احبائى
اقدم لكم من روائع عبد الحليم حافظ
مشيت على الاشواك
انا لما بقول روائع هى رائعة فى السمع ودونتها وانا مش مقتنع بالتدوين لأن اللحن موزع من اوله لآخره والتوزيع متداخل مع اللحن الاساسى .. وفيه فرق بينها وبين نوعية اغانى موزعة زى مثلا خايف مرة احب .. لأن الثانية التوزيع اضافة او تجميل للجن الاساسى لكن ممكن تعزفها بدون التوزيع تشتغل .. انا لما بدون اغنية ليه بختار اغنية ولا اختار اغنية .. انا مش بدون واضيع وقتى وجهودى وخلاص يعنى لازم يستفيد من المدونة اكبر عدد ممكن من الناس .. وعامل حسابى ان ممكن مطرب ياخد النوتة ينفذها على فرقة او انت تعزفها مع نفسك على الآلة بتاعك يبقى انت بتعزف اللحن كله مش بتعزف صوت واحد من عشر اصوات مش موجودين .. يعنى الاغنية دى عشان تتنفذ لازم يرجع اولا عبد الحليم حافظ لأن مش حاتحصل ولا اى حد يغنيها زى عبد الحليم لأن مفيش حد زى عبد الحليم .. والحاجة الاخطر لازم يجع على اسماعيل بالنوت الاصلية بتاعته .. يعنى احنا فى ايام عبد الحليم فى الفرقة الماسية وانا كنت مسؤول عن النوت الموسيقية كان عندى كل نوت المطربين من عشرين سنة .. يعنى اى مطرب او مطربة يطلع فى دماغه يغنى اغنية قديمة كانت النوتة موجودة او ممكن لو مش موزعة تتكتب بسرعة .. لكن مكانش عندى نوت ولا اغنية من الموزعة لن الموزع كان بعد التسجيل او الحفلة بياخد معاه النوت .. اما حرصا على اسراره ان ماحدش يذاكرهم ويكتب شغله .. او ان المطرب يجيب مايسترو تانى ياخد شغله على الجاهز .. يعنى من اشهر الاغانى الموزعة الللى اتعملت حفلة وبتتذاع فى التليفزيون اغنية حبيبها حتلاحظ ان مين اللى بيقود الفرقة .. هنا مش احمد فؤاد حسن ولكن على اسماعيل وبعد الحفلة على اسماعيل اخد كل النوت وحطها فى حقيبته ومشى بحيث ان عبد الحليم لو عايز يغنيها فى اى حفلة لازم يجيب على اسماعيل .. وللعلم كانت مشكلة خطيرة وانا اتكلمت فيها مع عبد الحليم كتير انه لو انت كتبت كل اسماء اغانى عبد الحليم وهو عايز يختار اغنية من القديم يغنيها فى حفلة حتلاقينا بنستبعد عدد كبير منهم بسبب مشكلة التوزيع .. يعنى مثلا انا عزفت مع حليم من سنة 70 الى 77 .. كان كل الموزعين اللى عملوا الاغانى رحلوا .. يبقى استحالة انه يغنى اى اغنية منهم لأن لازم الموزع بنفسه يقود الفرقة ولازم طبعا تكون معاه النوت الاصلية
وحنتكلم مرة تانية عن الفرق بين قائد الفرقة والمايسترو لأن دى شغلانة ودى شغلانة تانية خالص .. اكرر جاء اللى يرد ما يعملش اقتباس للى كتبته كله يعنى ياخد اسم الاغنية فقط حرصا على عدم زيادة الصفحات بكلام مكرر
مع اطيب تحياتى
رد: طلبات نوتة أ / عادل صموئيل الجزء الثانى
العرض الشجري