طلبات نوتة أ / عادل صموئيل الجزء الثانى

[منذر44]

لحن رائع وتدوين اروع
نوتة احترافية بكل معنى الكلمة تمتعت جدا وانا اعزفها على العود
استاذ عادل سلمت يداك على هذا الابداع و على هذا الرقي الفني
لا بد ان الموسيقار عبد الوهاب والرحابنة يشكروك من اعماقهم
على تخليدك لهذا العمل الفني الرائع
الف شكرلهذا الجهد الكبير
ملاحظة كنت قد طلبت من حضرتك تدوين اغنية شادية غاب القمر
واغنية عزيزة جلال والتقينا هل هما في قائمة الانتظار ام لا يمكن
تدوينهما ارجو ايضاح ذلك
مع اجم تحباتي
اخى العزيز
شكرا .. ان شاء الله ادونهم بس الطلبات كتير اوى وبتعمل عندى شوية لخبطة
مع اطيب تحياتى عادل صموئيل

[سليم العباس]

شكرا على المجهود الكبير و الواضح لتدوين قصيدة مر بي لفيروز الحان العبقري الاستاذ محمد عبد الوهاب .

أستاذ عادل :

هل تعتقد أن الأستاذ محمد عبد الوهاب قد ترك بصمة واضحة مع فيروز ، أما كان مجرد لقاء حتمي بين مدرستين فنيتين تكلل بنجاح محدود ؟!
و هل قدم عبد الوهاب إضافة ما فيما يتعلق بالللحن أو طريقة الأداء ، كما فعل مثلا الملحن فيلمون وهبي الذي قدم لها أغاني بطابع شرقي أصيل حيث لاقت نجاحا منقطع النظير ( إسوارة العروس ، يا مرسال المراسيل ، طيري يا طيارة ، كتبنا و ما كتبنا ، يا ريت ، أنا خوفي من عتم الليل ، صيف يا صيف ، يا كرم العلالي )

و شكر لك .
اخى العزيز
انا لما قريت كلامك حصل عندى لخبطة لان الموضوع كبير اوى وعندى طبعا كلام كتير , لكن احاول ان اقدم وجهة نظرى .. الفرق بين فيروز وبين اى مطربة اخرى انه بسبب تواجدها الحميم المتصل مع الاخوين رحبانى ان عندها اكبر عدد من الاغانى على الاطلاق وده ممكن تلاحظه لو دخلت موقع على النت فيه اغانى حتلاقى ام كلثوم مثلا 300 اغنية وعبد الحليم فى الحدود دى .. لكن تلاقى فيروز بتتخطى ال 1300 اغنية ويمكن اكتر .. واكتر دولة بتذاع فيها اغنى فيروز حتلاقيها بتذيعهم كلهم يبقى نصيب اغانى عبد الوهاب قليل جدا لأنهم 2 وسط 1300 .. عشان كده الاغانى مش ملحوظة اوى .. اما بالنسبة لعبد الوهاب زى ماقلت انه لما يقدم لحن للعمالقة دول لازم يثبت وجوده ... يعنى فى مر بى قدم الاغنية الاول فى النهاوند استعمل الغربى والشرقى ولما دخل على الراست قدم الراست الشرقى جدا .. ثم قدم ما يشابه الموال .. وكلمة ما يشابه الموال لها قصد .. يعنى لو قدم مساحة يبقى فيها موال .. الموال ده بيبقى تجويد من المطرب نفسه مش من الملحن .. وهنا تظهر فيروز اكتر .. ولكنه هنا قدم مايشبه الموال فى مقطع ( الهوى .. لحظ ) ولكن موال ملحن مقنن من عبد الوهاب بحيث يظهر فيه عبد الوهاب بلحنه اكتر مش فيروز بادائها .. لكن الموضوع مهم للطرفين .. يعنى قيمة كل منهما ان كان لازم يعملوا عمل مشترك .. وده خلا فيروز كمان فى ىواخر مراحلها انها طلبت لحن من السنباطى ولكن الموضع ما تمش .. والخلاصة ان اغانى الزمن الجميل كانت كل اغنية تعتبر اضافة للكنوز بعكس دلوقتى مافيش ولا اغنية لها قيمة
مع اطيب تحياتى عادل صموئيل

