طلبات نوتة أ / عادل صموئيل الجزء الثانى

[سامى امين]

مستر عادل طبعا عارف انك مشغول جدا والناس كلها عارفة انك من اكثر الناس عطاء صدقنى انا مش كنت عاوز اطلب نوت خالص بس هى بمناسبة درس الكمانجة اللى شرحتة فى سطرين واللى انا هاذاكرة فى شهرين او اكتر وبذاكر كل كلمة قلتها كويس جدا هى نوتة طلبها قبلى ناس كتير واخرهم الموهوب استاذ ملحن مصرى وهى اغنية ليلى مراد ماليش امل عزف صولو كمانجة انور منسى وبداء على وتر صول الغليظ وتحرك بايدية على نفس الوتر لمنطقة نصف الكمانجة
اخى العزيز
شوف انا كتبت ييجى كام نوتة .. وماكتبتش كام طلب .. الفرق هو انى لما بتعب نفسى واكتب نوتة بتبقى عشان مليون شخص يعزفها مش عشان شخص واحد والباقى مايعرفوش يعزفوها انا كده احس انى راجل فاشل .. بالنسبة لأنور منسى بالذات ده كان فلتة بس بيختلف عن الحفناوى ان منسى التكنيك بتاعه غربى والحفناوى اقصى ما يمكن تقول فى التطريب الشرقى اللى واخد نكهة تركية على الشرقى .. كان انور منسى بيتميز بنوعية محددة مش موجودة فى كل الاغانى .. لذلك كان مش عازف فى الفرقة زينا يعنى متواجدين كل يوم ولكن كانوا بيطلبوه لما يكون لو صولو محدد او شغل .. وفى اغنية ماليش امل كان لو شغل .. والشغل ده مش من تلحين عبد الوهاب ولكن عبد الوهاب سمعه حاجة بالعود وقال لو قول وافترى وكسر الدنيا فى الحدود دى .. وبالطبع اللى قاله انور منسى ده انور منسى مش عبد الواهب وطالما انور منسى مش ممن يتكرر مافيش حد تانى ممكن يقولها زيه او حاتطلع المستمع يحس انها وحشة .. يعنى انت سمعت كل معزوفاتى حتلاقينى قلت كل الصولوهات اللى قالها الحفناوى وحتى لو انا اقل من الحفناوى لكن انا حاسس انى قلت الصولو حلو لأن ده لونى لكن انور منسى مش لونى .. كمان عشان حتى لو وجد عازف يعزف صولو انور منسى لازم يعزفها سماعى لن حتى لو اتكتبت ( ومش ممكن حاتتكتب حرفيا 100% ) العازف لازم يعزفها برضو سماعى لأن النوتة هنا حتقيده وحايطلع حاجة تعتبر قليلة جدا للى الجمهور حافظه يعنى بكرر نفس المقولة اللى قلتها مليون مرة من قبل مش كل موسيقى احنا ممكن نعزفها فيه موسيقى ممكن نسمعها بس
مع اطيب تحياتى عادل صموئيل