( 12 )
الضريبة العقارية
--------------------------
ياللا ياخويا انت وهيه .. من غير مناكفة ولا أذية
علشان متقعدوا فى بيوتكم .. هاتوا الضريبة العقارية
فى أى بيت راح تبقا فيه .. لازم هتدفع عليه ضريبة
لو حتى خن سكنت فيه .. وفرشتك فيه الزكيبة
أو حتى نمت ويا البهايم .. يبقا هتدفع ع الزريبة
أصل ياخويا انت وهيه .. مصر مزنوقة شوية
بالذوق بالعافية راح تدفع .. لنا الضريبة العقارية
وماعندناشى لجنة طعون .. ولا لايحة تلزمنا بها
لو حاسس انك كدا مغبون .. عندك محاكم روح لها
ولو المحامى شغله مضمون .. هتدفع أكتر منها
يبقا تهدى اللعب شوية .. سيبك بقا من رفع قضية
وتدفع اللى ربطته عليك .. من الضريبة العقارية
لو ما دفعتش انت حر .. الحجز راح يبقا إدارى
وبيتك انت حارس عليه .. دا غصب عنك اضطرارى
وييجى يوم نبيعه فى مزاد .. دمعك تشوفه ع الخد جارى
تاخد العيال ويا ولية .. ومش تاخدوا الزراعية
وتمد إيدك بالسؤال .. لجل الضريبة العقارية
فكرتونا بشغل الجباه .. وفلوس تروح الآستانة
والفقر مرسوم ع الجباه .. وعيالنا من كام يوم جعانة
والصبر دا له منتهاه ..والخلق ياخوانا تعبانة
متخلوا فى الوش شوية .. من الأحمر وبلا أذية
وترحموا الناس لو مرة .. والغوا الضريبة العقارية
-----------------------------------------------
هانئ الجمل
رد: دنيا المونولوج ( متجدد )
العرض الشجري