[عاصم المنشاوى]

الأصدقاء....
غنت فيروز من ألحان الموسيقار محمد عبد الوهاب 3أغنيات قام بتلحينهم خصيصا لها فى 1961 أغنية بالعامية اللبنانية "سهار بعد سهار"...بعدها من كلمات ( جبران خليل جبران) قصيدة "سكن الليل".....ثم كانت آخر ألحانه لها "مر بى "...والتى تفضل أستاذنا الجميل بتدوينها...
...
أما كاتب القصيدة فهو الشاعر اللبنانى الراحل "سعيد عقل" ....كتبها غزلا فى دمشق الساحرة بعراقتها وجمال حاراتها وغوطتها ونهرها "بردى" الذى يحمل اليها الحياة ...توفى سعيد عقل عن عمر تجاوز المائة عام...فهو من مواليد 1912 وتوفى من 4 شهور فقط ...نوفمبر2014 ...قدمت فيروز اغنية" مر بى" سنة1967 على مسرح المعرض "معرض دمشق الدولى " الذى كان يقام من شهر سبتمبر من كل عام... غنت فيروز عدة أغاني من شعر سعيد عقل بجانب "مر بى".. أهمها: "زهرة المدائن" و"يارا" و"بحبك ما بعرف" و"أمي يا ملاكي"...الغريب ان سعيد عقل هذا الشاعر المسيحى هو كاتب القصيدة الرائعة لفيروز "غنيت مكة أهلها الصيد"....فين التسامح والسماحة دلوقتى ؟المؤلف والملحن والمطربة ...مسيحيين ...بالظبط مثل عبد الحليم وعبد الرحمن الأبنودى وبليغ حمدى ...مسلمين وقدموا لنا رائعة أسمها اغنية "المسيح"....ايه اللى حصل للعرب ياأستاذ عادل ؟؟؟؟؟.....
اخى العزيز شكرا لكلامك الجميل
طول عمر الشعوب ماحدش قال لحد دينك ايه .. اللى عمل الحكاية دى دعاة الفتن .. يعنى ببساطة شديدة فيه 3 اديان سماوية والمفروض ان كل من يدين باحد تلك الاديان المفروض انو يكون معترف بوجود الاديان الاخرى .. ولو تحسبها بدقة لما نزل الدين الاول وهو الديانة اليهودية بعدها نزلت الديانة المسيحية ولو تلاحظ انها نزلت فى القدس معقل الديانة اليهودية وقتها .. ولكن الله لم ينزل المسيحية لإلغاء اليهودية ولكن لها رسالة اخرى ان تنتشر فى اوربا اللى كانوا بيعبدوا الاصنام .. وبعدها نزل الاسلام .. ولو تلاحظ ايضا نزل فين فى شبه الجزيرة العربية لأنهم كانوا مازالوا بيعبدوا الاصنام .. وانت لو نظرت الى الخريطة تلاحط ان منطقة شبه الجزيرة العربية لونها اصفر يعنى كانت صحراء واسعة مافيهاش نهر .. لذلك كانت على مر التاريخ منطقة معزولة عن المستعمرين وعن الدنيا .. يعنى مكانش اى جيش من جيوش الاحتلالات المختلفة ممكن ينزل او يمر فى المنطقة دى لأن جنوده حايهلكوا ويتوهوا فى الصحراء حتى التتار لما مروا مروا بعيد عنها .. ولما اتى الدين الاسلامى فى المنطقة دى حمل معه الحضارة ولا حظ ان الدين الاسلامى اوصى المسلمين خيرا بالأديان الاخرى لأنها من الله ومش معقول الله حايغالط نفسه يعنى ينزل دين بعدين ينزل دين تانى للقضاء عليه .. وللعلم لو ماظهر الدين الاسلامى فى المنطقة دى لكانت لحد اليوم زى ماهى من 1500 سنة يعنى لسه بيعبدوا الاصنام ولسه وئد البنات .. ان الدين لله والدين معاملة .. ولو تحسب كل الاغانى والاناشيدالدينية الاسلامية وشوف كام مسيحى اشتغل فيها .. وانا زى ما انتم شايفين اى عضو بيطلب منى اغنية دينية الاسلامية عندى زى المسيحية لأن كلنا بنعبد الله الواحد وللعلم الاغنية الدينية بتوصل حاجة ماتوصلهاش الخطب هم بس دعاة الفتن واللى بينساقوا ورا ناس فاسدين من الغرب لتخريب كل حاجة واى حاجة لمصالحهم بس الله اكبر منهم جميعا واطيب تحياتى عادل صموئيل

