أستاذ عادل كل سنة وحضرتك طيب والأخوة الأقباط بخير
كان عندي سؤال سريع عن السيدة ليلي مراد...
وهو من وجهة نظر حضرتك أيه المختلف في صوت ليلي مراد واهم ماكان يميز صوتها؟ وهل حضرتك تتفق معايا انها كانت محبوبة من الملحنيين في وقتها يعني انا اعرف انه تقريباً جميع الملحنيين اشتغلوا معها...
أنا اعتقد انها عمرها ماغنت في حفلة زي حفلات مثلا شادية ونجاة وأم كلثوم فهل اكتفت انها تكون مطربة سنيما فقط؟ اكيد حضرتك عندك معلومات اكثر..
اخى العزيز كل سنة وانت ومصر وكل العالم بخير
اما عن ليلى مراد كانت عبقرية فى الاداء وصوتها متميز جدا .. واهم ميزة فيه ان لو سمعه 1000 شخص هم كلهم حايحبوه بعكس مطربين تانيين يعنى كانت بتختلف الدرجة .. تميزت ليلى مراد بإبتسامة ملائكية وعينيها كان فيها عواطف اكتر من اى مطربة تانية .. بالطبع كان اى ملحن يحب جدا يلحن لها لأنها مؤدية رهيبة يعنى بتوصل كل الاحاسيس بتاعة الملحنين اما عن الحفلات .. كانت ليلى مراد متخصصة فى الاغانى القصيرة يعنى الاغنية خمس دقائق وعشان تطلع تغنى فى حفلة كنجمة بالطبع لازم تقعد ع المسرح ساعة ونصف على الاقل او ساعتين .. ومن هنا لازم تغنى مش اقل من 20 اغنية وده ما ينفعش فى الحفلات وانا سمعت من مقربين لها انها كانت مش بتحب تواجه الجمهور او كانت بتتكسف .. ومن اشهر المطربات اللى كانوا بيتكسفوا نجاة الصغيرة يعنى ع المسرح لو حد قال لها كلمة اعجاب جامدة كانت بتتكسف وتتوقف عن الغنا بس كان فيها ميزة انها بتخلى الفرقة تعيد الجملة الموسيقية وبتتمالك نفسها بسرعة وتكمل عادى .. وللعلم كان صباح عندها نفس طريقة ليلى مراد وهى الاغانى القصيرة لذلك كانت لما بتغنى ف حفلة تغنى مش اقل من 12 اغنية .. انا عزفت معاها عدد قليل جدا من المرات لأن الفرقة الماسية مكانوش بيحبوها لنها كانت بتيجى من لبنان قبل الحفلة بيوم ومعاها نوت 12 اغنية ومكتوبين بقلم رفيع وخط وحش ونعمل عليهم بروفة سريعة وبالطبع احنا مش متعودين او حافظين اغانيها وكان احمد فؤاد حسن بيخاف تطلع العزف اقل من المستوى .. بس طبعا لايعيب الفنان انو بيغنى اغانى قصيرة ده طبعا لون عموما المطربين بتوع زمان كانوا عاملين زى الفاكهة يعنى كل منهم لو مذاق خاص وماتقدرش تقول انهو احلا
مع اطيب تحياتى عادل صموئيل
رد: طلبات نوتة أ / عادل صموئيل الجزء الثانى
رد: طلبات نوتة أ / عادل صموئيل الجزء الثانى
العرض المتطور
