغنية آل ايه بيسألونى لسبد مكاوى وقصيدة لاتقل لى ضاع حبى من يدى من تلحين السنباطى ... ومع ان رياض السنباطى كان من مدة طويلة ماعملش الحان لوردة وطبعا عمل لها تحفة من اروع الروائع ومن احلى ماغنت وردة ... كانت بتسأل الجمهور فى الحفلة اغنى ال ايه بيسألونى ولا القصيدة ييختاروا ال ايه بيسألونى ... ومن هنا بطلت تغنيها بعد كده
مع اطيب تحياتى عادل صموئيل
.

**خالدموسى** · #**3997** 18/04/2015, 12h22

مساء الخيرات يا استاذ عادل واشكرك على تدوين النوت الجميلة الخاصة بنجاة الصغيرة حيث اننى اتعلم عليم العزف لان نجاة واغانيها تستهوينى ولذلك فانا كل حضرتك ما تضيف نوتة لنجاة احاول فى عزفها والحمدلله انجح فى ذلك لسهولة اسلوبك فى التدوين
ياريت المقدمة الموسيقية فقط لاغنية نجاة يا حبايبى يا حلوين وهى تستغرق دقيقة واحدة فى الفيديو
يا حبايبى يا حلوين - نجاة الصغيرة .
وهذا هو رابط الاغنية على اليوتيوب :
https://www.youtube.com/watch?v=i7-kTU0baQc

شاكرا حسن مجهوداتك القيمة

**مهدي01** · #**3998** 18/04/2015, 21h14

اقتباس:

المشاركة الأصلية كتبت بواسطة عادل صموئيل

احبائى
اقدم لكم من اناشيد الاطفال الدينية

صلوا صلوا صلاتين

مع اطيب تحياتى

شكرا يا هرم يا على اللمسة والطبق الديني اللي حضرتو ليا و للاعضاء

**عادل صموئيل** · #**3999** 18/04/2015, 23h18

احيائى
اقدم لكم دويتو قديم اوى للثنائى جمال وطروب

قول كمان

مع اطيب تحياتى

**مهدي01** · #**4000** 19/04/2015, 21h36

انشودتين اكثر من رائعة الاولى عن الطبيعة و الثانية عن النبي المسيح عيسى عليه السلام
ممكن تدوينها يا استاذنا يا درة القلوب

اخى العزيز
الانشودة الثانية ناقص منها جزء ممكن تبحث عن تسجيل كامل لها عشان ما ينفعش ادون عمل ناقص ؟
مع اطيب تحياتى عادل صموئيل