[المنير]

السلام عليكم
الأستاذ عاصم المنشاوي حياك الله بسلام: غنت فيروز للأستاذ محمد عبد الوهاب كذلك "خايف أقول الي فقلبي" .
تحياتي.

[عاصم المنشاوى]

الصديق الكريم / المنير

ماتقوله هو مظبوط جدا ...وهذا صحيح ...هى غنت أغنيتين من ألحانه ...وهما خايف اقول اللى فى قلبى ...و ياجارة الوادى .....

ولكن الألحان التى وضعها لها خصيصا ...هم 3 سهار - سكن الليل - مر بى...
وكان المفروض أن تغنى "ضى القناديل"...لكنها لم تستسيغها ..فغناها عبد الحليم حافظ....شكرا ياصديقى ودمت لنا عونا

[خالدموسى]

شكرا على تدوين مر بى التى ابحث عنها من فترة يا اساذنا الجميل عادل صمويل اتمنى ايصا ان تدون لنا رائعة عبد الوهاب لفيروز سكن الليل شاكرا لك هذه المجهودات الرائعة

[خليل سليم]

اود ان انوه بان اغنية سكن الليل موجودة في المنتدى وبتدوين المايسترو الاستاذ الفاضل عادل لكن الذي ابحث عنه هو رائعة فيروز سهار بعد ساهر والتي لم تدون لحد الان واتمنى من استاذنا العزيز والذي لا ييخل علينا بشى بتدوينها لتكون ثلاثية الموسيقار الخالد محمد عبد الوهاب سكن الليل ومر بي و سهار بعد ساهر للفنانة الكبيرة فيروز كاملة وبتدوين المايستر العزيزعادل والذي ادعو له بصحه والعافيه وطول العمر وحفظه الرب

[سليم العباس]

بعد التحية أستاذ عادل :

اقتراح لتدوين موشح يمر عجبا و موشح في الروض ، من أداء الفنان صباح فخري .

و هما موشحان غنيان عن التعريف ... أرجو تدوينهما بطريقتك السهلة الممتنعة .

و شكرا لك .

اخى العزيز
الموشحين دول انا اول مرة اسمعهم بس حلوين بس فيه مشكلة موشح فى الروض انا مش فاهم الايقاع بتاعه لن هو دخل مباشرة بدون مقدمة موسيقية .. وانا اهم حاجة عندى اسمع الدوم عشان احدد الميزان وعازف الايقاع ماشى كله تكوك وجربت اكتبه على حده فى كذا ايقاع مختلف مش عارفه يعنى لو حد يقول لى ايقاعه ايه
مع اطيب تحياتى عادل صموئيل

[salmanas]

السلام على الاساتذه الكرام و شكرا لكم على هذه السخاوة الكبرى
انا ابحث عن نوطة يا ناعما للاستاد محمد عبد الوهاب و شكرا
آخوكم عبد الغني

[عادل صموئيل]

احبائى
يسعدنى ويشرفنى ان اقدم لكم لحن عبد الوهاب الرائع لفيروز

اسهر بعد اسهر

وعايز اقول حاجات وخواطر كتير ... اولها انا ماكنتش اعرف ان عبد الوهاب هو صاحب اللحن إلا منكم هنا .. لأن الاغنية مكانتش بتتذاع كتير عندنا ف مصر وعشان اللهجة لبنانية انا كنت متخيلها للرحبانية .. لأن عبد الوهاب كان بيلحن القصائد لفيروز مر بى وسكن الليل تفاديا من الاخطاء او عدم الاقناع فى اللهجة اللبنانية بعكس فريد الاطرش مثلا .. انا شفت النوتة المقدمة من الاخ العزيز سليم العباسى .. ماعجبتنيش خالص يعنى مليئة بالاخطاء والدقة المتناهية مش موجودة وحاجات كتير جدا ناقصة .. وكان من حق عبد الوهاب عليا انى اقدمها تانى بس مكتوبة بدقة متناهية .. فيه موضوع فى منتهى الخطورة فى اخطاء التدوين ممكن مش ان المدون مش شاطر او محدود ولكن انو يكون مش فاهم الملحن عايز ايه او عامل الجملة ازاى .. ودى بتيجى من انو بيسمعها او بيكتبها من الذاكرة وانا عشان اتلافى الخطأ ده اى اغنية حتى لو حافظها من زمان وبعزفها عشان ادونها لازم اسمع واكتبها من ملف صوتى وكتير اوى بيطلع حاجات مرت عليا بستكشفها من جديد من الملف الصوتى لأن الناس دول كانوا عباقرة يعنى انت لو سمعت الاغنية عادى لكن لو دققت اوى اوى فيها حتلاقى حاجات تانية خالص .. احنا كمصريين بنسمع الاغنية دى زى النطق يعنى اسمها عندنا : اسهار بعد اسهار .. ولكن اللى بيعرف اللهجة الشامية حرف الألف الثانى ده فى اللهجة يعنى هم بيمطوا سهر بحيث تبقى مسموعة سهار .. وحرف الالف اللى فى الاول ممكن يقولوه او ياكلوه يعنى ممكن يقولها اسهر او سهر .. ودى مشكلة اللحن الخطيرة اللى الاخ اللى دونها ما اخدش بالو منها يعنى فيروز او الكورالل لو داس على الالف الاولى ( يعنى حددها ) بتبقى فى اللافارى او فى آخر المازورة مش فى اول المازورة زى ماهو كاتب واتكرر كتير نفس الخطأ .. يعنى انا شغلت الملف الصوتى وشفت النوتة لقيت ان معظم اسهر حرف الالف الاول فى آخر المزورة مش على الدوم ... وده طبعا خطأ خطير فى التدوين .. الحاجة التانية انا فاهم عبد الوهاب وحافظه اوى اوى ,, يعنى لو مطرب جميل وفرقة حلوة بيعمل شغل رائع .. ومن اهم معالم عبد الوهاب انو لما يكرر جملة عمره ما بيعملها نسخة كربونية لازم يكون فيها لعبة او اختراع ما .. المذهب فيروز قالته بطريقة ولما قاله الكورال حصل فيه تغييرات ( مش موجودة فى النوتة المرفقة ) طبعا اضطريت اكتب المذهب من فيروز مرة والكورال مرة بعدين موسيقى الكوبليه الاول شبهها موسيقى الكوبليه التانى لكن الردود مختلفة جدا والكورال لما رد على فيروز بعد الكوبليه الاول رد بإختلاف عن لما رد عليها فى المذهب ايضا لما رد عليها فى الكوبليه التانى اختلاف عما بيقول من قبل .. ده عبد الوهاب ... طبعا انا سعيد جدا انى دونت اللحن الرائع ده هو صعب شوية لكن ان شاء الله يمشى ... واتمنى انو يعجبكم
مع اطيب تحياتى